Исайя 24 - Ыдыктыг Библия

Бурганның чер-делегейни кезедири

¹ Дээрги-Чаяакчы чер-делегейни хоозурадып, куругладып каар – ооң хевир-дүрзүзүн үреп, ында чурттап турар улусту тарадыр сывыртаптар.

² Карачал улусту база Бурганның бараалгакчыларын, эр, херээжен чалчаларны база оларның дээргилерин, чегдинген кижини база чээли берикчизин, чиижең хөөчү кижини база өрелиг кижини – шуптузун чаңгыс салым-хуу манап турар.

³ Чер шуут-ла хоозурап, үптеттирер. Дээрги-Чаяакчының чугаалаан сөзү ол-дур.

⁴ Чер качыгдап, харыксыраар, бүгү делегей хилинчек көрүп, харыксыраар, бедик дээр биле чер харыксыраар!

⁵ Черни ооң чурттакчылары бужартаткан: олар хоойлуларны херекке албаан, дүрүмнерни тооваан, мөңге чагыг-керээни үрээн.

⁶ Ынчангаш черни каргыш чиир – ооң чурттакчылары бачыт дээш кеземчеге онаашкан! Ынчангаш черниң чурттакчылары өрттенип каар, чүгле эвээш кижи артар.

⁷ Виноград чулуу соглуп, сыптар кадып каар, сеткил-чүрээнден хөглеп турган улус аар тынар.

⁸ Хөглүг дамбыралар ыыт чок баар, өөрүп-байырлаан үннер дыңналбастаар, хөглүг чадаганнар ыыды чидер.

⁹ Улус арага ижип, ырлашпас апаар – эзиртир суксун ижерге, ажыы кончуг апаар.

¹⁰ Ээнзирээн хоорайны үреп бузуп кааптар, хамык бажыңнар хааглыг боор – кирер арга чок.

¹¹ Арага чок боорга, кудумчуларга алгы-кышкы дыңналыр. Хөглээшкин өжүп каар, өөрүшкү черни каапкаш баар.

¹² Хоорайга чүгле хоозурал артар, ооң хаалгаларын буза шаап кааптар.

¹³ Чер кырынга, чоннар аразынга ындыг болур. Олива чимизи азы виноград чыып турда ышкаш, ажаалда адакталган үеде чүгле каш борбак кат артканда ышкаш болур.

¹⁴ Дыңзыг үннер, өөрүшкүлүг алгы-кышкы дыңналыр – Дээрги-Чаяакчының өндүр бедиин барыын чүкке алгап ырлаар!

¹⁵ Дээрги-Чаяакчыны чөөн чүкке база алгап-мактаңар! Дээрги-Чаяакчының, Израильдиң Бурганының адын далай эриин дургаар алдаржыдыңар!

¹⁶ Чер-делегейниң ужу-кыдыындан: «Чөптүг Бурганга алдар!» – деп ырлажырын дыңнаар бис. А мен: «Өлдүм-читтим, өлдүм-читтим! Ат болдум! Өскерликчилер өскерлип тур! Олар өскерликчи ёзу-биле өскерлип тур!» – дидим.

¹⁷ Черниң чурттакчылары, коргунчуг байдал, оңгар болгаш какпа-дузак силерни манап турар.

¹⁸ Коргуушкуннуң алгы-кышкызын дыңнааш, дескен кижи оңгарже кээп дүжер; оңгардан үнүп келген кижи дузакка туттуна бээр. Дээрниң эжиктери ажыттынар, черниң үндезиннери сирилээр.

¹⁹ Чер буступ каар, ол чайганып, сириңейни бээр.

²⁰ Чер, эзирик кижи дег, тендириир, майгын дег, чайганыр; ооң бузут-багы, аар чүък бооп, ону базып аар, ол кээп дүшкеш, туруп чадап каар!

²¹ Ол хүн кээрге, Дээрги-Чаяакчы дээрлерге – дээрниң аг-шериин, черге – чер-делегейниң хааннарын кезедир.

²² Оларны, хоругдаткан улусту дег, оңгарга чыып каар; оларны кара-бажыңнааш, элээн үе эртерге, оларга кеземче онаар.

²³ Аг-шериглиг Дээрги-Чаяакчы Сион дагда турар Иерусалимге хааннай бээрге база Бодунуң өндүр чырыын улустуң баштыңнарынга көргүзерге, айның арны кызар, хүн ыяды бээр.