Исайя 38 - Ыдыктыг Библия

Эзекияның аарааны база ооң мактал ыры

¹ Ол үеде Эзекия аарый берген, өлүрүнүң кырында келген. Амоцтуң оглу Исайя медээчи аңаа келгеш, Дээрги-Чаяакчының сөзүн дамчыдып: «Ажыл-херээңни аайлап-башкарып ал, ам өлүр-дүр сен, назының төнген-дир» – деп чугаалаан.

² Эзекия ханаже хая көрнүп алгаш, Дээрги-Чаяакчыга мөргүп эгелээн:

³ «О, Дээрги-Чаяакчы, сактып кээп көрем! Мен Сээң мурнуңга шынчы чурттап, сеткилимден бердинип келдим, Сеңээ таарымчалыг чүүлдү кылып чордум!» Оон Эзекия ишкирнип ыглай берген.

⁴ Дээрги-Чаяакчы Исайяга Бодунуң сөзүн ажыдып, мынча деп чугаалаан:

⁵ «Барып, Эзекияга ооң ада-өгбези Давидтиң Бурганы Дээрги-Чаяакчының бо сөстерин дамчыт: Мен сээң дилег-мөргүлүңнү дыңнадым, карааң чажын көрдүм – ынчангаш Мен сээң назыныңга он беш чылды немеп берип тур мен.

⁶ Ол ышкаш Ассирияның хаанының холундан сени база бо хоорайны адырып каар мен – бо хоорайга болчур мен.

⁷ Сеңээ Бодумнуң аазаан аксы-сөзүмнү күүседирим дугайында бадыткал демдээ бо-дур:

⁸ Ахазтың чадазының тепкииштеринче бадып келген хөлегени дедир, он тепкииш өрү, чылзыдыптар мен». Хүн дедир чыла берген: хөлеге бадып келгени тепкииштерни өрү алзы көдүрлү берген.

⁹ Аарааш, экирий берген соонда, Иудеяның хааны Эзекияның бижээн чүүлү бо-дур:

¹⁰ «Мен „Назынымның ортузунда өлүглер оранының хаалгазын ажыдып кирерим ол-дур, назынымның арткан кезээн казыдып алган-дыр мен“ деп бодадым.

¹¹ Мен „Дээрги-Чаяакчыны дириглер оранынга көрбезим ол-дур; өлүглер оранынга баргаш, моон соңгаар кижи амытанны көрбезим ол-дур“ деп бодадым.

¹² Мээң оран-савамны, кадарчы кижиниң чадыры ышкаш, турган черинден дүжүргеш, аппарган. Мен бодумнуң амы-тынымны, аргыкчы кижи пөзүн дүрери дег, дүрүп ап тур мен. Дээрги-Чаяакчы мени, аргыыр херекселден пөстү кезери дег, үзе кезип кааптар. Дүне, хүндүс Сен мени өлүмче аппар чыдыр сен!

¹³ Мен эртенге чедир томаанныг манап келдим, а Бурган, арзылаң ышкаш, мээң бүгү сөөк-даяамны сыйып турду. Дүне-даа, хүндүс-даа болза Сен мени өлүмче аппаар-дыр сен.

¹⁴ Мен хараачыгай азы дуруяа ышкаш эдер-дир мен, көге-буга ышкаш човууртаар-дыр мен. Үргүлчү өрү көөр дээш, карактарым шылап калды. Меңээ бергезин! Дээрги-Чаяакчы, меңээ дузалап көр!

¹⁵ Мен бодум чүнү чугаалап шыдаар мен?! Ол меңээ чугаалады, Ол Боду-ла кылып кагды. Качыгдалга алыскан болгаш, назынымның шупту чылдарын оожум төндүр чурттаар мен.

¹⁶ Мээң Дээргим, улус мынчаар чурттап турар-дыр! Бо бүгү дээрге мээң чуртталгам ышкажыл! Сен мени экиртип, амы-тынны хайырлап көр!

¹⁷ Ийе, ындыг хилинчек меңээ ачылыг болган-дыр. А Сен мээң амы-тынымны чевег-хөөрден чайладып, мээң бүгү бачыттарымны Бодуңнуң ооргаң артынче октап көрем.

¹⁸ Өлүглер оранында Сени алдаржытпайн турар, өлүг улус Сени алгап-мактавайн турар болгай. Чевег-хөөрже кире берген улус Сээң шынчыңга идегеп шыдаар эвес.

¹⁹ Дириг, чүгле дириг кижи Сени бөгүн мен ышкаш алгап-мактаар. Адазы оолдарынга Сээң шынчың дугайында чугаалаар.

²⁰ Дээрги-Чаяакчы мени камгалаар! Бис Дээрги-Чаяакчының өргээзинге, мээң хылдыг хөгжүм херекселдеримге үдедип, Ону амыдыралывыс дургузунда алгап ырлап кээр бис!»

²¹ (Исайя: «Фига чимизинден кылган эмден эккелгеш, ириңниг балыгга чыпшыр салыпсын, ынчан хаан экирий бээр» – дээн.

²² А Эзекия: «Меңээ Дээрги-Чаяакчының өргээзинче ам-даа баарымның бадыткал демдээ кандыг боорул?» – деп айтырган.)