Исайя 15 - Ыдыктыг Библия

Моав дугайында

¹ Моав дугайында өттүр билген медеглел бо-дур. Чаңгыс дүне Ар хоорайны хоозураткан – Моавты узуткап каан; чаңгыс дүне Кир хоорайны хоозураткан – Моавты узуткап каан.

² Ооң чурттакчылары бурганнарының өргээзинче чедип келген, Дивоннуң чурттакчылары ыдыктыг черже ыы-сыылыг чедип келген. Моав чон Нево болгаш Медева хоорайлар дээш ыглап-сыктаар – кажыыдал демдээ кылдыр бүгү улустуң бажын таарып, салын чүлүп каан.

³ Моавтың кудумчуларында улус качыгдалдың самдар хевин кедип алган, бажыңнар кырында, шөлдерде бүгү улус доңгая кээп дүшкеш, ыглажып тур.

⁴ Эсевон биле Элеале хоорайлар алгырып ыглап тур – оларның үнү мырыңай Иаацада дыңналып турар. Моавтың шериглери база ыглажып, сеткил-сагыжы сүрээдеп тур.

⁵ Мээң чүрээм Моав дээш ыглап тур; ооң дескен улузу Сигорже, Эглат-Шелишияга чедир дезип тур; олар Лухитче ыы-сыылыг көдүрлүп, Хоронаим баар орукта боттарының аштырыышкыны дээш ыглажып тур.

⁶ Нимрим хемниң суу соглуп калган, шыктар кургап, оът-сиген оңа берген – үнүш-дүжүт артпаан.

⁷ Моавтар эртине-байлааның камнап алган артынчызын Талдар шынаазы-биле аппар чыдар.

⁸ Моавтың бүгү кыдыг-кызыгаарында ыы-сыы чаңгыланып тур, улус Эглаимге чедир, Беэр-Элимге чедир ыглажып тур,

⁹ чүге дээрге Димоннуң суун хан долган-дыр. А Мен Димонче оон-даа улуг айыыл-халап ыдар мен – Моавтан дескен улусче база чуртта артып калган улусче арзылаңнар халдаар.