Иов 20 - Ыдыктыг Библия

Софарның чугаазы: бак кижиге Бургандан кандыг үүле-салым кээрил

¹ Наама чурттуг Софар мынча деп харыылаан:

² «Дүвүренчиг бодалдарым харыыла деп албадап тур, хөлзээшкиним мени амыратпастады.

³ Мени дора көрген чемелелди дыңнап тур мен – угаан-сарыылым мени харыыла деп тур.

⁴ Шаг шаандан бээр, Бурган чер кырынга кижини чурттадып каандан бээр кандыг турганын билбес эвес сен –

⁵ бузуттуг-бак кижиниң хөглээшкини үр болбас, Бурганны тоовас кижиниң өөрүшкүзү бичии када болур.

⁶ Ооң улуургаа кудай-дээрге чедер-даа болза, ол бажы-биле булуттарга үзер-даа болза,

⁷ бодунуң мыяа ышкаш, кезээ мөңгеде чиде бээр, ооң мурнунда ону көрген улус: „Ол кайыл?“ дижир.

⁸ Дүш ышкаш, ол ужуп чоруй баргаш, тывылбас, дүнеки көстүүшкүн дег, чиде бээр;

⁹ ону көрүп турган кижи оон ыңай көрбес, чурттаан чери база ону оон ыңай көрбес.

¹⁰ Ооң ажы-төлү ядыылар мурнунга чашпаалаар, ол бодунуң холу-биле чыып алган байлаан эгидип бээр.

¹¹ Мага-бодунда сиңген аныяк күш-шыдалы ооң-биле кады довуракче хөмдүне бээр.

¹² Бузут ындыг кижиниң аксынга амданныг, ол ону дылының адаанга чажырып аар,

¹³ ону камнап, үндүр октавайн, аксының иштинге кадагалаар болза,

¹⁴ ындыг аъш-чем ооң иштинге чылан хораны бооп хуула бээр.

¹⁵ Ол сыырыпкан байлаан кузуптар – Бурган ону ооң иштинден ушта соп аар.

¹⁶ Ол чылан хораны сорар, чыланның дылы ону өлүр шап каар.

¹⁷ Ол эки чүүлдерни – агым сугларны, ары чигири биле сүт аккан хемнерни көрбес.

¹⁸ Байып алган чүвезин ол амзавайн эгидип бээр, садыглаашкындан алган олча-ажыы ону өөртпес.

¹⁹ Чүге дээрге ядамыктарны дарлаар, каапкаш баар, бодунуң тутпааны бажыңнарны ээлеп аар турган-дыр.

²⁰ Бак кижиниң хырны тодарын билбес, алыксак-чиксээ кызыгаар билбес.

²¹ Ооң чазый аксындан кым-даа камгаланып шыдаваан, ынчангаш ооң аас-кежии уламчылавас.

²² Бай-шыдалдыг чурттап олурда, ону айыыл-халап таварыыр, хомудалдыг бүгү улустуң холу олче көдүрлүр.

²³ Ол хырнын долдур дыгып аарга, Бурган Бодунуң кыптыккан килеңин олче ыдар, ооң мага-бодунче согуушкунун чайык дег кудар.

²⁴ Бир эвес ол демир хылыштан дезе бээр-даа болза, хүлер согун олче кадалыр;

²⁵ согун ооң ооргазындан үнүп кээр, кылаңайнып, өдүнүң хавын өде бээр – ынчан ону коргуушкуннар хөме аптар!

²⁶ Дүмбей караңгы чаштып алгаш, ону манап турар, ону кижи холу кывыспаан от чиптер, ооң аалында арткан бүгү чүвени өрттедиптер.

²⁷ Дээр ооң кем-буруузун ажыдыптар, чер аңаа удур херечилээр.

²⁸ Ооң бажыңында бүгү байлаан хунаап аппаар, Бурганның килеңиниң хүнүнде ол байлак чиде бээр.

²⁹ Бузуттуг-бак кижиге Бургандан келген үүле-салым, Ооң доктаатканы үлүг ол-дур!»