Иов 8 - Ыдыктыг Библия

Вилдадтың чугаазы: Бурган шынны хажытпас

¹ Шуах чурттуг Вилдад мынча деп харыылаан:

² «Ындыг чугааны үр чугаалаар сен бе? Сээң сөстериң – чүгле күштүг хат-тыр.

³ Таанда-ла Бурган чөптүг шииткелди хажыдар бе, Күчүлүг Бурган шынны хажыдар бе?

⁴ Бир эвес ажы-төлүң Аңаа удур бачыт үүлгеткен болза, Ол оларның кем-буруузун боттарының баштарынче халдаткан-дыр.

⁵ А бир эвес сен Бурганче чүткүүр болзуңза, Күчүлүг Бурганга чанныр болзуңза,

⁶ бир эвес арыг болгаш чөптүг-шынныг болзуңза, Ол ам дораан сен дээш хөделип, дузалаар, аал-ораныңны ачы-хавыяаң ёзугаар катап база тургузуп каар.

⁷ Сен эгезинде чөгенчиг ынай-даа турган болзуңза, адак сөөлүнде өндүр улуг апаар сен.

⁸ Шаандагы салгалдардан айтырып көр, оларның ада-өгбезиниң билип алган чүүлүн хандыр көрүп көр;

⁹ чүге дээрге бис дүүн чаа төрүттүнген бис, билир чүвевис чок, чер кырында хүннеривис хөлеге-биле дөмей-дир.

¹⁰ Ынчангаш ол салгалдар сени өөредип, сургап кагзын, сеткил-чүрээн чугаа-сөзүнге ажытсын.

¹¹ Тулаа чок черге хыыргыыш үнер бе? Суг чок болза, кулузун өзер бе?

¹² Олар ам-даа чечектелип, одура кестинмээн бол, кандыг-даа оът-сигенден дүрген кадып каар.

¹³ Бурганны уттупкан бүгү улустуң хуу-салымы ол-дур, Оон ойталаан кижиниң идегели өлүп төнер.

¹⁴ Ындыг кижиниң ынаныжы удазында астынган, ооң чөленгиижи – ээремчик дузаа-ла.

¹⁵ Ээремчик дузаанга чөленирге, ол үстүп каар, оон халбактанырга, ууп шыдавайн баар.

¹⁶ Ындыг улус хүн караанга өзүп үнген үнүшке дөмей, өзүмнери сесерликке чүк башка шөйлүр;

¹⁷ дазылдары оваалап каан даштарже орааштынып кирип, хая-даш аразындан чаза булгап үнүп кээр.

¹⁸ А оларны турган черинден тура тыртыптарга, ол чер боду-ла олардан ойталап: „Силерни кажан-даа көрбээн мен!“ – дээр.

¹⁹ Ындыг улустуң оруунда үнген өөрүшкүзү ол-ла-дыр! А черден өскелери үнүп кээр.

²⁰ Бурган буруу чок кижиден ойталавас, а бузуттуг кижини деткивес!

²¹ Ол сээң аксыңны каткы-биле, боостааңны – өөрүшкүлүг алгы-биле катап база долдуруптар.

²² А сээң дайзыннарың бак адын хеп дег кедип алыр, бузуттугларның аалдары чиде бээр!»