Исайя 47 - Ыдыктыг Библия

Турамык Вавилоннуң буурааны

¹ «Күжүр Вавилон-кыс, дүжүлгеден дүшкеш, довуракка олуруп ал, черге олуруп ал – дүжүлгең ам чок-тур. Халдей чон, сээң дугайыңда моон соңгаар „Хоюг-чымчаан, шевергин чаражын!“ дивес.

² Дээрбе даштары долгап, далгандан дээрбеле; баш шывар пөзүң уштуп каавыт, хевиң эдээн өрү тыртып, буттарың чанагаштааш, хемнерни сүзүп кеш.

³ Сээң шалдаңың ажыттынзын, бужарың көстүп келзин. Мен өжээн негээр мен – кымга-даа хайыра көргүспес мен».

⁴ Бистиң Камгалакчывыс – Израильдиң ыдыктыг Бурганы, Ооң ады – Аг-шериглиг Дээрги-Чаяакчы!

⁵ «Ыыт чок олур, дүмбей караңгыже чоруй бар, халдей чон; сени моон соңгаар „Күрүнелерниң чагырыкчызы“ деп адавас.

⁶ Мен Бодумнуң чонумга килеңней бердим, Бодумнуң өнчүмнүң адын бакка суп, сээң холуңга хүлээдип бердим. А сен оларга өршээл көргүспедиң, кырганнарга безин аар дөңгү кедирип кагдың.

⁷ Сен: „Кезээ мөңгеде чагырыкчы боор мен!“ – дидиң. А ол бүгүнүң сөөлү кандыг боорун эргий бодавадың.

⁸ А ам дыңнап көр, таалал сүрген, айыыл чок чурттап турар, „Мен кончуг мен, менден өске кым-даа чок. Дулгуяк апарбас мен, ажы-төлүм чидирбес мен!“ деп бодаар Вавилон-кыс!

⁹ Ол-даа, өске-даа айыыл сени таварыыр – хенертен, чаңгыс хүн дургузунда, ажы-төлүң-даа чидирер сен, дулгуяк-даа апаар сен. Хөй санныг караң көрнүүшкүн кылып турзуңза-даа, илби-шидилиг сөстериң аажок күштүг-даа болза, ол бүгүнү бүрүнү-биле көрүп эртер сен.

¹⁰ Сен коргуш чок бузут үүлгедип: „Мени кым-даа көрбейн турар“ – деп турдуң. Мерген угааның биле эртем-билииң сени орууңдан астыктыра бээрге, бодуңга: „Мен кончуг мен, менден өске кым-даа чок“ – деп турар-дыр сен.

¹¹ Айыыл-халап сени таварыыр – ооң кайыын кээрин билип шыдавас сен; хай-халап кырыңга кээр – ону чайладыр аайын тыппас сен, хенертен ооң дугайында безин бодавааның буураашкын сени таварыыр.

¹² Ам канчаар, аныяаңдан мергежээниң илби-шидилиг аргаларың ажыгла, караң көрнүрүң улам көвүдет. Бир-ле чүвени чедип аарың-даа чадавас, чамдык кижилерни коргудуптарың-даа чадавас.

¹³ Хөй санныг чөвүлелдер чыыр дээш, могай бердиң. Дээрни шинчилеп, сылдыстарны хайгаарап турар чурагачыларың база ай чаазында салым-чолуңну баш бурунгаар чугаалап бээр улузуң келгеш, болур ужурлуг чүведен сени камгалазын.

¹⁴ Олар тараа саваңы дег апаар, от оларны чиптер, чалбыыштан боттарын безин камгалап ап шыдавас улус-тур. А ол от чыннып аар хире көстерлиг-даа эвес, чанынга олуруп болгу дег-даа эвес.

¹⁵ Кады ажылдап турган, аныяаңдан-на садыглажып чораан улузуң ындыг апаар. Кайызы-даа бодунуң оруу-биле тарап чоруй баар, кым-даа сени камгалавас».