Исайя 48 - Ыдыктыг Библия

Бурган шупту чүвени баш бурунгаар билир

^1-2 «Дыңнаңар, Иаковтуң салгалы, Израильдиң ады-биле адаттырган, Иудеядан келген улус! Дээрги-Чаяакчының ады-биле даңгыраглаар силер, Израильдиң Бурганын алгап-мактаар силер. Боттарыңарга хамаарыштыр „Ыдыктыг хоорайның чурттакчылары бис“ база „Аг-шериглиг Дээрги-Чаяакчы деп аттыг Израильдиң Бурганынга идегээр бис“ дээр силер, ынчалза-даа Бурганга шынчы чоруктан, чөптүг-шынныг чоруктан ырак силер.

³ Мен болган чүвени баш бурунгаар чугааладым, Мээң аксы-дылым ону чарлаан, Мен ону медеглээн мен, оон хенертен бүгү чүве боттаны бээр кылып каан мен.

⁴ Силерниң чөрүүңерни – мойнуңарның сиирлери демирден, хавааңар хүлерден бүткенин билир турган мен.

⁵ Ынчангаш Мен силерге баш бурунгаар, бүгү чүве боттаныр бетинде, чугаалап каан мен, ооң соонда „Бистиң дүрзү-бурганывыс ынчаар кылган, бистиң бурганывыс, шуткумал дүрзүвүс ынчаар болур кылдыр дужааган“ – дивезиннер дээш, Мен силерге медеглеп каан мен.

⁶ Силер ол бүгү дугайында дыңнадыңар, ам көрүңер, бо ышкажыл! Таанда-ла силер ону хүлээп көрбес силер бе?! Амдан эгелээш, израиль чон, Мен сеңээ чаа чүве дугайында, чажыт, сеңээ билдинмес турган чүве дугайында, чугаалаар мен.

⁷ Ол чүүл эрте шагда эвес, ам чаа болуп турар-дыр, амдыгаа чедир сен ол дугайында дыңнап көрбээн сен, „Мен ону билир турдум“ деп шыдавас сен.

⁸ Ийе, сен дыңнаваан сен, билбес сен, сээң кулааң шаг шаандан бээр хааглыг турган. Кайы хире кара сагыштыыңны билир мен, төрүттүнгеш-ле, үймээнчи деп адаттырдың.

⁹ Бодумнуң адымны бодааш, Мен килеңимни амдыызында өйлеп көрейн, Бодумнуң алдарымны бодааш, туттунуп, сени узуткаваайн.

¹⁰ Көрем, Мен сени эзилдирип арыглап кагдым, ынчалза-даа мөңгүн ышкаш эвес кылдыр; сени хилинчек-човалаңның суугузунга шылгап көрдүм.

¹¹ Мен Бодум дээш, Бодумну бодааш, ону кылып тур мен, чүге дээрге Мээң адым канчап баксыраарыл? Мен Бодумнуң алдарымны кымга-даа бербес мен.

¹² Иаков, Мени дыңна, Мээң кыйгырып алганым Израиль, дыңна! Бурган – Мен мен! Мен – эгезинде турган мен, Мен – төнчүзүнде турар мен.

¹³ Мээң холум черни үндезилээн, дээрни база Мээң күштүг холум хере чаткан. Оларны кыйгырыптарымга, мурнумга кээп туруптарлар.

¹⁴ Бүгү улус, силер шупту чыглып келгеш, дыңнаңар! Дүрзү-бурганнарыңарның кайызы ону баш бурунгаар чугаалааныл? Дээрги-Чаяакчының ынак кижизи Ооң Вавилонга хамаарышкан күзел-соруун күүседир, бодунуң күчү-күжүн халдейлерге удур угландырар.

¹⁵ Мен, чүгле Мен ону медеглээн мен, ол кижини кыйгырган мен. Ону эккеп алдым, ол ам чедимчелиг болур.

¹⁶ Менче чоокшулап келгеш, мону дыңнаңар! Эң эгезинден-не Мен силерге ажыы-биле чугаалап келдим; ол бүгү болуп эгелээн үеде-ле Мен бар турдум». Ам Аг-шериглиг Дээрги-Бурган-Чаяакчы мени Бодунуң Сүлдези-биле айбылап чорудупту!

Израиль Вавилондан үнүп чоруй баар

¹⁷ Сээң Камгалакчың, Дээрги-Чаяакчы, Израильдиң ыдыктыг Бурганы мынча дээн: «Мен – Дээрги-Чаяакчы мен, сээң Бурганың мен, сеңээ ажыктыг болзун дээш сени сургап, сээң чоруур ужурлуг орууңче сени башкарып турар мен.

¹⁸ О, Мээң айтыышкыннарымны сен тооп дыңнаан болзуңза! Ынчан сээң чаагай чорууң хем ышкаш агар ийик, чедимче сени далай чалгыы дег хөме аптар ийик.

¹⁹ Сээң үре-салгалың элезин дег хөй боор ийик, ажы-төлүң быйыргын элезин дег эңдерик боор ийик! Оларның ады арлып читпейн, узуткаттынмайн, Мээң мурнумга артар ийик».

²⁰ Вавилондан чоруңар, халдей черден дүрген дезиңер! Бо медээни өөрүшкүлүг алгы-биле медээлеңер, ол дугайында чарлаңар, чер-делегейниң ужу-кыдыынга чедириңер: «Дээрги-Чаяакчы Бодунуң чалчазы Израильге хосталганы хайырлаан-дыр!»

²¹ Дээрги-Чаяакчы Бодунуң чонун ээн кургаг хову кежир эдертип бар чыдырда, олар кагып-суксаваан. Ол хаядан сугну оларга аксып берген: хаяны Ол оя кагарга, суг аттыгып үнген.

²² «А бузуттуг-бактарга чаагай чорук турбас!» – деп, Дээрги-Чаяакчы чугаалаан.