Иов 40 - Ыдыктыг Библия

Бурганның ийиги чугаазы: өндүр улуг амытаннарның Дээргизи Мен-дир мен

¹ Дээрги-Чаяакчы Иовка шуурган иштинден мынча деп харыылаан:

² «Ёзулуг эр дег, куржанып белеткенип ал; Мен айтырайн, а сен Меңээ харыыла.

³ Таанда-ла Мээң шиитпиримни буруу шавар сен бе, бодуңну агартыр дээш, Мени буруудадыр сен бе?

⁴ Бурган ышкаш күчү-күштүг сен бе, Ол ышкаш диңмиредир чугаалаар сен бе?

⁵ Ындыг болза, бодуңну өндүр-чаагай чырык-биле каастап ал, чайынналчак мактал-хүндү кеткен хевиң дег болзун;

⁶ бүгү турамык улусче көргеш, томаартывыт; килеңнеп, хорадааныңны туттунма,

⁷ бүгү улуургактарже көрүнгеш, сөгүртүвүт, бузуттугларны турган черинге чылча базывыт!

⁸ Оларның шуптузун чевегге хөөп каг, алдыы оранга хоругдап каг.

⁹ Мен ынчан сени мактаар мен: тиилелгени сеңээ бодуң холуң шаңнаан-дыр.

¹⁰ Бехемотче көр даан: ону база, сени ышкаш, чаяап каан мен; ол, шары ышкаш, оъттаар-дыр.

¹¹ Ооң дөңмектериниң күчү-күштүүн, иштиниң шыңганнарының кадыг-быжыын көр даан!

¹² Ооң кудуруу пөш ышкаш дыңзыг-дыр, дөңмектериниң сиирлери дүргектели берген-дир.

¹³ Буттары хүлер хоолайлар-ла, сөөктери демирлер дег-дир.

¹⁴ Ол – Бурганның чаяалгазының өндүр бедик эгези-дир! Олче хылыжын чүгле ооң Чаяакчызы аннып болур.

¹⁵ Тейлер аңаа аъш-чемни бээр, ында бүгү черлик аң-мең ойнап-хөглеп турар.

¹⁶ Ол шырыштарга дыштанып чыдар, тулаада кулузун аразынга чаштына бээр;

¹⁷ чокпак үнүштер ону хөлегези-биле шуглап аар, дамырак суг эриинде талдар ону хүрээлеп аар.

¹⁸ Дажыг суг хөме апса-даа, ол кортпас, Иордан хем ооң аксынче куттулза-даа, ол тоовас.

¹⁹ Ол көрүп турда, кым ону тудуп шыдаарыл? Кым ооң думчуундан тыртпа-биле илип аарыл?

²⁰ А Левиафанны сыырткыыш-биле тудуп аар сен бе? Ооң дылын хендир-биле кызып ап шыдаар сен бе?

²¹ Ооң думчуун кулузун-биле өттүр идип, чаагын тыртпа-биле үттеп шыдаар сен бе?

²² Ол сенден катап-катап чаннып дилээр бе, сээң-биле ээлдек чугаалажыр бе?

²³ Ол сээң-биле керээ чарар бе, кезээ шагда сээң кулуң боор бе?

²⁴ Сен ооң-биле, кушкаш-биле дег, ойнаар сен бе, чалча кыстарыңга оюн-хөг кылдыр, ону баглап каар сен бе?

²⁵ Балыкчылар ол дээш садыглажыр бе, садыгжылар ооң коң эъдин үлежир бе?

²⁶ Ооң кежин чыдалар-биле, бажын – балык шанчар серээ-биле өттүр шанчар сен бе?

²⁷ Холуңну аңаа дегзип көр – катаптавайн баар сен: тулчуушкун уттундурбас!