Исайя 22 - Ыдыктыг Библия

Иерусалим дугайында

¹ Көстүүшкүн шынаазының дугайында өттүр билген медеглел бо-дур. Сээң-биле чүү болуп тур? Чүге сээң чурттакчыларың шупту бажыңнарының кырында чыглып келди?

² Шимээргеп хөлзеп, өөрүп-байырлап турган хоорай, сээң кырлып калган улузуң хылышка шаштырбаан-дыр, тулчуушкун үезинде өлбээн-дир.

³ Сээң хамык баштыңнарың кады дезе берген, чаларын октапкаш, туттуруп алган. Хоорайга турган бүгү улус ырадыр дезип маңнааш-даа, туттуруп алган-дыр.

⁴ Ынчангаш: «Менче көрбеңер, качыгдап, ыглап алыйн. Хөңнүм чазаарын оралдашпаңар, мээң күжүр чонум когаралды көрген болгай» – деп чугаалаан мен.

⁵ Аг-шериглиг Дээрги-Бурган-Чаяакчының кеземче хүнү – Көстүүшкүн шынаазында девидээшкин, чылча шавыышкын, мөгүдээшкин хүнү! Хананы үрей үстүрүп-ле тур – качыгдалдың кышкызы даг бажында дыңналы берди.

⁶ Эламның шериглери саадактарын белеткеп алган, дайынчы тергелер, аъттыг шеригжилер дайылдажырынга белен; Кир чурттуг шериглер дозуг-камгалалдарын көдүрүп тур.

⁷ Сээң кайгамчык эки шынааларыңны дайынчы тергелер долган, аъттыг шеригжилер хаалга чанында чыскаалыпкан.

⁸ Иудеяның быжыглалдарын бузуп каапкан. Силер ол хүн Ыяш ордуда шыгжаан ок-чепсекче көрүжүңер шиглээн силер.

⁹ Давидтиң Хоорайының ханазында дежик черлерниң хөйүн көрүп каан силер. Сугну Адаккы хөөлбекти долдур курлавырлап узуп алган силер.

¹⁰ Иерусалимде бажыңнарны хынап көргеш, хананы быжыглаары-биле оларның чамдыызын бузуп каапкан силер.

¹¹ Ийи хана аразынга Эрги хөөлбектиң суун курлавырлаар суг шыгжамыры тудуп алган силер. Ынчалза-даа ол айыыл-халаптың боорун баш бурунгаар шиитпирлээн Бурганче көрүнмээн силер, ол бүгүнү шаг шаанда-ла бодап алган Бурганче кичээнгей салбаан силер.

¹² Аг-шериглиг Дээрги-Бурган-Чаяакчы силерге ол хүн ыглап-сыктаарын, качыгдалдан бажыңарны дөңгүрертир чүлүп, самдар хепти кедерин сүмелээн.

¹³ Ооң орнунга өөрүп-хөглеп, байырлап, шарылар соп, хойлар дөгерип, эът чип, арага ижип: «Даарта өлүп каар бис – ам дойлап, ижип-чип аалы!» – деп турар-дыр силер.

¹⁴ Аг-шериглиг Дээрги-Чаяакчы меңээ: «Ол бачыдыңар өршээттинмес, өлүп каар силер!» – деп дыңнаткан. Аг-шериглиг Дээрги-Бурган-Чаяакчының чугаалаан чүвези ол-дур.

Дээди дүжүмет дугайында

¹⁵ Аг-шериглиг Дээрги-Бурган-Чаяакчы мынча дээн: «Барып, хаанның дүжүмеди, орду башкарыкчызы Севнага мону дамчыт:

¹⁶ „Сен кым сен? Мында кандыг улузуң барыл? Канчап маңаа бодуңга чевег-куй оюп ап диттигиптиң? Чевег-куйну бедик черге оюп алган-дыр сен, чыдар чериңни хаяга кылып алган-дыр сен.

¹⁷ Көөр сен, күш-шыдалдыг кижи, Дээрги-Чаяакчы сени дыңзыг туткаш, дүжүр октаптар!

¹⁸ Ол сени борбайтыр дүргеш, улуг делгем чуртче шывадаптар. Сен аңаа өлүп каар сен, каас-коя чуузаларың аңаа артып каар, о, сен хөөкүй, бодуңнуң дээргиңниң ордузунуң бужар-багы!

¹⁹ Мен сени эрге-дужаалыңдан халаар мен, ажыл-албаныңдан дүжүртүр сен!“

²⁰ Ол хүн кээрге, Мен Хелкияның оглу Элиакимни – Бодумнуң чалчамны кыйгырып аар мен.

²¹ Аңаа сээң хевиңни кедиргеш, сээң куруң-биле куржаар мен, сээң эрге-чагыргаңны аңаа хүлээдип бээр мен. Ол Иерусалимниң чурттакчыларынга, иудей чонга ада дег болур.

²² Мен ооң холунга Давидтиң ордузунуң дүлгүүрүн тутсуп каар мен, ооң ажыткан чүвезин кым-даа хаап шыдавас, ооң хаап каан чүвезин кым-даа ажыдып шыдавас.

²³ Мен ону кадыг-быжыг черже, кадаг ышкаш, киир кагар мен; ол бодунуң төрел бөлүүнге алдарлыг дүжүлге апаар.

²⁴ Ооң төрел бөлүүнүң бүгү алдар-ады: бүгү салгакчылар, ажы-төл, кадагда азып каан аяк-сава дег, доңгалар дег, кадагдан хамаарылгалыг болур.

²⁵ Ол хүн кээрге, демги кадаг, кадыг-быжыг черже кадап каан-даа болза, божаңнай бээр – деп, Аг-шериглиг Дээрги-Чаяакчы медеглээн. – Ол кадагны ушта шааптарга, кээп дүжер, аңаа азып каан турган бүгү чүък чок апаар». Дээрги-Чаяакчының чугаалаан чүвези ол-дур.