Исайя 6 - Ыдыктыг Библия

Бурганның өргээзинге көстүүшкүн

¹ Озия хаанның мөчээн чылында өрү көдүрүлген бедик дүжүлгеде саадаан Дээргини көрген мен. Ооң хевиниң эдектери Бурганның өргээзин бүргей ап турган.

² Ону долгандыр серафимнер турду. Серафим бүрүзү алды чалгынныг: олар ийи чалгыны-биле арнын дуглаар, өске ийизи-биле буттарын шывар, арткан ийизи-биле ужар болду.

³ Олар бот-боттарынга: «Аг-шериглиг Дээрги-Чаяакчы ыдык, ыдык, ыдык! Бүгү чер-делегейни Ооң алдары бүргээн!» – деп ыыткыр чугаалап турду.

⁴ Оларның алгырган үнүнден хаалгаларның үндезиннери божаңайнып, Бурганның өргээзин ыш бүргеп алды.

⁵ «Ат болдум! – дидим. – Арыг эвес аас-сөстүг боорда, арыг эвес аас-сөстүг чон аразында чурттап турар кижи-дир мен. А ам Хаанны, Аг-шериглиг Дээрги-Чаяакчыны караам-биле көрдүм! Өлдүм-не!»

⁶ Ынчан серафимнерниң бирээзи менче ужуп келди, ооң холунда өргүл салыр бедигээштен кыскаш-биле кыстырып алганы оттуг кезек бар болду.

⁷ Ол оозун мээң аксымга дээскеш: «Көрдүң бе, бо оттуг кезек аксыңга деггеш, кем-бурууңну чайлатты, бачыдың ам арыглаттына берген» – деп чугаалады.

⁸ Ооң соонда мен Дээргиниң: «Кымны айбылап чорудайн? Бистиң өмүнээвистен кым баарыл?» – дээн үнүн дыңнап кагдым. «Мен! Мени айбылап чорудуп көрем!» – дидим.

⁹ Ол ынчан мынча дээн: «Барып, бо чонга: „Дыңнааш-даа, угаап билбес-тир силер, көргеш-даа, билип албас-тыр силер“ – деп чугаала.

¹⁰ Бо чоннуң чүрээ дашталып калган, кулаан кумнап, караан хаптап алган – оон башка олар караа-биле көрүп, кулаа-биле дыңнап, чүрээ-биле угаап билиптер турган ийик; оон башка олар Менче эглип кээп, экирий бээр турган ийик».

¹¹ Мен ынчан: «Кажанга чедир ындыг болурул, Дээрги?» – деп айтырдым. Ол меңээ: «Хоорайлар ээнзиреп, чурттакчы чок арткыжеге чедир, бажыңнар октаттына бергижеге, шөлдер ээнзиреп, хоозурап калгыжеге чедир;

¹² Дээрги-Чаяакчы бүгү улусту үндүр сывырыптарга, бо чер шуут кагдына бергижеге чедир – деп харыылаан. –

¹³ Чуртка чоннуң чүгле оннуң бир кезээ-даа артып каар болза, ол артынчыны база катап хоозурадыр! Ынчалза-даа быжыг ыяштарны кезип кааптарга, дазылы артып каары дег, ыдыктыг чон база дазылдыг болур».