Иов 19 - Ыдыктыг Библия

Иовтуң чугаазы: Камгалакчым меңээ болчуп кээр

¹ Иов мынча деп харыылаан:

² «Мени кайы хире үр хилинчектээр силер, сөстериңер-биле човалаңга таварыштырар силер?

³ Он катап мээң сеткилимни хомудаттыңар, мени кызагдаарындан ыятпас-тыр силер.

⁴ Бир эвес ылап-ла бачыт кылган болзумза, бачыдым мээң-биле артып каар ийик.

⁵ Бир эвес ылап-ла мээң мурнумга өрү көрдүнүп, адым баксырааны дээш мени чемелеп турар болзуңарза,

⁶ билип алыңар: мени Бурган бак аажылаан-дыр, Ооң четкизи мени ораап алган-дыр.

⁷ „Ат кылып турлар!“ деп алгырарымга, харыы чок-тур. дуза дилеп кыйгырарымга, шынныг шииткел чок-тур.

⁸ Бурган мээң оруумну боогдап алган – эрттинмес-тир, кокпаларымны дүмбей-биле шып каан.

⁹ Алдар-хүндүнү менден дүжүр тырткаш, бажымдан одагамны ушта соп алган.

¹⁰ Чер болгандан мени соп тур – өлдүм-не! Идегелимни, ыяш ышкаш, тура тыртып каапкан.

¹¹ Ооң килеңи менче кыптыккан, Ол мени дайзыны кылдыр санап алган.

¹² Ооң шериглери чыглып алган, менче халдап кел чыдар, менче орук изеп, мээң аалымны бүзээлеп турар.

¹³ Ха-дуңмамны Ол менден ырадып каапкан, таныш-көрүштерим мени өскелээр апарган;

¹⁴ чоок кижилерим мени каапкаш барган, өөрлерим уттупкан.

¹⁵ Бажыңымда шаандагы аалчыларым, кыс хөделдерим мени өске кижи деп санап, хары кижиже дег көрүп тур.

¹⁶ Чалчамны кый дээримге, харыылавас-тыр, аңаа чанныр ужурга таваржыр-дыр мен.

¹⁷ Мээң тыныжым кадайымның хөңнүнге дээпкен, кады төрээннерим менден чүдексинер-дир;

¹⁸ бичии уруг-дарыг безин мени тоовас-тыр, көстүп кээрим билек, дорамчылап кочулаар-дыр.

¹⁹ Чоок эштерим менден ческинер-дир, ынак чораан улузум меңээ удур апарды.

²⁰ Дөрт сөөк апардым, мээң амы-тыным үстүр четти.

²¹ Кээргеңер! Мени кээргеп көрүңер, эш-өөрүм. Бурганның холу меңээ удур-дур:

²² чүге мени, Бурган ышкаш, истеп-сүрүп тур силер, мага-бодумну хемдээш, тотпайн тур силер?

²³ О, мээң сөстеримни бижип каан болза, оларны дүрүг-номга шыйып кагза;

²⁴ демир кески-биле коргулчунга оя кезип, дашка мөңгези-биле оюп кагза!

²⁵ А мен билир мен – Камгалакчым дириг, адак сөөлүнде Ол чер кырынга меңээ болчуп чедип кээр! Кежим сойлу бээрге безин,

²⁶ мага-бодумдан чарлып тура, Бурганны көрүп каар мен.

²⁷ Мен Ону бодум көрүп каар мен, өске кым-даа эвес, бодумнуң караам-биле көрүп каар мен. Хөрээмде чүрээм туруптарының кырында келди!

²⁸ А силер мени истеп-сүрүксеп, айыыл-халавым дээш бодумну-ла буруудадып тур силер –

²⁹ ындыг болганда, хылыштан коргуңар, килеңни хылыш-биле кезедир болгай; силерни шиидип каар деп билип алыңар».