Иов 33 - Ыдыктыг Библия

Бурган кижи амытандан өндүр бедик

¹ «Ындыг болганда, мээң чугааларымны дыңна, Иов, мээң бүгү сөстеримче кичээнгейден сал!

² Дыңна-ла, аксымны бөгүн ажыдып тур мен, өк-дылым чугаалап эгеледи.

³ Мээң сөстерим ак сагыштан үнүп турар, аксым арыг билиг чугаалап турар.

⁴ Бурганның Сүлдези мени чаяап каан, Күчүлүг Бурганның тыныжы мени тынгарып каан.

⁵ А сен, шыдаар болзуңза, меңээ харыыла, белеткенип алгаш, меңээ удурлан.

⁶ Бурганның мурнунга мен сен дег мен – ол-ла дойдан мени база кылып каан.

⁷ Менден коргуушкунуң сени хөлзетпес, мээң холум сеңээ аар болбас.

⁸ Сээң чугааңны мээң кулаам дыңнап каан, сээң үнүң меңээ дыңналып турду:

⁹ „Мен арыг мен, бачыт үүлгетпээн мен, кем-буруу, бузут-багым чок!

¹⁰ А Бурган меңээ удур бир-ле чылдак дилеп тып, мени Бодунуң дайзыны деп санаар-дыр.

¹¹ Ол мээң будумну кинчилеп каан, мээң оруумну базым санай харагалзап турар“.

¹² А мээң сеңээ харыым бо-дур: сээңии шын эвес-тир, Бурган кижи амытандан өндүр бедик болгай!

¹³ Сен Ооң-биле чүү дээш маргыжар сен, канчап: „Кижиге кандыг-даа харыы бербейн тур“ – дээр сен?

¹⁴ Бурган катап-катап-даа чугаалаарга, кижи билип албас-тыр.

¹⁵ Уйгу-дүште, дүнеки көстүүшкүннерде, улус ханы уйгуга алзыпканда, орун-дөжээнге удумзурап чыдырда –

¹⁶ Бурган оларның кулаан ажыдып, сагындырыглар-биле коргудар.

¹⁷ Кижини үүлгедиглеринден чайладыр дээш, улусту улуургаар чоруктан адырар дээш;

¹⁸ тамыже кээп дүжерин болдурбас дээш, хылыштан кырлып каарын болдурбас дээш, ынчаар кылып турар.

¹⁹ Азы кижи дөжекке чыдырда, ону аарыг-биле, сөөктериниң соксаал чок аарышкызы-биле билиндирер;

²⁰ ынчан ол кижи чемден хөңнү калыр, амданныг аъш-чем аңаа ческинчиг боор;

²¹ ооң эът-боду каракка көзүлдүр эстип-шүглүр, мурнунда билдирбес турган сөөктери көстүп кээр;

²² ооң амы-тыны чевегже кирер деп баар, өлүглер оранынче чоокшулап-ла олурар.

²³ Ынчалза-даа дээрниң төлээзи – кижилерге дорт орукту айтып берип турар болчукчу, муң төлээниң бирээзи – ол кижиниң талазында болза,

²⁴ төлээ олче ээ көрнүп: „Ону хостап салывыт, ол чевегже кирбезин, мен ол дээш төлевир тып алдым“ – дээр;

²⁵ ынчан ооң мага-боду аныяанда турганы дег апаар, ооң чалыы үези эглип кээр;

²⁶ ынчан ооң мөргүлү Бурганга таарымчалыг болур, Бурганның шырай-арныңче көрүп алгаш, ол өөрүп-байырлаарга, Бурган ону чөптүг чоруу дээш шаңнаар.

²⁷ Ынчан ол кижи улус мурнунга келгеш, мынча дээр: „Бачыт үүлгеттим, эки чүүлдү хажыттым, ынчалза-даа Ол мени үүлгедиглерим дээш кезетпеди;

²⁸ Ол мээң амы-тынымны чевегже кирбес кылып, чуртталгамда чырыкка таалаар-дыр мен!“

²⁹ Бурган ол бүгүнү кижи дээш кылып турар – ийи-даа катап, үш-даа катап,

³⁰ ооң амы-тынын чевегден чайладып, амылыглар оранының чырыы аңаа чырызын дээш, кылып турар.

³¹ Кичээнгейиң менче угла, Иов, мени дыңна, чугаалап турумда, ыыттава.

³² Бир эвес чугаалаар чүвең бар болза – харыыла, мен сээң шынныыңны өөрүшкүлүг хүлээп көөр мен.

³³ А чок болза – мени дыңна; ыыттавайн көр, мен сеңээ мерген угаанны башкылаайн».