Исайя 40 - Ыдыктыг Библия

Израиль чонга аргалал сөстери

¹ «Мээң чонумну аргалаңар-ла, аргалаңар! – деп, Бурганыңар чугаалап тур. –

² Иерусалим-биле эрге-чассыг чугаалажыңар, ооң аар-берге албан-ажылы төнгенин, кем-буруузу дээш кеземчези четчир болганын аңаа медеглеңер; ол бодунуң бүгү бачыды дээш Дээрги-Чаяакчының холундан ийи дакпыр кеземче алган-дыр».

³ Бир-ле үн дыңналды: «Ээн кургаг ховуга Дээрги-Чаяакчыга оруктан белеткеңер! Бурганывыска делгем оруктан ховуга дорттап бериңер!

⁴ Бүгү ыйгылааш черлер оргу апарзын, бүгү даглар, тейлер чавызай берзин. Дески эвес чер дескилежи берзин, дөңнелчек черлер оргу апарзын.

⁵ Дээрги-Чаяакчының өндүр чырыы ажыттынып кээр, бүгү улус ону көрүп каар! Дээрги-Чаяакчы Боду ынча дээн болгай».

⁶ Үн: «Медегле!» – диди. Мен: «Чүнү медеглээр мен?» – деп айтырдым. «Бүгү улус оът-сигенге дөмей, оларның чараш-каазы шөлде чечектер дег.

⁷ Дээрги-Чаяакчының тыныжы үрерге, оът-сиген кургап каар, чечек оңа бээр. Шынап-ла, чон дээрге оът-сиген-дир.

⁸ Оът-сиген кадып каар, чечек тоглай бээр, а Бурганывыстың аазаан сөзү кезээ мөңгеде турар!»

⁹ Буянныг медээлиг медээчи Сион, бедик даг кырынче үне бер! Буянныг медээлиг медээчи Иерусалим, дыңзыдыр алгырып чугаала! Иудеяның хоорайларынга: «Бурганыңар бо-дур!» – деп коргуш чок дыңзыдыр медегле.

¹⁰ Көрүңер! Күчү-күштүг Дээрги-Бурган-Чаяакчы кел чыдыр. Чагырга Ооң холунда-дыр. Көрүңер, Ооң хайырлаар шаңналы Бодунда-дыр.

¹¹ Ол Бодунуң сүрүг малын, кадарчы кижи ышкаш, кадарып турар: хураганнарны холунга тудуп, кужактап алгаш, төрүүр хойларны сүрүп бар чыдар.

Дээрги-Чаяакчы деңнээр чүве чок кайгамчык

¹² Кым адыжы-биле далайның суун узуп хемчээгенил азы холу-биле дээрни хемчээгенил? Кым черниң бүгү довураан чүве хемчээр саваже сыңырганыл азы даглар, тейлерни деңзи таваанга салып, деңзилээнил?

¹³ Кым Дээрги-Чаяакчының угаанын билип ап, Аңаа арга-сүме берип шыдааныл?

¹⁴ Кымдан Ол сүме айтырганыл, кым Аңаа угаан киир тайылбыр берип, шын орукче киирер сургаал кылганыл? Кым Ону билигге өөредип, чүве билип аарының оруун Аңаа айытканыл?

¹⁵ Бүгү чоннар кочалда дамды дег, деңзи таваанда доозун ышкаш! Бурган далайның ортулуктарын безин, борбак элезин дег, чииги-биле көдүрүп турар.

¹⁶ Аңаа Ливанның эзим-аргазы өргүл салыр от кыпсыр шаа четпес, а ында турар дириг амытаннар – бүрүн өрттедир өргүл кылыр шаа четпес.

¹⁷ Бүгү чоннар Ооң мурнунга чүү-даа эвес, оларны Ол хоозун, чөгенчиг чүүл деп санаар.

¹⁸ Ынчангаш Бурганга кымны дөмейлештирер силер? Аңаа дөмейлепки дег кандыг чүүл тып шыдаар силер?

¹⁹ Дүрзү-бурган бе? А ону шевер кижи шуткуп кылып каан, ус-шевер кижи алдыннааш, мөңгүн илчирбелер-биле каастап каан болур.

²⁰ А ындыг аар өртектиг чүүлдер ажыглап шыдавас ядыы кижи иривес ыяш шилип тыпкаш, кээп дүшпес дүрзү-бурган кылып бээр билдилиг ус-шевер кижи тып аар.

²¹ Таанда-ла билбес силер бе? Дыңнаваан силер бе? Эң эгезинде-ле силерге чугаалап кагбаан чүве бе? Чер-делегейни канчаар чаяап каанын билип албааныңар ол бе?

²² Дээрги-Чаяакчы чер-делегейниң дээрбээниң кырында саадап турар, а чер-делегейниң чурттакчылары имилеме шартылаа дег. Бурган дээрни, чуга пөс ышкаш, чада салгаш, чурттаар майгын дег, хере тыртып каан.

²³ Бурган черниң чагырыкчыларын чүү-даа эвес апаар кылып, баштыңчыларын бар-чогу дөмей кылып турар.

²⁴ Оларны чаа-ла олуртуп, тарып каары билек, олар чаа-ла черге дазылданы бээри билек, Ол оларже тыныптарга, кургап каарлар, казыргы оларны, тараа саваңы дег, хадып аппаар.

²⁵ «Мени кымга дөмейлештирер силер? Мээң-биле кым деңнежирил?» – деп, ыдыктыг Бурган айтырып тур.

²⁶ Карактарыңар дээрже шиглей көрүңер: ында бар бүгү чүвени кым чаяаганыл? Ол – сылдыстарның аг-шериин санап, көскү кылып турар, оларның шуптузунга ат тыпсып турар Бурган-дыр. Ооң күчү-күжү кызыгаар чок, эрге-чагыргазы өндүр улуг болгаш, сылдыстарның чаңгызы-даа чыдып калбас.

²⁷ Иаков, сен чүге: «Мээң орук-чолум Дээрги-Чаяакчыдан чажыртынган, Бурганым мээң чаргымны уттупкан» – дээр сен, Израиль, сен чүге ындыг чүве чугаалаар сен?

²⁸ Таанда-ла билбес сен бе? Таанда-ла дыңнаваан сен бе? Дээрги-Чаяакчы – чер-делегейниң бүгү кыдыгларын чаяаган мөңге Бурган-дыр. Ол могавас, шаа төнмес, Ооң угаан-бодалын билип аары болдунмас.

²⁹ Ол могап турупкан улусту күштүг кылып каар, шаа төнген улусту быжыктырар.

³⁰ Аныяк оолдар безин могай берип, шаа төне бээр, чалыылар шылаанындан кээп дүжер,

³¹ а Дээрги-Чаяакчыга идегээр улус чаа күш кирип алыр: олар, эзир ышкаш, чалгынын херип-чайып, ужар; маңнашкаш, могавас, кылашташкаш, шагзыравас.