Исайя 53 - Ыдыктыг Библия

¹ Бистен дыңнаан медээзинге кым бүзүрээнил, Дээрги-Чаяакчының күчү-күжү кымга ажыттынганыл?

² Дээрги-Чаяакчының чалчазы Ооң мурнунга өзүм ышкаш, кургаг черден үнген дазыл ышкаш өзүп үнүп келген. Ол чараш-каас-даа, өндүр-чаагай-даа эвес болган – бис олче көрүнмээн-даа бис, ооң хевир-дүрзүзүнде бисти хандыкшыдар хире чүү-даа чок болган.

³ Ону улус хүлээп албаан, бак көрген, ол болза хилинчекти билген, човалаңга таварышкан кижи болган. Ындыг кижини улус өскелээр – бис ону бак көрүп, чүү деп-даа санавайн турган бис.

⁴ Харын ол бистиң човалаңывысты боду чүктеп, бистиң хилинчээвисти бодунуу кылдыр ап алды. А бис ооң кеземче, ялазын болгаш базындырганын көргеш, ол бүгү Бургандан келген деп бодаан бис.

⁵ Ол бистиң бачыттарывыс дээш өттүр шаштырган, бистиң кем-буруувус дээш бастыртып алган; аңаа онаашкан кеземче биске амыр-тайбыңны эккелген, ооң балыгларының ачызында экирээн бис.

⁶ Бис шупту хойлар ышкаш азып, кижи бүрүзү бодунуң оруу-биле тоо быдарай берген турган бис, а Дээрги-Чаяакчы ону бистиң шуптувустуң бачыттарывыс дээш кезеткен.

⁷ Ол эттедип-соктуруп, дорамчылаткан, ынчалза-даа чүве ыыттаваан, дөгерери-биле аппар чыдар дөтпе-хураган дег, дүгүн кыргыыр дээн хойнуң үн үндүрбези дег, ол аксын ажытпаан.

⁸ Ону тудуп хоругдааш, шиидип каан. Ооң үре-салгалының дугайында кым чугаалап шыдаарыл? Дириглер оранынга ону амылыг арттырбаан, мээң чонумнуң кем-буруузу дээш ол ялалаткан.

⁹ Ол кемниг херек үүлгетпээн-даа болза, ооң аксы-сөзүнде меге чүве чок-даа болза, ону бузуттуглар-биле кады ажаап каан. Ооң чевег-кую бай кижинии-биле кожаланчак болган.

¹⁰ Дээрги-Чаяакчының күзел-соруун ёзугаар ону човалаңче чыгап, хилинчекке таварыштырган. Бурган ооң амы-тынын өргүл кылып каан болгаш, ол бодунуң үре-салгалын көөр, назы-харын узадып аар база Дээрги-Чаяакчының күзел-соруун чедиишкинниг күүседир.

¹¹ Ол сагыш-сеткили шагзырадыр ажылдаан соонда, чырыкты көрүп каар, билип алган чүвези дээш сеткили ханар. «Мээң чөптүг-шынныг чалчам хөй улусту агартып, оларның бачыттарын боду чүктээр.

¹² Ынчангаш Мен аңаа өндүр улуглар аразынга үлүг бээр мен, ол күштүглер-биле олча-тывыш үлежир. Чүге дээрге ол бодун өлүмге боду хүлээдип, кем-херек үүлгедикчизи деп санаттырган болгаш, хөй улустуң бачыдын боду чүктеп, кем-херек үүлгедикчилери дээш ээрежип дилээн-дир».