Исайя 2 - Ыдыктыг Библия

Дээрги-Чаяакчының даа

¹ Амоцтуң оглу Исайяга Бурганның чорутканы, Иудея биле Иерусалим дугайында ажыдыышкын бо-дур.

² Сөөлгү хүннер кээрге, Дээрги-Чаяакчының өргээзи турар дагны Ол өске бүгү тейлер, даглардан бедидир тургузуп каар. Бүгү чоннар ол дагга чедип кээр,

³ эңдерик аймактар аңаа чыглып кээр. Олар бот-боттарынга: «Барып, Дээрги-Чаяакчының даанче, Иаковтуң Бурганының өргээзинче үне берээли. Бурган бисти Бодунуң оруктары-биле чоруурунга өөредип каар, бис Ону эдерер бис» – дижир. Сиондан ыдыктыг хоойлу дүжүп кээр, Иерусалимден Дээрги-Чаяакчының сөзү тараар.

⁴ Чоннарның херээн Ол шиитпирлээр, эңдерик аймактарның чаргы-чаалызын Ол үзер. Олар боттарының хылыштарын андазыннарже, чыдаларын – хол кадыырларынче эде соп кылып аар. Бир чон өске чонга удур хылыш көдүрбес, олар моон соңгаар дайын чорударынга өөренмес.

⁵ О, израиль чон, Дээрги-Чаяакчының чырыынга бүргедип чурттаалы че!

Израильдиң турамыын буруу шапканы

⁶ Сен Бодуңнуң израиль чонуңдан ойталаан сен. Чүге дээрге оларның хары чоннар-биле харылзаазы ханылап, Чөөн чүк улузундан өттүнүп алган чаңчылдары эңдерик-тир, филистим чонда дег, төлгечилери-даа бар-дыр.

⁷ Оларның черин алдын, мөңгүн долган, эртине-байлаа эмге-тикчок. Оларның черин аъттар долган, дайынчы тергелери эмгежок!

⁸ Оларның черин дүрзү-бурганнар долган. Олар холу-биле бүдүрген, салаалары-биле кылган чүүлдеринге мөгейип турар.

⁹ Кижилер боттарын бакка суп, куду көрдүрген-дир. Сен оларны өршээвейн көр!

¹⁰ Израиль чон, Дээрги-Чаяакчыдан корткаш, Ооң өндүр чырыының чайыннаажындан сүрээдээш, хаяларже ажытталы бер, куйларже чаштына бер!

¹¹ Турамык кижи бажын халайтыптар, улустуң улуургак чоруу куду көрдүрер, ол хүн чүгле Дээрги-Чаяакчы өндүр бедик болур.

¹² Бүгү улуургаар, туразы улгадыр улусту, бодун өрү көрдүнер бүгү улусту Аг-шериглиг Дээрги-Чаяакчының кезедир хүнү кээр, ол бүгү улус куду көрдүрер.

¹³ Ливанның бедип үнген пөштери, Васанның улуг дубтары,

¹⁴ бүгү бедик даглар, бүгү кадыр тейлер,

¹⁵ бедик суурга бүрүзү, быжыглаттынган хана бүрүзү,

¹⁶ Фарсистиң бүгү улуг корабльдары, оларның бүгү күзенчиг каасталгалары кеземче хүнүн көөр.

¹⁷ Кижиниң улуургак чоруу куду көрдүрер, турамык кижи бүрүзү томаарыыр, ол хүн чүгле Дээрги-Чаяакчы өндүр бедик болур,

¹⁸ дүрзү-бурганнар шуут чиде бээр.

¹⁹ Кажан Дээрги-Чаяакчы чер-делегейни сириледир силгиптерге, Оон корткаш, Ооң өндүр чырыының чайынындан сүрээдээш, улус хаялар чарыктарынче, черде хооргалдарже кире бээр.

²⁰ Ол хүн улус мөгеер дээш кылып алганы алдын-мөңгүн дүрзү-бурганнарын дедир-даваннарга, часкыларга октап бериптер.

²¹ Дээрги-Чаяакчы чер-делегейни сириледир силгиптерге, Оон корткаш база Ооң өндүр чырыының чайынындан сүрээдээш, олар хаялар чарыктарынче, даглар кызааларынче кире бээр.

²² Кижи амытанны херекке алба, ол өлүр тынныг болгай. Ол чүзү-биле чугулал?