Иов 34 - Ыдыктыг Библия

Бурганда чөптүг эвес шииткел чок

¹ Элиуй чугаазын уламчылаан:

² «О, мерген угаанныглар, мээң чугаамны дыңнаңар, сарыылдыглар, кичээнгейден салыңар.

³ Дылдың аъш-чемниң амданын шенеп чылгаары дег, кулак сөстерни ылгап дыңнап турар болгай.

⁴ Чөптүг шилилгеден аравыска кылыылы, эки чүве деп чүл дээрзин шиитпирлээли.

⁵ Иов мынча дээр-дир: „Мен шынныг мен, Бурган меңээ чөптүг шииткел үндүрбеди;

⁶ мен шынныг-даа болзумза, мегечи кижи дирттим, кем-буруу чок-даа болзумза, эмнеттинмес кылдыр балыглаттым“.

⁷ Иов ышкаш өске ындыг кижи бар бе? Ол дорамчылап кочулаан сөстерни суг дег ижиптер-дир;

⁸ хоойлу-дүрүм сагывас улус-биле катчып аар-дыр, бузуттуглар-биле кады чоруур-дур.

⁹ Чүге дээрге Иов: „Бир эвес кижи Бурганга тааржыр болза, аңаа кандыг ажык турарыл?“ – дээр-дир.

¹⁰ Ынчангаш мени дыңнаңар, угаанныг улус: Бурганда шынныг эвес чүве турбас, Күчүлүг Бурганда чөптүг эвес шииткел чок.

¹¹ Кижини Ол ажыл-херектерин ёзугаар аажылаар, аңаа кеземчени чогууру-биле онаар.

¹² Ылап шын бо-дур: Бурган бузут кылбас, Күчүлүг Бурган чөптүг шииткелди хажытпас.

¹³ Кым Аңаа черни чагырар кылдыр хүлээдип бергенил, кым Ону бүгү делегейниң бажынга салып кааныл?

¹⁴ Бир эвес Ооң сеткил-чүрээнге ындыг сагыш кирип, Ол Бодунуң Сүлдези, тыныжын дедир ап аар болза,

¹⁵ кандыг-даа амытан өлүп каар ийик, кижи доозун-довуракче эглип кээр ийик.

¹⁶ Угаанныг болзуңза, мени дыңна, мээң чугаа-сөзүмче кичээнгейден сал.

¹⁷ Бир эвес Бурган шынныг шииткелге хөңнү чок турган болза, Ол чагырып шыдаар бе? Чөптүг болгаш Күчү-күштүг Бурганны буруудадып болур бе?

¹⁸ Хааннарны Ол: „Бак кулугурлар!“ – дээр, нояннарны Ол: „Бузуттуг хейлер!“ – дээр.

¹⁹ Ол чагырыкчыларны тала-дугай тыртпас, ат-сураглыг кижини ядыы кижиден дээре деп санавас, олар шупту – Ооң холунуң чаяалгазы-ла болгай.

²⁰ Олар хенертен, дүне када өлүп каар; чон хөлзеп үнерге, олар чиде бээр. Күштүг-шыырак улус кижи холу дегбээнде-ле, узуткаттырып аар.

²¹ Бурган кижиниң оруктарын хайгаарап, бүгү базымнарын көрүп турар.

²² Бузуттуг-бак улус чаштына бээр хире дүмбей, муңгаш караңгы чер чок.

²³ Бурганның мурнунга кижиниң шииттирер дээш чедип кээри Аңаа херек чок –

²⁴ Бурган күштүг-шыырак улусту истелге чокка чылча шапкаш, оларның орнунга өскелерни көдүрүп турар;

²⁵ оларның ажыл-херектерин Ол билир болгаш, чаңгыс дүне чылча базып каар.

²⁶ Бурган оларны улуска көзүлдүр, херектеннерни дег согар –

²⁷ Оон ойталааны дээш, Ооң бүгү оруктарын билип алыксавааны дээш кезедир.

²⁸ Чүге дээрге ядыыларның алгы-кышкызы Аңаа четкен-дир, дарлатканнарның уё-човуурун Ол дыңнап каан-дыр.

²⁹ А бир эвес Ол ыыт чок артар болза – кым Ону буруудадырыл? Бир эвес арнын чажырар болза – кым Ону көөрүл? Чон-биле-даа, чаңгыс кижи-биле-даа ындыг болур –

³⁰ Бургандан ойталаан кижи хааннавазын дээш, улусту какпа-дузакка туттурбазын дээш, ындыг болур.

³¹ Бурганга мынча дээри эки эвес бе: „Мен кеземче алдым – моон соңгаар бачыт үүлгетпес мен;

³² көрбейн турар чүвемни меңээ көргүзүп көрем, бак чүве кылган болзумза, моон соңгаар кылбас мен“.

³³ Чүү деп бодаар сен, бурууң билинмес болзуңза, Ол сеңээ шаңнал бээр деп бе? Шилилгени мен эвес, сен кылыр ужурлуг сен, билир чүвең бар болза, чугаалап бер.

³⁴ Сарыылдыг улус база мени дыңнап турар мерген угаанныг кижи:

³⁵ „Иов билбес чүвезин чугаалап тур, ооң сөстери шуут бодал чок-тур“ – дээр.

³⁶ Бак хейлер дег харыылап турары дээш, Иов шылгалданы төнчүзүнге чедир эртсин:

³⁷ бачыдынга ол үймээнни немеп алган-дыр, бисти кочулап, адыш часкап, Бурганга удур чугаа-сөзүн көвүдедип турар-дыр».