Иов 23 - Ыдыктыг Библия

Иовтуң чугаазы: Бурганны тып ап шыдавазым ол-дур

¹ Иов мынча деп харыылаан:

² «Мээң хомудалдарым ам-даа ажыг хевээр-дир, Бурганның холунуң аарындан човууртап тур мен.

³ О, Ону кайыын тып аарын билир турган болзумза, Ооң дүжүлгезиниң мурнунче чеде берген болзумза!

⁴ Мен Ооң мурнунга херээмни илередип, хомудалдарымны бүрүнү-биле чугаалаар ийик мен.

⁵ Ооң харыызын дыңнап аар, Ооң чугаалаан чүвезин билип аар ийик мен.

⁶ Ол Бодунуң бүгү күчү-күжү-биле меңээ удур чаргылдажыр бе? Чок! Ол мени дыңнаар ийик.

⁷ Ынчан актыг кижи Ооң-биле чаргылдажып шыдаар боор ийик, Шииткекчимден кезээ шагда адырлып аар ийик мен.

⁸ Чөөн чүкче-даа чоруптарымга, Ол ында чок-тур, барыын чүкче-даа баргаш, Ону тыппас-тыр мен.

⁹ соңгу чүкте бир үүле бүдүрүп турар бе – көрбес-тир мен, мурнуу чүкче ээпкен бе – эскербес-тир мен.

¹⁰ А мээң оруум Аңаа билдингир; Ол мени шенеп эзилдирзин – алдын ышкаш арыг үнер мен.

¹¹ Ооң изин истеп чораан мен, Ооң оруундан чайгылбайн, эдерип келген мен.

¹² Ооң айтыышкыннарындан ойталаваан мен, Ооң сөстерин хөрек-чүрээмде шыгжап чоруур мен.

¹³ Бурган шиитпирлеп каан-дыр – Ооң шиитпирин кым өскертирил? Ол күзээн-не чүвезин кылып турар-дыр.

¹⁴ Ол меңээ онааган шииткелин боттандырар, ындыг чүүлдер Ооң угаан-сагыжында хөй.

¹⁵ Ынчангаш мен Оон коргар-дыр мен, ол дугайында бодап келгеш-ле, сүрээдээр-дир мен.

¹⁶ Бурган сеткил-чүрээмни дидим эвес кылыпкан, Күчүлүг Бурган мени коргуушкун-биле бүргепкен.

¹⁷ Караңгыга чиде бээрим кай, дүмбей караңгы мээң караамны дуглап аары кай!»