Исайя 61 - Ыдыктыг Библия

Хосталга дугайында буянныг медээ

¹ Дээрги-Бурган-Чаяакчының Сүлдези мени бүргээн-дир – Ол мени түрегдээннерге буянныг медээни дыңнатсын дээш шилип чаап каан! Ол мени сеткил-чүрээ муңгараан улусту экиртсин дээш, туттурганнарга хосталганы, хоругдаттырганнарга адырлып хосталырын чарлазын дээш;

² Дээрги-Чаяакчының өршээлиниң чылы база Бурганывыстың өжээн негээр хүнү келгенин медээлеп, качыгдаан бүгү улусту аргалазын дээш;

³ Сион дээш качыгдаан улусче сагыш салып, оларга хүл орнунга каас оваадайны, качыгдал орнунга – чаагай чыттыг үстү, муңгагдаан сагыш орнунга – макталдың хевин берзин дээш чоруткан. Улус Бурганның чонунуң дугайында «Олар Дээрги-Чаяакчы Боду олурткан быжыг дөстүг ыяштар дег; олар чөптүг боорга, Дээрги-Чаяакчы оларны дамчыштыр алдаржып турар» деп чугаалажыр.

⁴ Олар эрте-бурунгу бузундулар орнунга хоорайларны катап тудар, шаг шаанда хоозураан хоорайларны катап тургузар, эрткен салгалдар үезинден бээр хоозурап калган чыткан, үрелип бузулган хоорайларны чаартып тудар.

⁵ Даштыкы улус силерниң мал-маганыңарны кадарар, өскээртен келген улус силерниң чериңерге тараачыннар болгаш виноград ажаакчылары бооп ажылдаар.

⁶ А силер Дээрги-Чаяакчының бараалгакчылары деп адаттырар силер, Бурганывыска бараан болган улус деп силерни адаар. Өске чоннарның байлаа силерге ажык-кончаа бээр, оларның алдар-ады силерже шилчип кээр.

⁷ Эрткен үеде бак атка киргениңер дээш, ийи дакпыр шаңнал алыр силер. Дорамчылалды көрүп эрткеш, боттарыңарның чериңер дээш өөрүп-байырлаар силер, боттарыңарның чуртуңарга ийи дакпыр хувааглыг чер алыр силер, мөңге өөрүшкү силерни манап турар.

⁸ «Чүге дээрге Мен, Дээрги-Чаяакчы, чөптүг чорукка ынак мен, үптээшкинге база дерзии чорукка хөңнүм чок. Мен чонумну ак сеткилдии-биле шаңнаар мен, олар-биле мөңге керээ чарар мен.

⁹ Оларның үре-салгалы чоннар аразынга ат-сураглыг болур, оларның салгакчылары аймактар аразынга алдаржыыр. Ол чонну көрген бүгү улус Дээрги-Чаяакчы оларга ачы-буян хайырлаан дээрзин билип алыр».

¹⁰ Дээрги-Чаяакчы дээш аажок өөрүп тур мен, Бурганым дээш сеткилим байырлап тур, чүге дээрге Ол меңээ камгалалды хеп дег база агартыышкынны тон дег кедирип каан – ол хептер душтук оол биле душтук кыстың каасталгалары дег кайгамчык чараш.

¹¹ Чер – бодунуң өзүмнерин, сесерлик – тараан үрезиннерни өстүрүп үндүрери дег, Дээрги-Бурган-Чаяакчы агартыышкын биле макталды бүгү чоннар мурнунга өстүрүп үндүрер.