Исайя 27 - Ыдыктыг Библия

Бурган-биле тайбың керээзи

¹ Ол хүн Дээрги-Чаяакчы Бодунуң улуг, быжыг болгаш хайыра чок хылыжы-биле Левиафанны – чылбыраңнаан чыланны, дыйлаңнаан чыланны узуткап каар. Далайның моозун Ол өлүрүп каар!

² «Ол хүн кайгамчык эки виноград шөлүнүң дугайында ырлажыңар!

³ Мен, Дээрги-Чаяакчы, ону кадарып, үргүлчү суггарып тур мен. Аңаа кым-даа хора чедирбезин дээш, дүне-даа, хүндүс-даа ону камгалап-кадарып тур мен.

⁴ Сагыжымда килең чок. Бир эвес ол шөл Меңээ удур тенниг бок үнүш өстүрер болза, Мен аңаа удур дайылдажып үнгеш, хуюкталдыр өрттедиптер мен.

⁵ Ол боду Менден камгалал дилеп чедип келзин, Мээң-биле тайбың керээзин чарып алзын, ийе, Мээң-биле тайбың керээзин чарып алзын».

⁶ Келир үеде Иаков дазылданыр, Израиль чаш будуктарын сунуп, чечектели бээр, бүгү чер-делегейни чимизи-биле долдурар!

⁷ Дээрги-Чаяакчы израильчилерни, оларны соп турган улусту дег, соп турган чүве бе? Ол израильчилерни, оларны өлүрүп турган улусту дег, өлүрүп турган чүве бе?

⁸ Сен олар-биле дайылдашкаш, оларны чуртундан үндүр сывыртап, шиидип турдуң. Сен оларны Бодуңнуң өрттендир чиир хат дег күштүг тыныжың-биле үндүр үрүпкен сен.

⁹ Израиль чон бодунуң кем-буруузундан мынчаар адырлыр, ол бодунуң бачыдындан ойталаар болза, үре-түңнели мындыг болур: ол өргүл салыр бедик черлерниң дажын, чугай дажы дег, чуура шаап кааптар, ыдыктыг ыяштарны-даа, адагаштарны-даа тура тыртып кааптар.

¹⁰ Быжыглалдыг хоорай ээнзирээн, чурттакчылыг черлерни улус каапкаш барган, олар ам ээн кургаг хову ышкаш. Ында ам бызаалар оъттап, дыштанып чыдып, будук-бүрү тыртпарлап чип турар.

¹¹ Будуктар кургап каарга, сыйып кааптар, херээженнер келгеш, оларны өрттедиптер. Бо чон угаан чок-тур, ынчангаш Чаяакчызы ону кээргевес, хайыра көргүспес.

¹² Ол хүн Дээрги-Чаяакчы Евфрат хемден эгелээш, Египеттиң кызыгаарында хемге чедир бүгү тараа баштарын чыыр – израильчилерни чаңгыстап чыып аар.

¹³ Ол хүн өндүр улуг трубаны этсир – Ассирияда чиде берген база Египетче сывыртадыпкан улус ында Иерусалимниң турары ыдыктыг дагга келгеш, Дээрги-Чаяакчыга мөгеер.