Исайя 16 - Ыдыктыг Библия

¹ Моавтың чагырыкчылары Села хоорайдан, ээн кургаг хову кежир, Сион дагже белек кылдыр хураганнар чорудуп берген.

² Арнон хемниң кежиглеринде моав херээженнер уязындан үндүр октаткаш, чалгыннарын далбаңнаткан куштар ышкаш апарган.

³ Моавтар Иерусалимден: «Биске сүмеден берип, шиитпирден үндүр. Дал дүъште бодуңнуң хөлегең-биле бисти, дүн дүшкен ышкаш, шуглап ал. Сывыртаткан улузувусту чажырывыт, дескен улусту айтып бербе.

⁴ Моавтан сывыртаткан улузувус сээңиинге чурттап артсын, оларга узуткакчыдан хоргадал бооп көр» – деп дилээн. Кызагдакчы чок апаар, хоозураашкын соксап, чуртту базынган улус чиде бээр.

⁵ Ынчан Давидтиң дүжүлгези шынчы чорук ачызы-биле доктаап, быжыгар – дүжүлгеге шынга бүргеткен чагырыкчы саадаар; ол чөптүг чорукче чүткүп, шынныг шииткел үндүрер дээш далажыр.

⁶ «Бис Моавтың улуургааның, ооң аажок улуургаа биле турамыының дугайында, ооң адыыргаа биле туразының улуунуң дугайында дыңнаан бис, а ооң көөргеттинер чоруу хоозун-меге-дир».

⁷ Ынчангаш моав чон бодунуң чурту дээш качыгдап, шупту ишкирнип ыглап турар. Ажыг-шүжүгге алыскан улус, Кир-Харешет хоорайга эки-чаагай амыдыралыңарны сактып, ыглажыңар-ла!

⁸ Эсевоннуң шөлдери болгаш Сивманың виноград шөлдери кургап калган. Чоннарның чагырыкчылары биеэде Иазер хоорайга чедир үнүп, ээн кургаг хову чедир чаттылып турган эң эки сыптарны таптай базып каапкан. Оларның адырлары өзүп тарап, далай ындынче эрттир үнүп турган.

⁹ Мен Сивмада виноград шөлү дээш, Иазер дээш ыглааным дег, ыглап тур мен; Эсевон биле Элеале, силерни караам чажы-биле суггарар мен! Чүге дээрге улус сээң чайгы чимизиң чыгбастап, бышкан тарааң ажаавастады, өөрүшкүлүг дааш-шимээн дыңналбастады.

¹⁰ Дүжүткүр черни хөглээшкин биле өөрүшкү каггаш барды, виноград шөлдеринде кым-даа ырлап, байырлавастады, виноград сы базар оңгарларда кым-даа виноград таптай баспайн турар, чүге дээрге Мен өөрүп-байырлаан алгы-кышкыны соксадып кагдым.

¹¹ Ынчангаш ишти-хөңнүм Моав дээш, сеткил-чүрээм – Кир-Харешет дээш, чадаган ышкаш, ыглап тур.

¹² Моавтар ыдыктыг черлерге чедип келгеш, шылагыже чаннып, мөргүүрге-даа, ажык-дуза чок болур.

¹³ Дээрги-Чаяакчының Моавка хамаарыштыр шаанда чугаалап каан сөзү ол-дур.

¹⁴ А ам Дээрги-Чаяакчы: «Хөлечик кижиниң ажыл кылып эрттирер хуусаазы дег, дараазында үш чыл эрте бээрге, Моавтың алдар-ады баксыраар, ооң хөй санныг чону кырлып каар, көңгүс эвээш санныг, кошкак артынчы артар» – деп чугаалаан.