Исайя 59 - Ыдыктыг Библия

Бачыттың Бурган биле чонну аңгылааны

¹ Дээрги-Чаяакчының холу чолдая бербээн, ол камгалап шыдаар, Ооң кулаа кадый бербээн – дыңнап турар.

² Ынчалза-даа кем-бурууңар силерни Бурганыңардан аңгылады, бачыттарыңар дээш, Ол силерден хая көрнү берип, силерни дыңнавайн тур.

³ Силерниң холуңар ханга борашкан, салааларыңар бачытка борашкан, аксыңар меге чүве чугаалаар, дылыңар бак чүве чулчуруур-дур.

⁴ Кым-даа шииткел черинге чөптүг чорукче кыйгырбайн турар, кым-даа шынныы-биле чаргылдашпайн турар: улус хоозун барымдааларга ынанып, меге чүве чугаалап, хай-бачыт ботталдырып, бузут-бак төрүп турар.

⁵ Олар чуургаларын чазылгыже баскан чыланнар дег, дузаан аргаан ээремчиктер дег – ол чуургаларны чипкен кижи өлүп каар, а бир эвес чуура базыпкан болза – шагар чылан союп үнүп кээр.

⁶ Оларның ээремчииниң дузаандан хеп аргыттынмас, олар кылып алган чүвези-биле бодун шып шыдавас. Оларның ажыл-херектери – кем-буруулуг, оларның холдары күчүлел кылып турар.

⁷ Оларның буттары бузут үүлгедир дээнде – дүрген, буруу чок кижиниң ханын төгер дээнде – далаш; оларның сагыжы кара, оларның эрткен оруктарынга хоозурал биле өлүм-чидим артып каар.

⁸ Олар тайбың деп чүве билбес, оларның оруктарында чөптүг чорук чок; оларның оруу ыргак-дагыр, олап чоруп турар бүгү улус амыр-тайбың билбес.

⁹ Ынчангаш шын шииткел бистен ырак-тыр, чөптүг чорук биске четпээн-дир. Чырып кээрин манап турдувус, ынчалза-даа кайда-даа дүмбей караңгы-дыр, чырыкты манап турдувус, ынчалза-даа караңгыда улчуп чор бис.

¹⁰ Согурлар дег, хана суйбап чоруп тур бис, караа көрбес улус дег, суйбаттынып, орук дилеп чор бис. Дүъште, имиртиңде дег, илдигер-дир бис, кадык-шыырак улус аразында өлүглер дег-дир бис.

¹¹ Бис шупту адыглар дег алгырар-дыр бис, көге-бугалар дег човууртаар-дыр бис. Чөптүг шииткелди манап турдувус, а ол чок-тур, камгалалды манап турдувус – а ол бистен ырак-тыр.

¹² Чүге дээрге Сээң мурнуңга кем-буруувус хөй санныг, бачыттарывыс бисти сойгалап турар. Кем-буруувус үргүлчү бис-биле кады, бузудувусту билир бис –

¹³ Дээрги-Чаяакчыга өскерлип, Ооң мурнунга үймээн үндүрүп турдувус, Бурганывысты эдереринден ойталадывыс, дарлаашкын биле тура халыышкын кылып, меге чүве бодап ап база чугаалап турдувус.

¹⁴ Шын шииткел үндүр кыстырткан, чөптүг чорук ыракта турар. Алыс шын төп шөлде тептиге берген, шынчы чорук чедип кээп шыдавас.

¹⁵ Алыс шын бисте чок-тур, бузуттан чайлай берген кижи үптеттирип аар-дыр. Дээрги-Чаяакчы чөптүг чорук чогун көрүп кааш, таарзынмайн барган.

¹⁶ Ол көөрге, ындыг байдалды өскертир дээн кым-даа чок боорга, кайгап-харай берген. Ындыг болганда, Ооң Бодунуң күчү-күжү Аңаа тиилелгени шаңнаар, Ооң чөптүг чоруу Аңаа деткимче болур.

¹⁷ Ол чөптүг-шынныг чорукту, куяк хеп дег, кедип алыр, бажынга камгалалдың куяк бөргүн кедип алыр; Ол өжээн негээшкининиң хевин кедип, хорадаан сагыжы-биле, тон-биле дег, шугланып алыр.

¹⁸ Улустуң ажыл-херектерин ёзугаар Ол кеземче онаар: дайзыннарынче Ооң килеңи халдаар, өжээтеннерин Ооң өжээн негээшкини манап турар, ырак ортулуктарның чурттакчыларынга Ол чогуур кеземче онаар!

¹⁹ Барыын чүкте улус Дээрги-Чаяакчының адындан коргар, чөөн чүкте улус алдарлыг Ону хүндүлээр. Бир эвес дайзын хем дег хөме кээр болза, Дээрги-Чаяакчының тыныжы ону сывырып чорудуптар.

²⁰ «Сионга, бачыдын билинген Иаковтуң салгалынга Камгалакчы чедип кээр – деп, Дээрги-Чаяакчы медеглээн. –

²¹ Мээң силер-биле чарар чагыг-керээм бо-дур – деп, Дээрги-Чаяакчы чугаалаан. – Мээң Сүлдем кезээде силерниң араңарга турар; силерни чугаалаар кылып кааным Мээң сөстерим амдыгааштан эгелээш, кезээ мөңгеде аксыңардан черле дүшпезин, силерниң ажы-төлүңерниң, оларның үре-салгалының аксындан база дүшпезин!» Дээрги-Чаяакчының чугаалаан чүвези ол-дур.