Иов 36 - Ыдыктыг Библия

Бурган улусту кеземче дамчыштыр өөредип турар

¹ Элиуй уламчылаан:

² «Бичии шыдажып мана – мен сеңээ Бурган дугайында өске чүүлдү ажыдар мен.

³ Чаяакчының чөптүг-шынныын көргүзер дээш, бодалдарымны ырактан шууштуруп эгелээр мен.

⁴ Мээң сөстеримде меге ылап-ла чок, билии четче-долу кижи сээң мурнуңда тур.

⁵ Бурган күчү-күштүг. Сүлде-сүзүү быжыг кижиден Ол ойталавас.

⁶ Бузуттугларны Ол дириг арттырбас, дарлаттырганнарга эрге-шөлээни хайырлаар;

⁷ чөптүг-шынныг улустан Ол көрүжүн чайлатпас, оларны хааннар саадаар дүжүлгеге олуртуп каар, кезээ мөңгеде өрү көдүрер.

⁸ А бир эвес олар бектеттирип, айыыл-халаптың кинчизинге туттуруп алган болза,

⁹ Бурган оларның ажыл-херектеринче, бузут-багынче, улуургаанче айтып турар-дыр;

¹⁰ оларның кулаан чемелээшкинни угаап билир кылдыр ажыдып, бачыттан адырлыр кылдыр дужаап турар-дыр.

¹¹ Бир эвес тооп дыңнап, Аңаа бараан болур болза, оларның чуртталгазының төнчүзү менди-чаагай болур, чурттап артар чылдары өөрүнчүг болур;

¹² а бир эвес тооп дыңнавас болза, хылыштан кырлып каарлар, угаан кирбээн хевээр өлүп каарлар.

¹³ Бургандан ойталаан улустуң чүрээн килең долган, оларны Ол кинчилеп-бектээрге, чалынмастар;

¹⁴ аныяанда-ла өлүп каарлар, самыын-садар бужар кижилер дег, амызы үстүрлер.

¹⁵ А түреңги кижини Ол түрегделин дамчыштыр адырар, ооң кулаан дарлал дамчыштыр ажыдып бээр.

¹⁶ Бурган сени база кызаа черден үндүрүп, моондак чок хостуг черже аппаар ийик; сээң столуңга чаагай аъш-чемни долдур салыр ийик.

¹⁷ А сен ам бузуттугларга айыткан шииткелди долузу-биле алыр сен, шүүгү биле шииткел сенче чоокшулаан-дыр.

¹⁸ Бурганның килеңи сени кезедип согарындан, элбек хээли оруктан өскээр аппаарындан кичээн.

¹⁹ Бурган сээң бай-байлааңга кандыг-бир өртек-үне бээр бе? Чок – алдынга-даа, эртине-байлактың кандыызынга-даа.

²⁰ Чоннарны узуткап чок кылыр шииткел дүнүн хей-ле күзээр-дир сен.

²¹ Бузуттуң аайынче киреринден кичээн, сени бо айыыл-халап-биле шенеп турар-дыр.

²² Бурганның күчү-күжү кайы хире өндүр бедик-тир! Ол ышкаш Башкы бар бе?

²³ Кым Аңаа орук айтып бээрил, кым Аңаа: „Сен багай үүлгедиг кылдың“ – дээрил?

²⁴ Ооң ажыл-херектерин алгап-йөрээрин утпа – улус ол ажыл-херектерни алгап ырлап,

²⁵ көрүп, ырактан кайгап магадап турар болгай.

²⁶ Бурганның өндүр улуу биске долузу-биле билдинмес, Ооң назы-харын билип ап шыдавас сен.

²⁷ Бурган сугнуң дамдыларын чыыптарга, олар чаъс-чаашкын бооп куттулар,

²⁸ булуттардан төктүп бадар, кижилерни чайыктар-биле өттүрер.

²⁹ Кым булуттарның көжүп турарын, Ооң чурттап турары дээрниң диңмирээрин билип ап шыдаарыл?

³⁰ Бо-дур, Ол кудайны кызаңнааш-биле чырыдып, далайның дүвүн дүмбей-биле дуглап тур.

³¹ Ынчалдыр Ол бүгү чоннарны чагырып турар, оларга аъш-чемни элбээ-биле хайырлап турар.

³² Ооң холундан чаңнык үнер – Ол кайнаар дужаай-дыр, ынаар соптар;

³³ Ооң келгенин диңмирээшкин чарлаар, мал-маган безин Ооң келгенин билип каар».