Исайя 34 - Ыдыктыг Библия

Бүгү чоннарга, ылаңгыя Эдомга, Бурганның килеңнээни

¹ Чоннар, чоокшулап келгеш, дыңнаңар, аймактар, кичээнгейден салыңар! Чер-делегей болгаш ону долган бүгү чүве, өртемчей болгаш ында төрүттүнген бүгү чүве дыңназын!

² Дээрги-Чаяакчы бүгү чоннарже килеңнээн-дир, оларның бүгү аг-шериинче хорадаан-дыр. Дээрги-Чаяакчы оларны узуткаашкынга таварыштырып, кыргып-хыдыыр кылдыр хүлээдип берген.

³ Оларның мөчү-сөөктерин тарадыр октаптарга, өлүмнүң чыды үнер, а оларның ханындан даглар өл апаар.

⁴ Сылдыстарның аг-шерии хүлденип каар, дээр боду дүрүг ышкаш дүрлү бээр, сылдыстарның бүгү аг-шерии, виноградтың оңуп калган бүрүзү дег, кадып калган чимис дег, кээп дүжер.

⁵ Бурганның хылыжы бодунуң ажыл-херээн дээрге күүсеткеш, Эдомче халдап бадар – Бурганның узуткаашкынга таварыштырганы чонга үндүрген шииткелди күүседир.

⁶ Дээрги-Чаяакчының хылыжы өшкү-хой ханынга боражыр, кошкар бүүректериниң үс-чаанга былчажыр. Чүге дээрге Дээрги-Чаяакчы Восора хоорайга өргүл кылзын деп, эдом черге – кыргып-хыдыышкын болзун деп чугаалаан.

⁷ Черлик бугалар-биле кады бугажыктар болгаш күштүг-шыырак шарылар кырлып каар; оларның чери ханны пөктүр ижип аар, черниң довураанче үс-чаг сиңе бээр.

⁸ Ийе, Дээрги-Чаяакчыда – өжээн негээшкининиң үези бар, Сионнуң хомудалы дээш кезедириниң чылы бар.

⁹ Эдомнуң суглары чук бооп, а довураа – күгүр бооп хуула бээр; ооң чери хып турар чук апаргаш,

¹⁰ дүне-даа, хүндүс-даа өшпес, ооң ыжы кезээ мөңгеде көдүрлүр. Салгалдан салгал дамчып, ол чер ээнзирээр, ону кезээ шагда кым-даа таварып эртпес.

¹¹ Ону үгүлер биле чараа-чеченнер эжелеп аар, кускун, каарган аңаа чурттаар. Ол чер ээнзиреп, хоозурап каар, ужу-бажы билдинмес апаар.

¹² Ооң ызыгууртаннары «Мында ам күрүне чок» деп чарлаар, бүгү нояннары кым-даа эвес апаар.

¹³ Эдомнуң ордуларынга тенниг чадаң үнүш үнер, ооң шивээлеринге – шагар-оът биле оотпак өзер. Ол шөө-бөрүлер аал-ораны, страус куштар чурттаар чер апаар.

¹⁴ Аңаа черлик аң-мең ужуражып чыглыр, те-чуңма аразында кыйгыржыр; Лилит аңаа турумчуп, амыр-дыш көөр чер тып аар.

¹⁵ Ок-чылан аңаа уя тудуп, чуургалааш, камгалал адаанга чазылгыжеге чедир базып, оларын доруктурар. Аңаа дээлдигеннер эжежип алгаш ужуп кээп, чыглыр.

¹⁶ Дээрги-Чаяакчының дүрүг-номундан бо сөстерни дилеп тыпкаш, номчуңар: ол амытаннар аңаа мырыңай шуптузу чедип кээр, шуптузу эжеш боор. Дээрги-Чаяакчы оларга ынчаар дужааган, Ооң Сүлдези оларны орта чыыптар.

¹⁷ Ол Эдомну оларга үлеп бээр. Олар хувааглыг черлерин кезээ мөңгеде ээлээр база аңаа салгалдан салгал дамчып чурттаар.