Иов 7 - Ыдыктыг Библия

Иовтуң хилинчээ хемчээл чок

¹ «Чер кырынга кижиниң хуу-салымы – шыланчыг күш-ажыл албаны, ооң хүннери – хөлечиктээр хүннер эвес бе?

² Хөлегеге дыштаныксап турар кул кижиге дег, ажылы дээш төлевир манап турар хөлечикке дег,

³ меңээ база хоозун куруг айлар онаашты, мээң үлүг-хуум – хилинчектиг дүннер болду.

⁴ Удуп чыдыпкаш-ла, „Кажан турар мен“ деп бодаар-дыр мен, а дүн төнместеп, даң аткыже аңдарлып-дүңдерлип кээр-дир мен.

⁵ Мага-бодумну курттар үглээн, доозун сиңген балыглар шыпкан, кежим кестип-чарлып, ириңнели берген.

⁶ Мээң хүннерим аргыыр херексел хемези дег караңайнып, төнчүзүнче чоокшулап, идегелим үстүп тур.

⁷ Бурганым, сактып келем: мээң чуртталгам – эзин-бус-тур, аас-кежикти катап база караам-биле көрбес мен.

⁸ Мени ам көрүп турар карак удавайн көргеш, тыппас, Сен көрүп кээриңге, мен чок боор мен.

⁹ Булуттуң шаарарып, чиде бээри дег, өлүглер оранынче бада берген кижи эглип келбес;

¹⁰ бодунуң бажыңынче чанып келбес, ооң турган чери ону ам танывайн баар.

¹¹ Ынчангаш мен аксы-сөзүм тыртпас мен, качыгдаан сеткилимден чугаалаар мен, хилинчектенген сагыжымдан хомудалым илередир мен.

¹² Мен далай мен бе азы далай моозу мен бе, чүге Сен мени таңныылдарга кадартып кагдың?

¹³ „Уйгум мени аргалаар, дөжээмге сагыш аарыы оожургаар“ деп бодаар-дыр мен.

¹⁴ А Сен мени дүштеримге коргудар-дыр сен, көстүүшкүннер-биле сүртедир-дир сен!

¹⁵ Мындыг мага-боттуг чоруурунуң орнунга, тыныжым боглуп каары, өлү бээри дээре турган ийик.

¹⁶ Чуртталга хөңнүмге дээпти – дөмей-ле мөңге чурттаар эвес. Мени каапкаш барам! Мээң назыным чүгле хей-бус болгай.

¹⁷ Кижи деп кымыл ол – Сен чүге ону өрү көдүрүп, ол дээш сагыш човаар сен?

¹⁸ Чүге эртенниң-не аңаа кээп, ону үргүлчү шенеп турар сен?

¹⁹ Таанда-ла көрүжүңнү менден чайлатпас сен бе, хензиг-даа када болза мени салыптып, чараа ажырыптар чай бербес сен бе?

²⁰ Бачыттыг дижик мен. Сээң Бодуңга багай чүнү кылдым, кижилер Харагалзакчызы? Чүге мени согуннарыңга кара кылып алдың? Канчап мен Сеңээ аартык болу бердим?

²¹ Бир эвес кандыг-бир бачыт үүлгеткен болзумза, чүге мени өршээвес сен, кем-буруумну менден адырбас сен? Мен ам удавайн чер алдынче кире бээр мен, мени дилээриңге-даа, чок боор мен!»