Михей 2 - Ыдыктыг Библия

Кызагдакчылар ат болур

¹ Орун-дөжээнге чыткаш, кемниг херек, бузут үүлгедир бодалдыг улус ат болур! Олар – даң адып кээрге, ук бодалдарын күүседиптер күш-шыдалдыг улус-тур.

² Ол улус шөлдер күзээр болза, хунаап аар-дыр, бажыңнар күзээр болза, былаап аар-дыр. Бажыңнарга чурттап олурган улусту олар кызагдап, бажың ээзин-даа, ооң өг-бүлезин-даа үптеп-тонап, оларның ээлел черин бодунга ап аар-дыр.

³ Ынчангаш Дээрги-Чаяакчы ол чонга удур мынча дээн: «Мээң бодалдарым база бар: Мен силерже адырлып шыдавазыңар айыыл-халапты ыдар деп тур мен. Моон соңгаар адыыргап базып турар харыыңар чок апаар, чүге дээрге айыыл-халап үези келген-дир.

⁴ Ол хүн улус силерниң дугайыңарда качыгдал ырлары чогаадыр, ажыыңар ажып ыглажыр: „Бис шуут-ла хоозурап калдывыс! Чонувустуң хувааглыг черин Ол өскээр хемчээп, былаап алды. Бистиң шөлдеривисти Бурганга шынчы эвес улуска үлеп берип тур“».

⁵ Ынчангаш Дээрги-Чаяакчының чонунуң аразынга кым-даа силерге хувааглыг чер үлеп бербес.

Чон чүгле меге медээчилерге ынак

⁶ Улус: «Өттүр билип медеглевеңер! Ол дугайында өттүр билип медеглеп болбас. Бистиң адывыс баксыравас!

⁷ Дээрги-Чаяакчы ындыг килеңнээчел бе? Ол ындыг чүвени кылып болур бе?» – деп чугаалап турар. «О, Иаковтуң салгалы, ынча деп болур бе? Мээң сөстерим чөптүг амыдырап чоруур кижиге ачылыг болбас бе?

⁸ Ооң мурнунда Мээңии турган чон дайзын дег тура халаан; айыыл дугайында каразывайн чаныңар-биле эртип турар тайбың улустуң хевин ушта тыртып, былаап ап турар-дыр силер.

⁹ Мээң чонумнуң херээженнерин эптиг бажыңнарындан үндүр сывыртап турар-дыр силер; оларның ажы-төлүнден Мээң хайырлаан ачы-буянымны кезээ шагда хунаап ап турар-дыр силер.

¹⁰ Дораан чоруй барыңар – бо черге ам амыр-дыш турбас, ону арыг эвези дээш буурадып каар, ол болза коргунчуг буураашкын боор.

¹¹ Бир эвес мегечи азы бузурукчу кижи келгеш: „Мен силерге арага база өске-даа эзиртир суксун дугайында өттүр билип медеглээр мен“ – дээн болза, ол кижи бо чонга таарымчалыг медээчи боор турган болду бе».

Аазап каан камгалал

¹² «О, Иаковтуң салгалы, Мен силерни шуптуңарны ыяап чыып аар мен, Израильдиң артынчызын ыяап каттыштырып каар мен. Кажаалаткан хойларны дег, одарга кодан хойну дег, силерни каттыштырып, чыыр мен – бо черни чыылган хөй кижиниң шимээни дола бээр.

¹³ Силерниң мурнуңарга орук ажыдыкчызы чоруур; силер хоорайның хаалгазын чаза таварып үне бээр силер. Хааныңар силерниң мурнуңарга чоруур, Дээрги-Чаяакчы силерни баштаар».