Малахия 3 - Ыдыктыг Библия

¹ Аг-шериглиг Дээрги-Чаяакчы: «Көрүңер, Меңээ оруктан белеткеп берзин дээш, Мен Бодумнуң төлээмни мурнай чорудуп тур мен. Силерниң чүткүп турарыңар Дээрги Бодунуң өргээзинге хенертен чедип кээр, силерниң көрүксеп турарыңар чагыг-керээмни медеглээр төлээм мыя бо кел чыдыр» – деп харыылаан-дыр.

² Ооң чедип кээр хүнүн кым шыдап эртерил? Ол көстүп кээрге, кым шыдажырыл? Ол эзилдирер от, саваң дег болур.

³ Ол мөңгүн арыглаар эзилдирикчи дег олуруп алгаш, Левийниң аймаан арыглап, оларны алдын-мөңгүн дег эзилдирип каар. Ынчан олар Дээрги-Чаяакчыга чөптүг өргүл кылыр.

⁴ Ынчан Иудея биле Иерусалимниң өргүлдери, шаандакы үеде-даа дег, эрткен чылдарда-даа дег, Дээрги-Чаяакчыга өөрүнчүг болур.

⁵ Аг-шериглиг Дээрги-Чаяакчы: «Мен силерге шииткел үндүрүп чедип кээр мен. Караң көрнүрлерге, кады чурттаан эжинге шынчы эвестерге, мегелеп даңгыраглаарларга, хөлечиктерниң ажыл төлевирин бербестерге, дулгуяк херээженнерни база өскүс кижилерни кызагдаарларга, даштыкы улустуң эргелерин казыырларга – Менден кортпас улуска удур саадал чокка херечилеп, оларның буруузун илередир мен» – деп чугаалаан.

^6-7 Аг-шериглиг Дээрги-Чаяакчы: «Мен, Дээрги-Чаяакчы, өскерилбес мен. А силер Иаковтуң үре-салгалы болуп артпышаан-на болгай силер. Ада-өгбеңерниң үезинден-не Мээң дүрүмнеримни үреп, оларны сагывайн турган силер. Менче эглип келиңер, Мен база силерже эглип кээр мен» – деп чугаалаан. А силер: «Канчап эглип кээр бис?!» – деп тур силер.

Бурганга хамааржыр чүүлдерни оорлап болбас

⁸ «Кижи Бурганга хамааржыр чүүлдерни оорлап болур бе? А силер Мээң чүүлдеримни оорлап турар-дыр силер». «Сеңээ хамааржыр чүүлдерни канчаар оорлап турдувус?» – деп тур силер. «Меңээ бээр ужурлуг бүгү чүвеңерниң оннуң бир кезээ-биле, өргүл-белектериңер-биле.

⁹ Силер – бүгү чон – каргаттырар силер, чүге дээрге Мээң чүүлдеримни оорлап турар-дыр силер.

¹⁰ Шыгжамырларже дүжүттүң оннуң бир кезээн бүрүнү-биле эккелиңер – Мээң өргээмге аъш-чем турзун – деп, Аг-шериглиг Дээрги-Чаяакчы чугаалаан. – Оон Мени шенеп көрүңер даан: дээрниң эжиктерин силерге ажыдып бербес-тир мен бе, силерже ачы-буянымны сыңырар чер чок кылдыр харамнанмайн бадырып бербес-тир мен бе?

¹¹ Мен силерниң дүжүдүңерни хоралакчыларга чиртпес мен, шөлдериңерде виноград сыптарында чимис база черже кээп дүшпес – деп, Аг-шериглиг Дээрги-Чаяакчы чугаалаан. –

¹² Ынчан бүгү чоннар силерни амыр-чыргалдыг деп адаар, чүге дээрге силерниң чериңер кайгамчык эки болур». Аг-шериглиг Дээрги-Чаяакчының чугаалаан чүвези ол-дур.

Бурган Бодунуң чөптүг-шынныын көргүзер

¹³ «Силер Меңээ удур кадыг сөстер чугаалап турдуңар» – деп, Дээрги-Чаяакчы чугаалаан. А силер: «Бис Сеңээ удур чүнү чугааладывыс?» – деп тур силер.

¹⁴ Силер: «Бурганга бараан боорга, ажык чок-тур. Аг-шериглиг Дээрги-Чаяакчының дүрүмнерин сагып, Ооң мурнунга качыгдап ыглаан улус дег муңгарап чоруп тургаш, кандыг ажык-дуза алдывыс?

¹⁵ Бис ам бардам улусту амыр-чыргалдыг деп санаар-дыр бис. Бузуттуглар чедиишкинниг болуп тур, олар Дээрги-Чаяакчыга чөңгээлеп тура безин, кеземче чок артып каар-дыр» – деп турган силер.

¹⁶ А Бургандан коргар улус ол үеде аразында чугаалажырга, Дээрги-Чаяакчы оларже кичээнгей салып, дыңнап турган. Ынчаарга Дээрги-Чаяакчыдан коргар, Ооң алдар-адының дугайында бодаар улустуң аттарын киирген тураскаалдыг ном Ооң мурнунга бижиттинип турган.

¹⁷ «Олар Меңээ хамааржыр – деп, Аг-шериглиг Дээрги-Чаяакчы чугаалаан. – Мээң хөделип үнер хүнүмде олар Мээң улуг үнелиг өнчү-хөреңгим болур. Мен оларга, ада кижи аңаа бараан болуп турар оглунга дег, хайыралыг боор мен.

¹⁸ Ынчан силер Бурганга бараан болуп турар чөптүг-шынныг кижи биле Аңаа бараан болбайн турар бузуттуг кижиниң аразында ылгалды катап база билип каар силер».