Иов 10 - Ыдыктыг Библия

Бурганның Иовка амыр-дыш көргүспестээни

¹ «Чуртталгам меңээ ческинчиг апарды, хомудалымны хосталгаже салыптайн, качыгдаан сеткилимден ажыы-биле чугаалаайн.

² Бурганга чугаалаайн: мени буруулуг дивейн көр. Мээң-биле чүге чаргылдажып турарыңны тайылбырлам.

³ Холуңнуң чаяалгазын кызагдап, бак көөрү, бузуттугларның бодалдарын чүүлдүгзүнери Сеңээ тааржыр-дыр бе?

⁴ Сээң карактарың – өлүр салымныг кижилернии дег бе, оларның көөрү дег кылдыр көөр-дүр сен бе?

⁵ Сээң хүннериң кижи амытанның хүннери дег бе, Сээң чылдарың – бөдүүн кижинии дег бе?

⁶ Чүге Сен мээң буруумну дилеп тып тур сен, бачыдымны илерекседип тур сен?

⁷ Буруу чогум Сеңээ билдингир болгай. Мени кым-даа Сээң холуңдан камгалап шыдаар эвес.

⁸ Сээң холдарың мени хевирлеп, бүрүнү-биле кылып каан, а ам мени узуткаар деп тур сен бе?

⁹ Сактып келем, Сен мени дойдан тудуп турдуң, а ам довурак-доозунче эгидериң ол бе?

¹⁰ Сен мени иемниң иштинге ботталып турумда, сүт дег төпкеш, оон ээжегей ышкаш хоюдуп каан сен;

¹¹ эът, кешти меңээ кедирип, сөөктер, сиирлер-биле тудуштуруп каан сен.

¹² Амыдырал биле энерелди меңээ хайырлааш, сагыш човаашкының-биле амы-тынымны камгалап келдиң.

¹³ А Сээң чүрээңге өске чүүл чаштып турган, Сээң чүнү бодап турганыңны билир мен.

¹⁴ Бачыт үүлгетсимзе, Сен мени истеп тывар сен, кем-буруум дээш кеземче чок арттырбас сен.

¹⁵ Буруулуг болзумза, ат болур мен! Актыг-даа болзумза, бажым көдүрүп шыдавас мен: мээң адым шуут баксырап кагды, хилинчек менче сиңе берди.

¹⁶ Бажым көдүрүп кээримге-ле, арзылаң дег халдап кээр-дир сен, коргунчуг күжүң-биле катап-катап мени согар-дыр сен.

¹⁷ Меңээ удур херечилелди катап-катап кылып, килеңиңни меңээ удур улам-на күштелдирип, чаа-чаа аг-шеригни меңээ удур көдүрүп-ле тур сен.

¹⁸ Сен мени чүге иемниң иштинден ужулдуң? Ол үеде өлү бээрим кай, мени кым-даа көрбес ийик;

¹⁹ кажан-даа чурттаваан боорум кай, иемниң иштинден-не чевегже аппарып кааптары кай!

²⁰ Мээң кыска назыным төнер четкен-дир. Мени каапкаш барам, сеткилим бичии-даа болза өөрүзүн –

^21-22 караңгы кара, өлүмнүң хөлегези бүргээн, дүмбей караңгы оранче, аайлаттынмаан черже эглиш чок чоруур бетинде өөрүзүн».