Исайя 35 - Ыдыктыг Библия

Ээн кургаг ховуда суглар

¹ Ээн кургаг хову база кадып калган чер өөрүп-хөглээр, кагып-суксаан чер өөрүп-байырлаар, лилия ышкаш чечектелир.

² Ол чер чечектелир, өөрүп-байырлап, хөглээр. Аңаа Ливан дагларының каас-чаражын, Кармил биле Шарон девискээрлериниң магалыг чаражын берип каар. Ынчан улус-чон Дээрги-Чаяакчының өндүр бедиин, Бурганывыстың өндүр чырыын көрүп каар.

³ Кошкап калган холуңарны күш киирип алыңар, сирилээн дискектериңерни быжыктырып алыңар!

⁴ Кортук улуска: «Быжыг болуңар, кортпаңар! Бурганыңар чедип кээр деп тур – өжээн негээшкини болур, Бурганның кеземчези боттаныр; Ол чедип келгеш, силерни камгалаар» – деп чугаалаңар.

⁵ Ынчан согурларның караа көрүп, дүлейлерниң кулаа дыңнап эгелээр.

⁶ Ынчан аскак кижи иви ышкаш шурап, үнү чок кижи өөрүшкүлүг ырлап эгелээр. Ээн кургаг ховуга суг баштары үндүр аттыгып, ховуга суглар агып эгелээр.

⁷ Изиг элезин хөл бооп, кагып-суксаан чер булактар бооп хуулар. Шөө-бөрүлерниң чурттап турар үңгүрүн кулузун, хыыргыыш дуй үнер.

⁸ Ол черлеп делгем орук шөйлүр, ону Ыдыктыг орук деп адаар. Арыг эвес улус ол оруктап чорбас. Бодал чок кижи безин ол оруктап чоруур болза, аспас.

⁹ Аңаа арзылаң көзүлбес, араатан аң-мең олап чорбас – олар аңаа турбас! А хостаткан улус олап чоруур,

¹⁰ Дээрги-Чаяакчының камгалап каан улузу Сион дагже өөрүп-байырлаан алгы-кышкы-биле үнүп кээр, оларның баштарын мөңге өөрүшкү дээрбектей ораап, каастаар. Олар өөрүшкү-маңнайны чедип аар, а качыгдал биле хараадал ырап чидер.