Иов 35 - Ыдыктыг Библия

Иов Бургандан шынныг эвес

¹ Элиуй чугаазын уламчылаан:

² «„Мен Бургандан шынныг мен“ – деп чугаалаары чөптүг чорук деп бодап тур сен бе?

³ „Бачыт үүлгетпезимзе, меңээ ажыктыг бе, кандыг ажык-дузалыгыл?“ – дээр-дир сен.

⁴ Мен сеңээ база сээң эш-өөрүңге харыылап көрейн:

⁵ дээрже көр даан, булуттарже топтап көр даан – олар сенден бедик-тир!

⁶ Бачыт үүлгеткен болзуңза, Бурганны канчанган деп сен? Кемниг херээң көвүдезе, Аңаа чүнү таварыштырар деп сен?

⁷ Чөптүг-шынныг болганың-биле Аңаа чүнү бээр сен, сээң холуң Аңаа чүнү хайырлап шыдаарыл?

⁸ Сээң бузуттуг-багың чүгле кижилерге хора чедирер, а чөптүг чорууң кижи амытанга дузалаар.

⁹ Улус кызагдакчыларга базындыргаш, човууртап, күштүглерниң холунуң адаандан алгырып турар.

¹⁰ Оларның кайызы-даа: „Мээң Чаяакчым Бурган кайыл, дүне биске ырлар хайырлап турар,

¹¹ бисти черниң аң-меңинден угаан-биле, дээрниң куштарындан – сарыыл-биле ылгай көрген демги Бурган кайыл?“ – дивес-тир.

¹² Базындырган улус алгыржыр-даа болза, бузуттугларның улуургаа дээш, Ол харыы бербес.

¹³ Бурган хоозун чугаа дыңнавас, Күчүлүг Бурган ону эскербес.

¹⁴ Сен канчап черле: „Ону көрбейн тур мен, мээң херээм Ооң мурнунда, шииткелди манап тур мен – дээр сен? –

¹⁵ Ооң килеңи ам-даа кыптыкпаан, кем-бурууже Ол кичээнгей салбайн тур“ – дээр сен?

¹⁶ Чок, Иов хоозун чүве чулчуруп, билиг чок сөстерин көвүдедип-ле турар-дыр».