Иов 28 - Ыдыктыг Библия

Мерген угаан дилээшкини

¹ «Ийет, мөңгүн казар уургай бар, алдын арыглап, эзилдирер суугу бар.

² Демирни черден казып тывар, чести даштан эзилдирер.

³ Казыкчылар дүмбейни чырыдып тургаш, эртине даш дилеп, эң ханы караңгы черлерже кирип турар;

⁴ кижи буду баспаан черге өдүглер казып, ынаар ханылап киргеш, улустан ыракта хендирлерде чайганып турарлар.

⁵ Черниң кырында тараа өзүп үнүп турар, а ооң адаан от-биле хайылдырып каапкан дег:

⁶ ооң даштарында сапфирлер чыдымы бар, үүрелчек борбак алдын база ында чыдар.

⁷ Ынаар чедер орукту эзир куш хайгыылдап билбээн, хартыганың караа көрүп билип албаан;

⁸ чоргаар аң аңаа базып чорбаан, арзылаң аңаа кылаштаваан.

⁹ А кижи кадыг хая-дашче холун көдүрүп, дагларны дөзүнден тура тыртып турар;

¹⁰ чалым-хаяга өдүглер оя шаап аар, эртине даштарны ооң караа көрүп каар.

¹¹ Кижи хемнерниң ханы дүвүн ажыдып турар, чажыт чүүлдү чырыкче үндүрүптер.

¹² А мерген угаанны кайыын тып аарыл, угаан-сарыыл кайда турарыл?

¹³ Кижи амытан ооң үнезин билбес, дириглер оранынга кижи ону тыппас.

¹⁴ Дүп чок ээрем: „Ол менде чок“ – дээр, далай: „Менде база чок“ – дээр.

¹⁵ Ону арыг алдын-биле-даа садып ап шыдавас сен, ооң өртээ кылдыр мөңгүн-даа деңзилеп берип шыдавас сен;

¹⁶ ону Офирден эккелген алдын-биле, эртине даштар – оникс, сапфир-биле садып ап шыдавас сен;

¹⁷ ооң өртээ алдын болгаш шил-биле доктааттынмас, ону улуг үнелиг сава-биле орнап албас.

¹⁸ Кораллдар, эртине-шуру дугайында чугаалап-даа канчаар, мерген угаанны тып аары рубиннер тыварындан-даа берге;

¹⁹ Ооң өртээ Эфиопияның топаз даштары-биле деңнеттинмес, ону арыг алдын-биле садып ап шыдавас сен.

²⁰ Мерген угаан кайыын чедип кээрил? Угаан-сарыыл кайда турарыл?

²¹ Ол бүгү дириг амытаннар караандан чажыртынган, дээрниң куштарындан безин ол чажыртынган.

²² Тамы база Өлүм: „Ооң дугайында чүгле улус чугаазы дыңнаан бис“ – дээр.

²³ Угаан-сарыылче чедер орук чүгле Бурганга билдингир, ооң кайда турарын чүгле Ол билир;

²⁴ Бурган чер-делегейниң ужу-кыдыынга чедир көрүп турар, чырык черде бүгү чүве база Аңаа көскү.

²⁵ Кажан Ол хатты күш киирип, сугларның кызыгаарын тургузуп тура,

²⁶ кажан чаъстарга дүрүм доктаадып, чаңнык-диңмирээшкинге орук айтып тура –

²⁷ ынчан Ол мерген угаанны көрүп кааш, ону үнелээн, ону доктааткаш, шенеп көрген.

²⁸ А кижи төрелгетенге Бурган мынча дээн: „Дээргиден коргары – мерген угаан ылап ол-дур, бузуттан чайлаары – угаан-сарыыл ол-дур“».