Иов 32 - Ыдыктыг Библия

Элиуйнуң чугаазы: Иовтуң эштери аңаа төлептиг харыы бербеди

¹ Үш эжишки Иов-биле маргыжарын соксаткан, чүге дээрге ол бодунуң шынныынга бүзүрээр болган.

² Ынчан Бузтуң үре-салгалы, Рам төрел бөлүкке хамааржыр Варахиилдиң оглу Элиуй килеңней берген. Ооң килеңи Иовче – ол Бурганны эвес, а бодун шынныг деп санап турганы дээш – хайныккан.

³ Элиуй Иовтуң үш эжинче база – олар эжинге таптыг харыылап шыдавайн, Бурганны буруулуг кылдыр көргүзүп турганы дээш – хорадай берген.

⁴ Ынчалза-даа Элиуй Иов-биле дораан чугаалажып эгелевээн, чүге дээрге демги үш эжишки оон улуг назылыг турган.

⁵ А оларда удур харыылаптар чүве чогун көргеш, ооң килеңи хайныга берген.

⁶ Ынчан Бузтуң үре-салгалы, Варахиилдиң оглу Элиуй мынча деп харыылаан: «Мен аныяк мен, а силер – улуг назылыг силер; ынчангаш коргуксап, билир чүүлүм чугаалаарындан тырттылып турдум.

⁷ Мен „Кыраан назын чугаалазын, чөнээн назын мерген угаанга өөретсин“ деп бодадым.

⁸ Ындыг-даа болза, кижиде бар сүлде – Күчүлүг Бурганның тыныжы кижиге угаанны берип турар.

⁹ Мерген угаан албан-на кыраан назын-биле кады келбес, алыс шынны аныяанда-даа билип ап болур.

¹⁰ Ынчангаш ам мен чугаалаайн, а силер дыңнаңар, билир чүвемни мен база силерге ажыдайн.

¹¹ Мен силерни шыдамык дыңнап келдим, сөстериңерни топтап бодап ап туруңарда, бодалдарыңарже кичээнгей салып,

¹² силерже топтап көрүп турдум. Ынчалза-даа кайыңар-даа Иовтуң сөстерин буруу шаппады, ооң сөстеринге төлептиг харыы бербеди.

¹³ Ынчангаш: „Мерген угаан тып алдывыс – кижи эвес, а Бурган ооң буруузун илеретсин“ – дивеңер.

¹⁴ Ол меңээ чугаалаваан-дыр, мен болза аңаа силер ышкаш харыылавас ийик мен.

¹⁵ Бо улус аңгадай берди, харыылаптар чүвези чок-тур – сөстери артпаан-дыр.

¹⁶ Ам чүнү манаар мен – олар ыытташпас, чүнү-даа чугаалавас ышкажыл?

¹⁷ Мен база бодумнуң ээлчээмде чугаалаайн, мен база билир чүвемни ажыдайн.

¹⁸ Сөстер мени чык дола берген, ишти-хөңнүмде сагыжым мени амыратпайн тур.

¹⁹ Сеткил-чүрээм ажып-хөөреп турар арага дег, чарлыр четкен чаа көгээржик дег.

²⁰ Чугаалапкаш, сагыжым оожургаар; аксым ажыдып, харыылаптайн!

²¹ Мээң мурнумда кым-даа турза, тоовас мен, кымга-даа чашпаалавас мен.

²² Чашпаалап билбезим-не шын, оон башка Чаяакчым мени дораан узуткап каар ийик!»