Исайя 42 - Ыдыктыг Библия

Дээрги-Чаяакчының шилип алган чалчазы

¹ «Мээң шилип алган чалчам бо-дур, Мен ону быжыглап турар мен; сеткилимге кирер кижи ол-дур! Мен ону Бодумнуң Сүлдем-биле бүргээр мен – ол өске чоннарга чөптүг шииткел үндүрер.

² Ол алгырбас база кырышпас, дыңзыдыр чугаалавас, ооң үнү кудумчуларга дыңналбас.

³ Ол шала сынган хыыргыышты сыйбас, имистелген чырыткыны өжүрбес; ёзулуг чөптүг шииткелди үндүрер.

⁴ Черге шын шииткелди үндүрбээн шаанда, ол сыйылбас, өшпес; ырак ортулуктар ооң чагыг-суртаалын манап турар».

⁵ Дээрни чаяап, чада салган, черни ында төрүттүнген бүгү чүве-биле кады боттандырган, чер кырында кижилерге амы-тынны хайырлаан – ында шимчеп чоруп турар бүгү улусту тынгарган Дээрги-Бурган-Чаяакчы мынча дээн:

⁶ «Мен, Дээрги-Чаяакчы, чөптүг-шынныг чорук боттандырар дээш чалчам сени кыйгырган мен, сени холуңдан чедип аар мен, кадагалаар мен. Сени дамчыштыр улус-чон-биле керээ чарар мен база бүгү чоннарга чырык эккээр мен.

⁷ Согур улустуң карактарын ажыдар сен, хоругдаттырганнарны хоругдалдан үндүрер сен, дүмбей черде олурар улусту кара-бажыңдан хостаар сен!

⁸ Мен – Дээрги-Чаяакчы мен, Мээң адым ол-дур! Бодумнуң алдарымны өске кымга-даа бербес мен база Меңээ хамааржыр макталды дүрзү-бурганнар-биле үлешпес мен!

⁹ Баш бурунгаар чугаалаан чүүлдерим бүде берген, Мен ам чаа чүүлдерни медеглеп тур мен, ам-даа боттанмаан чүүл дугайында силерге чугаалап тур мен».

Дээрги-Чаяакчыны алгап-мактаан ыры

¹⁰ Дээрги-Чаяакчыга чаа ырдан ырлаңар, Ону чер-делегейниң ужу-кыдыындан алгап-мактаңар – далайжылар болгаш далайны долган бүгү дириг амытаннар, ортулуктар болгаш ында чурттап турар бүгү улус!

¹¹ Ээн кургаг хову болгаш ооң хоорайлары, кедар аймак чурттаан бүгү суурлар өөрүшкүлүг кыйгы салзын. Хая-даштыг черде чурттаан улус өөрүп-байырлап, даглар баштарындан алгырышсын!

¹² Дээрги-Чаяакчыны алдаржытсын, Ону ырак ортулуктарга алгап-мактазын!

¹³ Дээрги-Чаяакчы күчүлүг маадыр дег чедип кээр, дайынчы дег, килеңи кыптыгар, дайынчы кыйгы салып, алгырар, дайзыннарынга күжүн көргүзер:

¹⁴ «Дыка үр ыыттавайн келдим, шыпшыңны кадагалап, туттунуп келдим; а ам, божаан херээжен дег, алгырар мен, тыныжым бачыдап, агаарны харамдыгып тынар мен.

¹⁵ Тейлер, дагларны ээнзиредип, оларның хамык оът-сигенин кадырып каар мен, хемнерни кургаг ортулуктар кылдыр хуулдуруп, хөөлбектерни кургадып каар мен.

¹⁶ Мен согурларны оларның билбези оруктар-биле эдертир мен, оларга билдинмес турган оруктар-биле эдертир мен. Оларның мурнунга дүмбей караңгыны чырык кылдыр хуулдуруптар мен, ээр-дагыр оруктарны дорттап каар мен. Чонум дээш, ол бүгүнү кылыр мен, оон ойталавас мен.

¹⁷ А дүрзү-бурганнарга идегээр улус, шуткуп каан дүрзүлерге: „Силер – бистиң бурганнарывыс силер“ – дээр улус кончуг бак атка кирип, аткаарлаар».

Согур, дүлей израиль чон

¹⁸ «Дүлейлер, дыңнаңар, согурлар, көрүп көрүңер!

¹⁹ Мээң чалчам ышкаш согур кижи бар бе? Мээң айбылап чоруткан айбычым ышкаш дүлей кижи бар бе? Дээрги-Чаяакчыга бердинген чалча дег согур кижи бар бе?

²⁰ Сен хөйнү көрген сен, ынчалза-даа эскерген чүвең чок-тур; кулактарың дуглаглыг эвес, ынчалза-даа дыңнавас-тыр сен».

²¹ Дээрги-Чаяакчы чөптүг-шынныг болгаш, ыдыктыг хоойлуну алдаржыдып, алгап-мактаары Аңаа таарымчалыг болган.

²² А бо чон үптеттирип, когараан-дыр, оларның шуптузу оңгарларда суктурган азы кара-бажыңнарда чажыртынган. Олар дайзынга олча-тывыш апарган, оларны кым-даа адырып хоставаан; оларны тудуп аппарган, кым-даа оларга болчуп: «Оларны дедир эгит!» – дивээн.

²³ Силерниң кайыңар ынаар кулаан ээктирерил, кичээнгейге ап, моон-даа соңгаар дыңнаарыл?

²⁴ Кым Иаковту тудуп аппаар кылдыр, Израильди – үптээр кылдыр берипкенил? Аңаа удур бачыт үүлгеткенивис Дээрги-Чаяакчы-дыр! Израильчилер Ооң оруун истевейн, Ооң хоойлузун тооп дыңнавайн турган болгай.

²⁵ Ынчангаш Ол бисти кыптыккан килеңи-биле хөме ап, бисче кам-хайыра чок дайын ыткан! Шак ол дайын чалбыыштыг от бооп, бисти бүгү чүктен бүзээлеп алган, а бис ону ожаап билбээн бис; от бисти чиирге, таптыг угаап билбээн бис.