Исайя 50 - Ыдыктыг Библия

¹ Дээрги-Чаяакчы мынча дээн: «Мен силерниң иеңерге чарлыышкын чагаазы бижип бергеш, үндүр сывырыпкан мен бе? Мен силерни, өрем төлээр дээш, садыпкан мен бе? Чок, боттарыңарның-на бачыттарыңар дээш силерни садыпкан, боттарыңарның-на кем-бурууңар дээш иеңерни үндүр сывырыпкан!

² Мен силерге чедип кээримге, чүге кым-даа чогул? Мен кыйгырарымга, чүге кым-даа харыылавазыл? Таанда-ла Мээң холум чолдайып, силерни хостап шыдавас апарган мен бе? Азы Мээң күжүм четпестеп, силерни камгалап шыдавас бе? Чаңгыс чемелеп алгыргаш-ла, далайны кургадып, хемнер аккан черни ээн кургаг хову кылып шыдаар Бурган мен; балыктар суксаанындан өлүп, суг чогундан ирип турар апаар.

³ Мен дээрни дүмбей караңгы-биле бүргеп турар мен, ол качыгдал хеви-биле шыптынган дег көстүр».

Бурганның чалчазының дыңнангыры

⁴ Дээрги-Бурган-Чаяакчы меңээ чечен-мерген чугааны берген, ынчангаш шаа төнген кижини сөс-биле деткип билир мен. Эртенниң-не Ол мээң кулаамны, өөреникчилер дег дыңназын дээш, дыңнаарынче албадап турар.

⁵ Дээрги-Бурган-Чаяакчы сөзүн мээң кулаамга чедирерге, удурланмаан мен, аткаар баспаан мен.

⁶ Мен ооргамны соп турар улуска, чаагымны – салымны чула тырткан улуска дөгеп берген мен; дорамчылалдан, дүкпүден арным чажырбаан мен.

⁷ Дээрги-Бурган-Чаяакчы меңээ дузалап турар, ынчангаш бак атка кирбес мен. Ынчангаш арнымны кадыг даш дег кылып алдым, адым баксыравазын билир мен.

⁸ Мээң Агартыкчым чоокшулап келди! Кым меңээ удурланырын диттип тур? Шииткел черинге кады туруптаалы! Кым мээң-биле чаргылдажыр деп тур? Чанымга чедип келзин!

⁹ Дээрги-Бурган-Чаяакчы меңээ дузалап турар. Кым мени буруудадып шыдаарыл? Олар шупту үзүт-ховаганга чирткен хеп дег чиде бээр.

¹⁰ Силерниң араңарда кым Дээрги-Чаяакчыдан корткаш, Ооң чалчазын тооп дыңнап турарыл? Дүмбей караңгыда чоруп турар, чырыы чок кижи Дээрги-Чаяакчының адынга идегезин, бодунуң Бурганынга ынанзын.

¹¹ А от кыпсып, чалбыыштыг согуннар белеткеп турар улус – силер шупту кыпсып алган согуннарыңар тудуп алгаш, одуңарның чырыынче чоруңар! Бурганның холунуң силер-биле кылыр чүвези бо-дур: хилинчек көрүп өлүр силер!