Иов 6 - Ыдыктыг Библия

Иовтуң чугаазы: мээң хомудалым чөптүг

¹ Иов ынчан мынча деп харыылаан:

² «Бир эвес мээң качыгдалымны деңзилеп, хилинчээмни деңзи таваанче салыр болза,

³ ол далайлар элезининден-даа аар болур ийик! Ынчангаш мээң чугаа-соодум ындыг доңгун-дур.

⁴ Күчүлүг Бурганның согуннары мага-бодумда, мээң сеткил-чүрээм оларның хоранын ижип турар, Бурганның ыдыпканы коргунчуг кеземчелер кырымда хөме келген.

⁵ Черлик элчиген, оът-сигени бар болза, алгырар бе, шары, чиир чемниг болза, мөөрээр бе?

⁶ Дус чок аъш-чем амданныг бе, чуурганың агында амдан бар бе?

⁷ Ындыг аъш-чемге дээр хөңнүм чок, оон ам хөөн булганыр апардым!

⁸ О, дилээм боттаны берген болза, Бурган мээң күзелимни күүсеткен болза –

⁹ Ол мени узуткап каарын болгааган болза, холун сунгаш, чок кылып каан болза!

¹⁰ Ындыг төнчү меңээ аргалал, кадыг-дошкун аарышкы аразында өөрүшкү болур ийик – Ыдыктыг Бурганның сөстеринден ойталавааным ол-дур!

¹¹ Идегеп, манаар хире кандыг күштүг мен, шыдажыр хире кандыг эчис сорулгалыг мен?

¹² Мээң быжыым – даштың быжыы бе? Мээң мага-бодум – хүлер бе?

¹³ Кандыг-даа деткимчени менден хунаап турда, бодумга дузалаптар арга менде бар бе?

¹⁴ Эжинге энерелдиг эвес кижи Бургандан коргуушкунну уттупкан-дыр.

¹⁵ А мээң ха-дуңмам, соглуучал дамырак дег, бүзүрел чок, савазыраан хем суу дег, доктаамал эвес:

¹⁶ эрип чыдар доштан бораңгай-даа апаар, хар эриирге, шапкын ага-даа бээр;

¹⁷ а кааңнаашкын эгелээрге, оожургап, соглур, изип кааңнаарга, уну куруглап каар.

¹⁸ Чиңнер аңаа суг дилээш, оруктарындан өскээр барып, ээн кургаг ховуже киргеш, өлүп чидер;

¹⁹ Фемадан чиңчилер суг дилеп, харап көөр, Шевадан садыгжылар суг тып аарынга идегеп турар,

²⁰ ынчалза-даа оларның идегели меге болур: кургаг унга чедип келгеш, чөгели төнер.

²¹ Силер меңээ база ындыг хем дег апардыңар! Мээң коргунчуг үүле-чолум көргеш, корга бердиңер.

²² Мен силерден белек дилеп тур мен бе азы „Мен дээш байлааңардан хээли бериңер“ деп тур мен бе?

²³ „Дайзынның холундан мени адырыңар, дарлакчылар холундан садып хостаңар“ дидим бе?

²⁴ Мени сургаңар, ынчан ыыттавайн баар мен, шын эвес чүүл кылганымны көргүзүңер.

²⁵ Шынныг сөстер күштүг-дүр, а силерниң чемеңер чүнү шынзыдып турарыл?

²⁶ Мээң сөстеримни буруу шавар деп тур силер бе? Идегелин ышкынган кижиниң чугаазы чүгле хоозун хат бе?

²⁷ Силер өскүс кижиже-даа халдаар, эжиңерни-даа садыптар ийик силер чоп!

²⁸ Ам-на менче көрүп келиңер: кызыл арныңарга-ла мегелээр деп мен бе?

²⁹ Боданып көрүңер, бузут-бак үүлгетпеңер, боданып көрүңер, мен актыг мен.

³⁰ Мээң чугаамда шын эвес чүүл бар-дыр бе, ажыг амданны ылгап шыдавас мен бе?»