Исайя 52 - Ыдыктыг Библия

Амыр-тайбың дугайында буянныг медээлер

¹ Оттуп кел, о Сион, оттуп кел, күчү-күш кирип ал! Иерусалим, ыдыктыг хоорай, каас-коя хевиң кедип ал! Моон соңгаар чаңгыс-даа кыртыжадып демдектетпээн кижи база арыг эвес кижи сенче кирбес.

² Довурааң кактап каапкаш, көдүрлүп кел, туттуруп алган Иерусалим! Илчирбелерни мойнуңдан уштуп каавыт, туттуруп алган Сион-кыс!

³ Дээрги-Чаяакчы: «Силерни төлевир албайн берипкен, ынчангаш акша-мөңгүн төлевейн хостаар» – дээн.

⁴ Оон Дээрги-Бурган-Чаяакчы мынча дээн: «Баштай Мээң чонум хары черге чурттаар дээш Египетче чорупкан. Ооң соонда Ассирия ону көңгүс хей черге кызып-кыйып турган.

⁵ А Мен ам чүнү канчаайн? – деп, Дээрги-Чаяакчы медеглээн. – Мээң чонумну төлевир бербейн тудуп алгаш барган, ооң чагырыкчылары ыглап-сыктап турар – деп, Дээрги-Чаяакчы медеглээн. – Мээң адым үргүлчү, хүннүң-не бак сөглеттирип турар!

⁶ Ынчангаш Мээң чонум Мээң адымны билип алыр; оларга „Бо – Мен мен!“ деп чугаалап турган Бурган – Мен дээрзин, үези кээрге, билип алырлар».

⁷ Даглар кезий буянныг медээ чедирип, амыр-тайбыңны, камгалалды медеглеп, ачылыг медээлер дамчыдып чоруп турар кижиниң, Сионга: «Сээң Бурганың хааннап турар!» – деп турар кижиниң базымнарының даажы кайгамчык-тыр.

⁸ Сээң доскуулчуларыңның үннери дыңналып тур. Олар шупту өөрүшкүлүг алгыржы берди: Дээрги-Чаяакчының Сионче эглип келгенин караа-биле көрүп кааннар-дыр.

⁹ Иерусалимниң бузундулары, шупту кады ырлажып, өөрүп-байырлаңар, чүге дээрге Дээрги-Чаяакчы Бодунуң чонун аргалап, Иерусалимни хостаар-дыр!

¹⁰ Дээрги-Чаяакчы бүгү чоннар көрүп турда, Бодунуң ыдыктыг күчү-күжүн көргүзер – чер-делегейниң бүгү ужу-кыдыы бистиң Бурганывыстың камгалалды канчаар хайырлаарын көрүп каар.

¹¹ Чоруңар, чоруңар, Вавилондан үнүп чоруңар! Арыг эвес чүүлге дегбеңер! Оон үне бериңер, Дээрги-Чаяакчының өргээзиниң саваларын ап чоруур улус, арыг болуңар!

¹² Ынчалза-даа далаш чок үнер, дезип маңнавас силер: Дээрги-Чаяакчы силерниң мурнуңарга чоруур, Израильдиң Бурганы силерни сооңардан үдеп, камгалаар.

Бурганның чалчазының хилинчээ болгаш тиилелгези

¹³ «Мээң чалчам чедиишкинниг болур, ол өрү көдүрлүп, өндүр бедик болур!

¹⁴ Ооң арны үрелип, дүрзү-хевири баксырааш, кижи-биле дөмейлешпес апарганда, ооң хевир-шырайы кижи амытанныы дег эвес апарганда, ону көрген хөй улус кайгап-харап турган.

¹⁵ Ол шак-ла ынчаар хөй чоннарны ам кайгадыр, хааннар безин ооң мурнунга аксын хаап аар. Чүге дээрге олар кымның-даа оларга медеглел кылбаан чүвезин көрүп каар, дыңнап көрбээн чүвезин билип аар».