Иов 24 - Ыдыктыг Библия

Бурган бак улусту доктаатпайн турар

¹ «Чүге Күчүлүг Бурган шииткел үелери доктаатпааныл? Чүге Ону билир улус Ооң хөделир хүннерин көрбезил?

² Бузуттуглар чер кызыгаары демдеглээн даштар чылдырып, оорлап алган кодан малын боттарыныынга немеп ап турар-дыр;

³ өскүстерниң элчигенин сүрүп аппарып, дулгуяк херээженниң шарызын долаага ап аар-дыр;

⁴ ядыы кижини оруктан дүжүр идиптер-дир, чер кырында бүгү түреңги улус чаштынар ужурга таваржыр-дыр.

⁵ Ээн ховуда черлик элчигеннер ышкаш, ядыылар ажык-тывышче үнүп, аъш-чем дилеп чоруп каар, хову оларны ажы-төлү-биле катай чемгерип турар;

⁶ олар хары улустуң шөлүнден дүжүт мажактап ап, бузуттугларның виноградының артыын чыып ап турар;

⁷ хеви чок болгаш, чанагаш удуп чыдып аарлар, соокта шугланыптар чүвези чок;

⁸ дагларга чаъска өдүп турарлар, чаглак чогундан чалым-хаяже сыңнырлар.

⁹ Бузуттуглар ядыы кижиниң төлүн өре дээш долаага ап, адазы чок төлдү эмзирип турар иезинден хунаап аппарып турар.

¹⁰ Ядыылар хеп чок болгаш, чанагаш чоруп турар, хары кижиниң тараа моожаларын дажып тургаш, боттары аш артар;

¹¹ оливадан ханалар аразынга үс сыскырып, оңгарга виноград сыскырып тура, суксаарлар.

¹² Хоорайда өлүп чыдарлар човууртап, балыглатканнар дуза дилеп кыйгырып турар, а Бурган ону херекке албас-тыр.

¹³ Чырыкка удур тура халаан, Ооң оруктарын билбес, Ооң кокпаларын истевес улус бар.

¹⁴ Өлүрүкчү кижи эртенги имиртиңде туруп келгеш, түреңги күжүрнү, ядамыкты өлүрүп каар, а дүне када оорланыр.

¹⁵ Самыын кижи имир дүжерин манаар; ол „Мени кым-даа көрбес“ деп бодаар, арнын чажырып аар.

¹⁶ Оорлар дүне када өске улус бажыңнарынче кирер, а хүндүс чаштына бээр. Ындыглар чырыкты биликсевес.

¹⁷ Оларның шуптузунга дүмбей караңгы эртен дег, олар дүмбейниң коргуушкуннары-биле таныжар.

¹⁸ Бузуттугларны агым суг чииги-биле аппаар, оларның хувааглыг чери каргаттырган, бүгү улус оларның виноградының шөлүнден хая көрнүр.

¹⁹ Кааңнаашкында, изигде хар суу бусталып, чиде бээр – бачыттыгларны өлүглер ораны ынчалдыр сыырыптар.

²⁰ Төрээн иези оларны уттуптар, курт оларны амданнанып чиир, олар дугайында сактыышкын артпас – бузуттуг-бак чорук ыяш дег сыйлып каар.

²¹ Бурган ажы-төл чок, төл төрүвес салымныг херээженни болгаш эки салым эдилевээн дулгуяк херээженни карактап чоруур.

²² А күштүглерни Бодунуң күжү-биле узуткаашкынче сөөртүр, олар туруп-даа келзе, дириг артар бүзүрели чок болур.

²³ Бурган оларга айыыл чок чорукту, чөленгиишти хайырлаза-даа, Ооң караа оларның оруктарынче көрүп турар.

²⁴ Хензиг өйде көдүрлүрлер – бир көөрге, чок боорлар: кээп дүжерлер, бүгү улус дег өлүп каарлар, тараа баштары дег кестирип аарлар.

²⁵ Ындыг эвес деп бе? Кым мээң мегем тударыл, кым мээң чугаамны чүү-даа эвес кылып каарыл?»