Исайя 43 - Ыдыктыг Библия

Дээрги-Чаяакчы – Израильдиң Камгалакчызы

¹ Иаковту чаяап каан, Израильди тывылдырып каан Дээрги-Чаяакчы ам мынча деп тур: «Кортпа. Мен сени садып хостап кагдым; Мен сээң адың адап, Бодумче кыйгырдым, сен – Мээңии сен.

² Суглар кежип туруңда, Мен сээң-биле боор мен, хемнер кежип туруңда, суг сени хөме албас. От өттүр эртип тургаш, өрттенмес сен, чалбыыш сени чивес.

³ Мен – Дээрги-Чаяакчы, сээң Бурганың, Израильдиң ыдыктыг Камгалакчызы-дыр мен. Сени хостаар дээш, Мен Египет, Эфиопия болгаш Севаны сээң орнуңга берип тур мен.

⁴ Сен Меңээ улуг үнелиг болгаш эргим болганыңда, сеңээ Мен ынак болганымда, сээң орнуңга өске улусту, сээң амы-тының дээш – өске чоннарны берип тур мен.

⁵ Кортпа, Мен сээң-биле болгай мен; сээң үре-салгалыңны чөөн чүктен эккээр мен, барыын чүктен база сени чыыр мен.

⁶ Соңгу чүкке: „Оларны дедир бер!“ – дээр мен, мурнуу чүкке: „Оларны салывыт! – дээр мен. – Мээң оолдарымны ырактан, Мээң кыстарымны – чер-делегейниң ужу-кыдыындан эдертип эккел –

⁷ Мээң адым-биле адаткан, Бодумга алдар кылдыр чаяап кааным, Мээң боттандырып, хевирлээним бүгү улусту эдертип эккел“».

⁸ Карактыг-даа болза, согур чонну, кулактыг-даа болза, дүлей улусту үндүрүп эккел.

⁹ Бүгү чоннар кады чыглып келзин, аймактар бөлдүнчүп келзин. Оларның кайызы ол бүгүнү баш бурунгаар чугаалааныл, болуп эрткен чүүлдер дугайында биске медээлээнил? Боттарының шынныын көргүзери-биле херечилелден кылзыннар; оларны дыңнаан улус «Шын-дыр оо!» деп бадытказын.

¹⁰ «А Мээң херечилерим – силер силер, чонум – деп, Дээрги-Чаяакчы медеглээн, – Мээң чалчаларым база силер силер; чүвени билип алгаш, Меңээ бүзүрезин дээш база Мени Бурган-дыр деп угаап билзин дээш, Мен силерни шилип алган мен. Менден аңгы Бурган чок, кажан-даа турбаан, кажан-даа турбас.

¹¹ Мен, чүгле Мен – Дээрги-Чаяакчы мен! Менден өске Камгалакчы чок!

¹² Өске кым-даа эвес, Мен баш бурунгаар чугаалап, медеглеп база камгалап каан мен! Мээң херечилерим – силер силер – деп, Дээрги-Чаяакчы медеглээн. – Мен – Бурган мен.

¹³ Шагдан бээр Мен ол-ла Бодум мен! Мээң холумдан улусту кым-даа адырып шыдавас. Мээң кылган чүвемни күш чок болдуруп шыдаар кижи бар бе?!»

¹⁴ Дээрги-Чаяакчы, силерниң Камгалакчыңар, Израильдиң ыдыктыг Бурганы: «Мен силер дээш Вавилонга удур Бодумнуң холумну сунар мен; халдейлерни чылча шаап, шуптузун дестириптер мен, оларның алгы-кышкызы корабльдарны дола бээр.

¹⁵ Мен – Дээрги-Чаяакчы, ыдыктыг Бурганыңар мен, Израильдиң Чаяакчызы, Хааныңар мен!» – дээн.

^16-17 Дээрги-Чаяакчы далай кежир орукту ажыткан, ханы сугларга орукту кылып каан, дайынчы тергелер биле аъттарны, аг-шериг биле күштүг дайынчыларны эдертип аппарган. Олар шупту кады кээп дүшкеш, туруп шыдавастаан, чырыткы өзээ ышкаш өжүп калган. Ам Дээрги-Чаяакчы мынча дээн:

¹⁸ «Биеэде болган чүвени уттуптуп, эрткен чүве дугайында бодавайн барып болур силер.

¹⁹ Көрүңер, Мен чаа чүвени кылып тур мен! Ол ам көстүп кээр – таанда-ла ону билип ап шыдавас силер бе? Бо удаада Мен ээн кургаг ховуда орук кылып, ээн черже хемнер аксып тур мен.

²⁰ Черлик аң-мең безин Мени алдаржыдар – шөө-бөрүлер, страус куштар. Чүге дээрге Мен Бодумнуң шилип алган чонумга ижиртир дээш, ээн кургаг ховуже суг, ээн черже – хемнер аксып тур мен.

²¹ Ол чонну Мен Бодумга, Мени алгап-мактазын дээш, чаяап алган мен.

²² А сен, Иаков, Мени кыйгырбайн турдуң, Израиль, сен Мени аартыктап турдуң.

²³ Сен Меңээ бүрүн өрттедир өргүл хойлары салбайн, Мени алдаржыткан өргүлдер кылбайн турдуң. Мен сени бергедетпедим – далган-тараа өргүлдери негеведим, сени шылатпадым – чаагай чыттыг чүүлдер айтырбадым.

²⁴ Сен Меңээ чаагай чыттыг кулузун садып бербээн сен, өргүл малдарының чаа-биле Мээң сеткилимни хандырбаан сен. Харын Менче бодуңнуң бачыттарың чүдүрүп, кем-бурууң-биле Мени шыладып турган сен.

²⁵ Мен, чүгле Мен, Бодумну бодааш, сээң кем-бурууңну балап каар мен; сээң бачыттарыңны оон ыңай сагынмас мен.

²⁶ Мени буруудат, чаргылдажыыл; бодуңнуң херээңни чугаалап, актыыңны шынзыт.

²⁷ Сээң баштайгы өгбең бачыт үүлгеткен, сээң эптештирикчилериң Менче тура халаан.

²⁸ Ынчангаш Мен ыдыктыг черде бараалгакчыларымны бужартаашкынче чыгадым, Иаковту бүрүнү-биле узуткаттырар кылдыр, Израильди – дорамчылаттырар кылдыр хүлээдип бердим».