Исайя 44 - Ыдыктыг Библия

Дээрги-Чаяакчыдан өске Бурган чок

¹ «А ам – Мени дыңна, Мээң чалчам Иаков, Мээң шилип алганым Израиль!

² Сени чаяап каан, төрүттүнүп келгениңден бээр сеңээ дузалап турар Дээрги-Чаяакчы мынча деп тур: Мээң чалчам Иаков, Мээң шилип алганым Ешурун, сен кортпа.

³ Мен кагып-суксаан черже сугну, кургап калган черже – сугларны аксыр мен. Бодумнуң Сүлдем-биле сээң үре-салгалыңны, ачы-буяным-биле – ажы-төлүңнү бүргээр мен!

⁴ Олар оът-сиген аразынга, суг эриинде чыраа-тал дег, өзер.

⁵ Бир кижи: „Мен Дээрги-Чаяакчыга хамааржыр мен“ – дээр, өске кижи: „Мен база Иаковтан укталган мен“ – дээр. Улус боттарының холдарынга „Дээрги-Чаяакчыныы мен“ деп бижип аар болгаш Израиль деп адаттырар».

⁶ Дээрги-Чаяакчы, Израильдиң Хааны, ооң Камгалакчызы, Аг-шериглиг Дээрги-Чаяакчы мынча дээн: «Мен – эгезинде турган мен, Мен – төнчүзүнде турар мен; Менден өске Бурган чок.

⁷ Мээң-биле дөмейлежир кижи бар бе? Харыыдан берзин! Эрте-бурунгу чонну чаяап каан үемден бээр болган бүгү чүвени меңээ чугаалап берзин. Келир үеде болур чүвени база чаа-ла кел чыдар чүвени чугаалап берзин.

⁸ Мээң улузум, кортпаңар, сүрээдевеңер! Мен силерге эрте шагда-ла медеглевежик мен бе, баш бурунгаар чугаалаважык мен бе? Мээң херечилерим – силер болгай силер. Менден өске Бурган бар бе? Чок, өске кандыг-даа Хая билбес мен!»

Дүрзү-бурганга мөгеер чорук – мелегей будулуушкун

⁹ Дүрзү-бурганнар кылып турар бүгү улус чүү-даа эвес-тир, оларның аажок үнелээр дүрзүлери кандыг-даа ажык-дуза чок. Оларның ол херечилери чүнү-даа көрбес, чүнү-даа угаап билбес, ынчангаш бак атка кирер!

¹⁰ Кымнар кандыг-даа ажык-дуза чок бурганнар кылып, дүрзүлер шуткуп кудуп турарыл?

¹¹ Ол ажыл-херекке бердинген бүгү улус бак атка кирер. Ус-шевер улус дээрге чүгле кижилер-дир. Олар шупту чыглып келгеш, кады туруп алзын – дөгерези аажок коргарлар, бак атка кирерлер!

¹² Дарган кижи дүрзүнү хевирлээр херекселин туткаш, көс отчудуп, ажылдаар, маскалары-биле болбаазырадыр, бодунуң күштүг холу-биле дүрзүнү хевирлеп, иженир. Аштаанындан дарганның шаа төнер, суксаанындан чилчии үстүр.

¹³ Азы бызаңчы кижи дүрзүнү хемчээр хендирин шөер, шиш херексел-биле шыйып демдектээш, кескизи-биле чона кезип, төгериктей хемчээр. Ол бызаңчы дүрзүнү, ыдыктыг черже салыр дээш, кижиниң овур-хевирин ёзугаар, кижи ышкаш чараш-каас кылдыр кылып каар.

¹⁴ Азы ол кижи бодунга пөш, шиви азы дуб ыяш шилип алгаш, ону үезинге чедир арга-эзиминге арттырып каар; азы ол кижи хады олуртуп каарга, чаъс ону өстүрүп бээр. Оон ол кижи ыяштарны кезип алгаш,

¹⁵ оттулар чүүл кылып аар – ооң чартыын чынныр дээш ап алгаш, от салып, хлевин быжырар. А оон аңгыда бурган кылып алгаш, ооң мурнунга доңгая кээп дүжер – дүрзү чазап алгаш, аңаа мөгеер.

¹⁶ Ыяштың чартыын ол өрттеткеш, аъш-чем белеткеп, эът быжыргаш, тоттур чемненип аар. Ол чылыккаш: «Чылыга бердим, от чырып тур» – дээр.

¹⁷ А арткан ыяштан ол дүрзү-бурганны оя кезип аар; оон аңаа мөгейип, ооң мурнунга доңгая кээп дүшкеш: «Мени камгала, сен дээрге мээң бурганым болгай сен!» – деп мөргүүр.

¹⁸ Ындыг улус чүнү-даа билбес, чүнү-даа угаап шыдавас; олар дээрге карактарын шийдирип каан, көөр чүвези чок, угаанын дуглап каан улус-тур.

¹⁹ Оларның кайызы-даа боданмас, кайызы-даа чүвени шын билип алыр харыы-даа, угаан-сарыылы-даа чок болгаш, бодунга «Бо ыяштың чартык кезиин өрттеткеш, көзүнге хлеб быжырып, эът шиштеп чип алдым. А ооң артыындан чүдек-бужар дүрзү кылган херээм бар бе, токпар ыяшка мөгейген ажыым бар бе?» деп шыдавас.

²⁰ Ындыг кижи анаа хүлдү сүрүп турар, ооң угаан-сарыылы мегелеткен болгаш, ол будулуп турар. Ол бодунуң амы-тынын камгалап шыдавас, бодунга «Мээң холумда чүгле меге бар-дыр!» дивес.

²¹ «Иаков, ол бүгүнү утпа, чүге дээрге сен Мээң чалчам болгай сен, Израиль! Сени Мен чаяап каан мен, сен – Мээң чалчам сен, Мен сени утпас мен, Израиль.

²² Мен сээң кем-бурууңну туман дег, бачыттарыңны – булуттар дег тарадып каапкан мен. Сени садып хостап кагдым – Менче эглип кел!»

²³ Дээрлер, Дээрги-Чаяакчының кылган чүвези дээш, өөрүп-байырлаңар, черниң ханы дүптери, өөрүшкүлүг алгыржыңар, даглар, арга-эзим болгаш бүгү ыяштар, шимээргеп байырлаңар! Дээрги-Чаяакчы Иаковту садып хостаан-дыр, Израильди хостап кааш, алдаржаан-дыр!

Кир хаан – Бурганның чепсээ

²⁴ Сени ботталдырган Камгалакчың Дээрги-Чаяакчы мынча дээн: «Мен – Дээрги-Чаяакчы, бүгүдениң Чаяакчызы мен, дээрни чааскаан хере чаткан мен, черни чаңгыс Бодум чада салган мен.

²⁵ Меге медээчилерниң бадыткал демдектерин чүү-даа эвес кылып, төлгечилерни эпчок байдалга таварыштырып, мерген угаанныг деп санаттырар улустуң билиин утка чок чүве кылып турар мен.

²⁶ А Бодумнуң чалчамның медээлээн чүвезин бадыткап, Бодумнуң айбычыларымның чугаалаан чүвезин боттандырып турар мен. Иерусалимниң дугайында: „Аңаа улус база катап чурттай бээр“ – деп, Иудеяның хоорайларының дугайында: „Оларны катап тудар! Ол бузундуларны Мен катап тургузар мен!“ – деп турар мен.

²⁷ Ханы сугларга: „Када бериңер – Мен силерни соолдурар мен!“ – деп турар мен.

²⁸ Кир хаанның дугайында: „Ол – Мээң айбылап чоруткан кадарчым-дыр. Ол Мээң күзел-соруумну күүседип, Иерусалимниң дугайында: ‘Ону катап тудар!’ – деп, Бурганның өргээзиниң дугайында: ‘Ону катап база үндезилеп тудар!’ – деп чугаалаар мен“».