Иов 13 - Ыдыктыг Библия

Иовтуң эштериниң чугаа-сооду хоозун

¹ «Мен бодум база ол бүгүнү көрген болгай мен, ол бүгүнү дыңнаан, билип алган болгай мен.

² Силерниң билир чүвеңерни мен база билир мен, силерден дорайтаар чүм-даа чок.

³ Ынчалза-даа Күчүлүг Бурган-биле чугаалажыксадым, Ооң-биле мээң херээм дугайында маргыжыксадым.

⁴ А силер мени меге-биле ораап-шарып тур силер, шуптуңар ажык чок эмчилер-дир силер.

⁵ О, силер шупту ыыттавайн барган болзуңарза! Силерниң мерген угаанныыңар ол боор ийик.

⁶ Мээң барымдааларымны хандыр көрүңер, чемелелдиг чугаамны дыңнаңар.

⁷ Бурганга силерниң мегеңер херек бе, Ол дээш мегелээр силер бе?

⁸ Ооң талазында болуп, чаргы-чаалызынга Ону камгалаксап тур силер бе?

⁹ Бурган силерни шенээр болза, та канчап баар силер. Кижини дег, Ону дуурайлаар силер бе?

¹⁰ Бир эвес чажыды-биле чөптүг эвес көөр болзуңарза, Ол силерни албан чемелээр.

¹¹ Ооң өндүр бедии силерни коргудуп, Ооң ыдыпканы коргуушкун силерни бүргей аптар-дыр.

¹² Силерниң чугаа-соодуңар – ыйба-хүл дег-дир, камгалалыңарны дойдан кылган-дыр.

¹³ Ыыттаваңар, ам мен чугаалаайн, а ооң соонда мээң-биле болур чүве болуп турзун!

¹⁴ Бодумну кончуг улуг айыылга таварыштырып тур мен – амы-тынымны адыжымда салып алдым.

¹⁵ Бурган мени өлүрүп каар-дыр, идегел чок-тур, чүгле оруумну Ооң мурнунга камгалап алыйн.

¹⁶ Мээң камгалалым ол-дур, чүге дээрге Бургандан ойталаан кижи Ооң мурнунче чоокшулап диттикпес.

¹⁷ Дыңнаңар, мээң сөстеримни дыңнаңар, мээң чугаамче кичээнгейден салыңар.

¹⁸ Бодумнуң чаргымны эгелеп алдым, агарып үнеримни билир мен.

¹⁹ Мени буруудадып шыдаар кым барыл? Буруум бар болза, ыыдым чидип, өлүп каар мен.

²⁰ Бурганым, Сенден чүгле ийи дилээм бар, ынчан Сенден оон ыңай чаштынмас мен:

²¹ Бодуңнуң холуңну менден ырадып көрем; Сээң ытканың коргуушкун мени сирилетпезин!

²² Ынчан мени кый девит – харыылаар мен; азы чугаалаарын чөпшээрээш, Бодуң харыыдан берип көрем.

²³ Мээң бачыттарым, бузут-багым кайы хире хөйүл? Багай үүлгедиглерим, бачыттарымны көргүзүп көрем.

²⁴ Чүге Сен менден арның чажырып, мени Бодуңнуң дайзының деп санаар сен?

²⁵ Дүшкен бүрүнү коргудар сен бе, кургаг тараа саваңын истеп-сүрер сен бе?

²⁶ Меңээ аар-берге салым-чолду бижип кагдың – аныяк шаамның бачыттары дээш кезедип тур сен бе?

²⁷ Сен мээң буттарымны кинчилеп, мээң оруумну базым санай харагалзаар дээш, таваңгайларымны демдектеп кагдың.

²⁸ Кижи амытан ирик чүүл ышкаш, үзүт-ховаган чигген хеп ышкаш үстүп-ойлу бээр».