Исайя 60 - Ыдыктыг Библия

Иерусалимниң келир үедеги алдары

¹ «Көдүрлүп кел, чыры, чүге дээрге сээң чырыың кыва берген, өндүр-чаагай Дээрги-Чаяакчы сээң кырыңда чайынналып тур!

² Чер-делегейни караңгы шыва ап, өске чоннарны дүмбей хөме ап турар, а сээң кырыңда Дээрги-Чаяакчы көстүп келген, Ооң өндүр чырыы сээң кырыңда чырып үнүп келген.

³ Сээң чырыыңче чоннар чыглыр, хааннар сээң чырыткылыг хаяаңче чедип кээр.

⁴ Долгандыр топтап көрем: олар шупту чыглып, сенче кел чыдыр. Сээң оолдарың ырактан сээң кыстарыңны холунда көдүрүп алган ээп кээр.

⁵ Ынчан сен ол бүгүнү көргеш, өөрүп-байырлаар сен, чүрээң хөлзеп, тиккиледир согар, чүге дээрге сеңээ далай ындындан эртине-байлакты эккеп бээр, чоннарның байлаан сеңээ чедире бээр.

⁶ Сээң чериңни эңдерик тевелер, мадиан болгаш эфа аймактарның бодаганнары шыва аптар. Шеваның бүгү чурттакчылары сеңээ келгеш, алдынын, чаагай чыттыг чүүлдерин эккеп бээр база Дээрги-Чаяакчыны алгап-мактаар.

⁷ Кедар аймактың бүгү сүрүг малын сеңээ бөлүп бээр, навайот черниң кошкарлары сеңээ бараан болур: олар Мээң өргүл салыр бедигээжимге Меңээ тааржыр өргүл болур. Мен Бодумнуң алдарлыг өргээмни алдаржыдар мен!

⁸ Бо кымнарыл? Олар дээрге булуттар ышкаш ужуп чоруур, көге-бугалар ышкаш, уяларынче ужуп бар чыдар улус-тур.

⁹ Ырак ортулуктарның чурттакчылары Меңээ идегеп турар, бир дугаарында Фарсистен корабльдар эжиндирип кел чыдыр, олар ырактан сээң ажы-төлүңнү, оларның алдын-мөңгүнүн сөөртүп эккел чыдыр. Олар Дээрги-Чаяакчы Бурганың дээш, Израильдиң ыдыктыг Бурганы дээш чедип кээр, чүге дээрге Ол сени алдаржыдар-дыр.

¹⁰ Даштыкы улус сээң ханаларыңны катап тудар, оларның хааннары сеңээ бараан болур. Килеңнээш, сени чылча шаап-даа кагзымза, ээ көрүнгеш, сени кээргеп тур мен.

¹¹ Сээң эжик-хаалгаң кезээде ажык турар, чоннарның эртине-байлаан, оларның хааннарын сеңээ эккелзин дээш, хаалгаңны дүне-даа, хүндүс-даа дүкчүп-хагбас.

¹² Сеңээ бараан боорун күзевээн чон азы күрүне узуткаттырар, ындыг чоннарның чер-чурту бүрүнү-биле ээнзиреп каар.

¹³ Ливан дагларының каас-чаражы сээңии апаар: шиви, чойган, пөш болгаш хады! Мээң ыдыктыг черимни олар каастаар; Бодумнуң будум салыр черимни алдаржыдар мен.

¹⁴ Сени дарлап турган улустуң үре-салгалы сээң мурнуңга дис кырынга мөгеер, сени бак көрүп турган бүгү улус буттарыңче сөгүрүп кээп дүжер; сени Дээрги-Чаяакчының хоорайы деп, Израильдиң ыдыктыг Бурганының Сион хоорайы деп адаар.

¹⁵ Улус сени каапкан, көөр хөңнү чок турду, олар шупту сени оюп эртип турду. Ам Мен сени кезээ мөңгеде өндүр-чаагай кылып каар мен, улус сен дээш салгалдан салгал дамчып өөрүүр.

¹⁶ Сен бүгү чоннарның сүдүн ижер сен, хааннар сени эмзирип азыраар. Мени Дээрги-Чаяакчы, сээң Камгалакчың, Хостакчың болгаш Иаковтуң күштүг Бурганы деп билип аар сен.

¹⁷ Чес орнунга Мен сеңээ алдын эккеп бээр мен, демир орнунга – мөңгүн, ыяш орнунга – хүлер, даш орнунга – демир эккеп бээр мен. Амыр-тайбыңны сээң башкарыкчың, чөптүг чорукту – чагырыкчың кылып каар мен.

¹⁸ Ам сээң чериңге күчүлел дугайында, сээң чуртуң девискээринге – хоозурал болгаш өлүм-чидим дугайында дыңналбас апаар. Бодуңнуң ханаларыңны Камгалал деп, хаалгаңны Мактал деп адап аар сен.

¹⁹ Ам сеңээ хүндүс хүн херели херек чок, дүне – ай чырыы херек чок; Дээрги-Чаяакчы Боду сеңээ мөңге чырык апаар, Бурганың сээң чайынналчак чырыың апаар.

²⁰ Сээң хүнүң ам ашпас, сээң айың ам эргижиреп читпес – Дээрги-Чаяакчы сеңээ мөңге чырык апаар, сээң качыгдалың хүннери төнер.

²¹ Сээң чонуң бүрүнү-биле чөптүг-шынныг улус апаар, чер-чуртту кезээ мөңгеде ээлеп чурттаар. Олар – Мээң олуртуп кааным өзүм-дүр, Мээң холумнуң Бодумну алдаржыдар чаяалгазы-дыр.

²² Оларның эң бичезинден муң кижи укталыр, эң чөгенчиинден – эңдерик чон укталыр. Мен, Дээрги-Чаяакчы, үези кээрге, ону боттандырарынче далажыр мен».