Исайя 64 - Ыдыктыг Библия

¹ О, бир эвес Сен дээрни чара тырткаш, дүжүп келген болзуңза! Ынчан даглар Сээң мурнуңга сирилеп, эстир ийик –

² от чээргенни ынчаар кыпсып, сугну хайындырыптар. Дайзыннарың Сээң адыңны билип алзын дээш, дүжүп кел! Бүгү чоннар Сээң мурнуңга сирилезин!

³ Бистиң идегевээнивис түрлүг херектерни кылып турдуң. Сен дүжүп кээриңге, даглар Сээң мурнуңга сирилеп, эстип турду!

⁴ Сенден өске кандыг-бир бурган аңаа идегеп турар улуска ындыг чүве кылганын эрте шагдан бээр кым-даа дыңнаваан, кым-даа көрбээн.

⁵ Чөптүг-шынныг чорукту өөрүшкүлүг кылып, Сээң оруктарың истеп, Сени сактып турар кижини Сен Бодуң уткуп үнүп кээп турар сен. Ынчалза-даа бис шагдан бээр бачыт үүлгедип туруп бээривиске, Сен килеңней бердиң. Камгалал ап шыдаар бис бе?!

⁶ Бис шупту арыг эвес чүүлдер дег апардывыс, бистиң бүгү эки херектеривис хирленип, бужартаан хеп дег. Бис шупту бүрүлер дег оңуп тур бис, бачыттарывыс бисти хат ышкаш хадып алгаш баар-дыр.

⁷ Кым-даа Сээң адыңны адап, кыйгырбас-тыр, кым-даа Сени эдерерин кызытпас-тыр. Сен бистен хая көрнүп, бисти боттарывыстың бачыттарывыстың эргезинге хүлээдип бердиң.

⁸ Ындыг турбуже, Дээрги-Чаяакчы, Сен – бистиң Адавыс сен, бис – дой бис, а Сен – дой сава кылыкчызы сен. Бис шупту – Сээң холуңнуң кылыглары бис.

⁹ О, Дээрги-Чаяакчы, хөлүн эрттир килеңневейн көрем, бистиң бачыттарывысты кезээ мөңгеде сагынмам! Көрүп көр даан: бис шупту Сээң чонуң ышкажыл бис!

¹⁰ Сээң ыдыктыг хоорайларың ээн кургаг хову апарган, Сион – ээн кургаг хову, Иерусалим – чурттакчы чок чер апарган.

¹¹ Бистиң алдарлыг ыдыктыг өргээвис – ада-өгбевистиң Сени алгап-мактап турган чери – өрттенип калган. Үнелээривис бүгү чүве бузундулар бооп хуула берген.

¹² Таанда-ла Сен ооң соонда безин биске кээргелиң көргүспес сен бе, Дээрги-Чаяакчы? Таанда-ла ыыттавайн эрттирип, бисти хөлүн эрттир кезедир сен бе?