Исайя 12 - Ыдыктыг Библия

Мактал ырлары

¹ Ол хүн кээрге: «Дээрги-Чаяакчы, Сеңээ өөрүп четтирип тур мен! Сен меңээ килеңнеп турган-даа болзуңза, Бодуңнуң килеңиңни чайладып, меңээ аргалалды хайырладың.

² Шынап-ла, мээң Камгалакчым – Бурган, Аңаа идегээр болгаш, чүден-даа кортпас мен. Дээрги-Бурган-Чаяакчы – мээң күчү-күжүм, ырым; Ол меңээ камгалал болду» – деп ырлаар сен,

³ камгалалдың кудуктарындан сугну өөрүшкүлүг узуп аар силер.

⁴ Ол хүн кээрге: «Дээрги-Чаяакчыга өөрүп четтириңер, Ооң адын кыйгырып, алгап-мактаңар; чоннар аразынга Ооң ажыл-херектерин медээлеңер, Ооң ады өндүр улуг дээрзин оларга сагындырыңар.

⁵ Дээрги-Чаяакчыны алгап ырлаңар, Ол өндүр улуг үүле-херек кылган болгай, ооң дугайында бүгү чер-делегейге билдингир апарзын.

⁶ Сионнуң чурттакчылары, өөрүп-хөглеңер, чүге дээрге Израильдиң ыдыктыг Бурганы силерниң араңарда өндүр улуг-дур!» – деп ырлаар силер.