Иов 3 - Ыдыктыг Библия

Иовтуң бодунуң төрүттүнген хүнүн каргааны

¹ Ооң соонда Иов чугааланып эгелээш, бодунуң төрүттүнген хүнүн каргап каапкан.

² Ол мынча дээн:

³ «Мээң төрүттүнген хүнүм чиде берзин, „Оол ботталды!“ дээн дүн база читсин.

⁴ Ол хүн дүмбей караңгы бооп хуулзун, дээрде Бурган ону сагынмазын, чырык ол хүн чырытпазын!

⁵ Ол хүн дүмбейге алзып алзын, ону коргунчуг караңгы бүргей апсын, булут шыва апсын, хүн туттуруушкуну коргудупсун!

⁶ Ботталганым дүннү дүмбей хөме апсын, чылдың бир хүнү кылдыр ол санаттынмазын, айлар санаашкынынче ол кирбезин!

⁷ Ол дүне үре-төл ботталбас болзун, өөрүшкүнүң ыыткыр алгызы аңаа дыңналбазын!

⁸ Левиафанны оттуруп шыдаар илби-шидичилер, хүннерге каргыш салыр кижилер ол дүннү база каргап каапсын!

⁹ Ол дүннүң эртенги сылдыстары өжүп калзын, даң адарын ол хей-ле маназын, эртенги хаяаның чырыш дээрин көрбезин!

¹⁰ Чүге дээрге ол үе төрүттүнеримни болдурбайн барбаан-дыр, човалаңны менден чажырып кааппаан-дыр.

¹¹ Чүге-ле мен төрүттүнеримде өлү бербээним ол, иемниң иштинге-ле өлүп калбааным ол?

¹² Чүге мени хойнунга олуртуп, эмиг сүдү-биле эмзирип турганыл?

¹³ Ынчан бүрлүп калган болзумза, ам амыр-дыштыг чыдар ийик мен, чыргал көрүп, удуур ийик мен;

¹⁴ чер-делегейниң хааннары, ызыгууртаннары-биле – ам буступ калган тудуглар кылып каан чагырыкчылар-биле кады;

¹⁵ бажыңнарын мөңгүн-биле долдуруп, алдын чыып турган нояннар-биле кады удуур ийик мен.

¹⁶ Дүжүрген уругну дег, чырык көрбээн чаш төлдү дег мени ажаап каары кай!

¹⁷ Өлүглер оранынга бузуттугларның чедирген дүвүрели оожургаар, могап-шылааннар дыжын көөр.

¹⁸ Хоругдаттырганнар аңаа кады оожургап, дарлакчының үнүн дыңнавастар.

¹⁹ Аңаа чөгенчиг-даа, өндүр улуг-даа кижи дең болур, кул кижи дээргизинден хостуг болур.

²⁰ Чүге-ле човалаң көрген кижиге чырыкты бергенил, сеткили хинчектенген кижиге чуртталганы бергенил?

²¹ Ындыглар өлүмнү четтикпейн манаарга-даа, келбес, ону үнелиг шыгжагдан кызып дилээрге-даа, тывылбас.

²² Чевегни тып алгаш, ол хөөкүй хөглеп, өөрүп-байырлап шаг боор.

²³ Ындыг хөөкүйнүң оруу муңгаш, Бурган аңаа бүгү таладан шаптараазын тургузуп каан.

²⁴ Ам мээң човуурум аъш-чемимни солуду, караам чажы суг дег агып тур.

²⁵ Коргуп турган чүвем меңээ таварышты, сүртеп турган чүвем мени хөме апты.

²⁶ Меңээ оожургал-даа, амыр-дыш-даа, тайбың-даа чок – чүгле дүвүрээзин!»