Исайя 56 - Ыдыктыг Библия

Бүгү улус Дээрги-Чаяакчыга каттыжып ап болур

¹ Дээрги-Чаяакчы: «Чөптүг болуңар, шынныг чүведен кылыңар! Мээң камгалалым удавайн чедип кээр, Мээң чорутканым агартыышкын удавайн ажыттынар.

² Амыр-дыш хүнүн сагыңар, ону бужартатпаңар база бузут үүлгетпес дээш, холуңар тыртып чоруңар. Ынчаар кылып чоруур кижи, ол бүгүнү шыңгыы сагып чоруур кижи амытан амыр-чыргалдыг болур» – дээн.

³ Дээрги-Чаяакчыга каттыжып келген даштыкы кижи: «Дээрги-Чаяакчы мени Бодунуң чонундан шуут аңгылап кааптар» – дивезин. База акталаткан кижи: «Мен кургап калган ыяш мен» – дивезин.

⁴ Чүге дээрге Дээрги-Чаяакчы мынча дээн: «Меңээ тураскааткан амыр-дыш хүннерин сагып чоруур, Меңээ тааржыр чүүлдү шилип алыр, Мээң чагыымны ыяк күүседир акталаткан кижилерге

⁵ Мен Бодумнуң өргээмге, ооң ханаларының иштинге алдар-атты, турар черни бээр мен, ол болза оолдуг-кыстыг боорундан-даа эки болур; демги кижилерге чиде бербес мөңге ат-алдарны хайырлаар мен.

⁶ Бир эвес Дээрги-Чаяакчыга каттыжып келген даштыкы улус Мээң чалчаларым апарган, Меңээ бараан бооп чоруур, Мээң адымга ынак, амыр-дыш хүнүн сагып чоруур, ону бужартатпас болгаш Мээң чагыымны күүседип турар болза,

⁷ Мен оларны Бодумнуң ыдыктыг даамче эккеп, Менче ыткан мөргүлдер өргээзинге оларга өөрүшкүнү хайырлаар мен. Меңээ өргүл салыр бедигээшке оларның бүрүн өрттедир болгаш өске-даа өргүлдери Меңээ таарымчалыг болур. Мээң өргээм бүгү чоннарның мөргүл өргээзи деп адаттырар».

⁸ Бодунуң черинден үндүр сывыртаткан израиль чонну чыып турар Дээрги-Бурган-Чаяакчы: «Мында чыып каан улуска немей, Мен бээр өскелерни-даа чыып эккээр мен» – деп медеглээн.

Бузуттуг улусту буруудатканы

⁹ Черлик аң-мең, бээр келгеш, дойлап чиңер, эзим-арганың аң-меңи, бээр келиңер!

¹⁰ Мында доскуулчулар – согур, угаан чок, олар шупту – үнү чок, ээрип шыдавас ыттар-дыр. Шөлээн удумзурап чыдар, удуурунга аажок ынак болгайлар.

¹¹ Тодар деп чүве билбес, чазый ыттар-дыр. Олар – сарыыл чок чагырыкчылар-дыр, кайызы-даа бодунуң ажыын хараар-дыр.

¹² «Бээр келиңер – деп турлар, – арагадан кудуп берейн, эзиртир ижээли! Даартагы хүннү база бөгүнгү хүн дег эрттирээли, мага хандыр хөглеп аалы!»