Иов 21 - Ыдыктыг Библия

Иовтуң чугаазы: Бурган бузуттугларны кезетпейн турар

¹ Иов мынча деп харыылаан:

² «Мээң сөстеримни кичээнгейлиг дыңнаңар, оода ооң-биле хөңнүм чазаңар.

³ Чугаалап турумда, шыдажып көрүңер, а ыыттавайн баарымга, кочулап болур силер.

⁴ Мен кижиге хомудап тур мен бе? Менде хорадаар чылдак чок бе?

⁵ Менче көргеш, аңгадай бериңер, холуңар-биле аксыңар дуглап алыңар.

⁶ Мону бодап келгеш-ле, сеткилим хөлзээр-дир, мага-бодум сириңейнип эгелээр-дир:

⁷ бузуттуг-бак улус чүге үр чурттаарыл, кыраан тудум, оларның күш-шыдалы чүге улгадырыл?

⁸ Ажы-төлү олардан чарылбас, үре-салгалын көрүп чоруурлар.

⁹ Оларның аалдарынче коргунчуг айыыл халдавас, Бурган мергези-биле оларга кыжанмайн турар.

¹⁰ Бугалары инектерни боозадыптарга, шупту чаш төлдүг болур, кайызы-даа ара салбас.

¹¹ Бузуттугларның ажы-төлү, хураганнар дег, хөглүг чүгүржүп ойнаар, чаш уруглары самнап шурап турар;

¹² хөгжүм херекселдеринге үдеткеш, ырлажып, ойнап-хөглеп турарлар.

¹³ Ол улус чуртталгазын аас-кежиктиг эрттирип, өлүглер оранынче сагыш амыр кирип турар.

¹⁴ А Бурганга олар: „Ыңай бар! Сээң оруктарыңны билип аар хөңнүвүс чогул.

¹⁵ Бурган деп кымыл ол, чүге Аңаа бараан болур бис, Аңаа мөргээн ажыы чүл?“ – дижир-дир.

¹⁶ Олар боттары аас-кежиин эдилеп турар эвес бе? Бузуттугларның бодалдары менден ырап чорзун!

¹⁷ Ындыгларның чырыткызы болганчок өжүп турар бе? Айыыл-халап оларны удаа-дараа таварыыр бе? Бурган килеңнээш, оларны хилинчекке чыгаар бе?

¹⁸ Олар хатка сывыртаткан тараа саваңы дег, казыргыга тарай шаптырган тараа дүгү дег бе?

¹⁹ Бурган кеземчени оларның үре-салгалынга арттырып каан бе? Бузуттугнуң бодун Ол кезеткен болза! – демгизи ону билип алзын;

²⁰ өлүмүн бодунуң караа-биле көрүп кагзын, Күчүлүг Бурганның килеңин аас дизин.

²¹ Чүге дээрге кижи өлген соонда, ооң чуртталгазының хуусаазы төнүп каарга, ук-салгалынче сагыш салыр эвес.

²² Бурганны канчап билигге өөредирил, Ол дээди күштерни-даа шиидер-дир.

²³ Бир кижи күш-шыдалы четчип-бышкан үезинде амыр-шөлээн, сеткили ханган өлүп каар;

²⁴ ооң мага-боду улуг-чаагай, мөчү-сөөгүн чилиг долган.

²⁵ А өске кижи сагыш-сеткили качыгдап, аас-кежик амзап көрбейн өлүп каар.

²⁶ Олар ийилээн черге чыдып аар, курттар ийилдирзинге чыпшына бээр.

²⁷ Чүнү бодап турарыңарны-даа, меңээ удур оптуг аргаңарны-даа билир мен.

²⁸ Силер: „Ноянның оран-савазы ам кайыл, бузуттуглар чурттап турган бажың кайыл?“ – дээр-дир силер.

²⁹ Аян-чорукчулардан айтырбааныңар ол бе, оларның херечилээнин дыңнавааныңар ол бе:

³⁰ бузуттуг кижи айыыл-халап хүнүнде дириг-менди артар, Бурганның килеңиниң хүнү ону оюп эрте бээр!

³¹ Кым ындыг кижиге шынны дорту-биле чугаалаарыл, ооң үүлгеткен херектери дээш кеземче онаарыл?

³² Ону хүндүткел-биле аппарып ажаагаш, чевээнге таңныыл тургузуп каар-дыр.

³³ Хөөрнүң довураа аңаа чымчак кавай болур, мөөң чон ооң соондан эдерип чоруур, ооң мурнунда бар чыдарлар эмге-тикчок.

³⁴ Ынчаарга хоозун аргалалыңарның меңээ херээ чүл? Харыы сөстериңер бүрүнү-биле меге-дир!»