Исайя 25 - Ыдыктыг Библия

Дайзыннардан камгалал дээш Бурганны алгап-мактааны

¹ Дээрги-Чаяакчы, мээң Бурганым – Сен сен! Мен Сени алгап-мактаайн, Сээң адыңны алдаржыдайн! Сен туруп көрбээн чүвени кылып, Бодуңнуң шаандагы бодалыңны боттандырдың, сөзүңнү ээледиң.

² Сен хоорайларны даш оваалар кылып кагдың, быжыглалдыг хоорайларны – бузундулар кылып кагдың. Даштыкы улустуң шивээ-хоорайлары ам чок – олар ам кажан кезээде катап туттунмас.

³ Ынчангаш ам күчүлүг чоннар Сени алдаржыдар, түрлүг чоннарның хоорайлары Сенден коргар.

⁴ Чүге дээрге Сен – ядыы, түрегдээн улуска кызагдаткан үезинде шивээ сен; чайык-чаъстан чаглак-хоргадал сен, дунааргай изигде чаштынар девээ сен. Түрлүг улустуң тыныжы үерледир чаъс дег,

⁵ кадып калган черде дунааргай изиг дег болган. А Сен эжелекчилерниң дааш-шимээнин оожургаттың. Булут хөме аптарга, изигниң намдаары дег, сүрлүглерниң ыры дыңналбайн барды.

⁶ Сион дагга Аг-шериглиг Дээрги-Чаяакчы бүгү чоннарга үр хуусаада тургускан арага кудар бай дой кылыр. Ол дойга чаглыг, чилиглиг эът-чем салыр болгаш эң эки арага кудар.

⁷ Шак бо дагга Дээрги-Чаяакчы бүгү чоннарны шыва апкан шывыгны, бүгү аймактарны базырган шуглакты узуткап каар –

⁸ өлүмнү Ол кезээ мөңгеде чок кылып каар! Ынчан Дээрги-Бурган-Чаяакчы бүгү улустуң чаактарында карак чажын чодар, бүгү чер кырынга Бодунуң чонундан бак атты ап кааптар. Дээрги-Чаяакчы ону аазаан.

⁹ Ол хүн улус: «Бистиң Бурганывыс ол-дур! Бис Аңаа идегээривиске, Ол бисти камгалап кагды. Ол – Дээрги-Чаяакчы-дыр, бис Аңаа идегеп турдувус; Ооң хайырлаан камгалалы дээш өөрүп-байырлап, хөглээли!» – дээр.

¹⁰ Дээрги-Чаяакчы холун бо дагже салыр. А Моав бодунуң турар черинге, өдекче киир таптаан тараа саваңы дег, таптай бастырар.

¹¹ Моав өдек иштинге, эштип тура, холдары-биле карбанган кижи дег, холдарын хере сунар. Ол чеже-даа карбанырга, Бурган ооң турамык чоруун базар.

¹² Моавтың бедик, быжыглалдыг ханалары үрелип каар, буступ дүжер, черниң довураанче барып ужар.