Исайя 11 - Ыдыктыг Библия

Амыр-тайбың хайырлаар Хаан

¹ Иессейниң төжээнден Будук өзер, ооң дазыл-дамырындан Өзүм үнер.

² Дээрги-Чаяакчының Сүлдези – мерген угаан биле угаан-сарыыл бээр Сүлде, арга-сүме биле күш-шыдал бээр Сүлде, билиг биле Дээрги-Чаяакчыдан коргуушкун бээр Сүлде – Ону бүргей аптар.

³ Дээрги-Чаяакчыдан коргары Аңаа өөрүнчүг болур. Ол даштыкы хевир барымдаалап шиитпес, дамчыыр чугаа ёзугаар херектер шиитпирлевес.

⁴ Ядыыларны Ол шынныы-биле шиидер, черниң түреңги улузунуң чаргы-чаалызын чөптүү-биле шиитпирлээр. Ооң чугаалаан сөзү, мерге дег, чер-делегейни кезедип согар, Ол Бодунуң аксындан үнген тыныжы-биле бузуттуг улусту өлүрүп каар.

⁵ Ол чөптүг чорукту куржанып аар, шынчы чорук Ооң белинде куру болур.

⁶ Ынчан бөрү хураган-биле кады чурттаар, ирбиш анай-биле кады чыдар, бызаа, арзылаң болгаш бугажык кады оъттап-чемненир, бичии оол оларны одарже сүрүп аппаар.

⁷ Инек адыг-биле кады оъттаар, оларның төлдери кады чыдар, арзылаң, буга ышкаш, сиген чиир.

⁸ Чаш төл чылан үңгүрүнүң аксынга ойнап болур, бичии уруг шагар чылан чурттап турар үтче холун салып болур.

⁹ Бурганның бүгү ыдыктыг даанга бузут үүлгедир, хора халдадыр чорук турбас апаар, чүге дээрге, далайны сугларның долары дег, чер-делегей Дээрги-Чаяакчыны билип аары-биле долдунар.

Чоннарга тук

¹⁰ Ол хүн кээрге, Иессейниң Дазылы бүгү чоннарга тук дег апаар, шупту аймактар Ооң чанынга чыглып кээр, Ооң чурттап турар чери алдаржыыр.

¹¹ Ол хүн кээрге, Дээрги холун катап база сунгаш, Бодунуң чонунуң артынчызын Ассириядан, Египеттиң девискээрлеринден, Эфиопиядан, Эламдан, Сеннаардан, Хамат хоорайдан болгаш далайда ортулуктардан дедир эгидип аар.

¹² Дээрги бүгү чоннарга тук көдүргеш, Израильдиң үндүр сывыртаткан улузун чыып эккээр, Иудеяның тоо быдараан чонун чер-делегейниң дөрт чүгүнден бөлүп эккээр.

¹³ Израильдиң адааргалы соксаар, Иудея аңаа өжээргевейн баар; Израиль Иудеяга адааргавастай бээр, Иудея база Израиль-биле өжээннешпес.

¹⁴ Олар барыын чүкке филистимнерниң черлеринче шүүргедей ужуп, халдаар, чөөн чүкте чурттаан аймактарны кады үптээр; Эдом биле Моавка удур холун көдүрер, аммон чон оларга чагыртыр.

¹⁵ Дээрги-Чаяакчы Египеттиң далайының мугулдурун кургадып каар, күштүг хат хадыдып, Бодунуң холун Евфрат хемниң кырынче сунар. Ол хем чеди адырык кылдыр чарлы бээрге, улус ону идик ужулбайн кежип шыдаар апаар.

¹⁶ Ынчан Ооң чонунуң артынчызынга, израиль чон Египеттен үнүп турган үеде дег, Ассириядан үнер делгем орук ажыттынар.