Иоил 2 - Ыдыктыг Библия

Бурганның аг-шерииниң халдаашкыны

¹ Сионга трубадан этсиңер, Бурганның ыдыктыг даанга дүвүрээзин медээзин бериңер. Чер-чурттуң бүгү чурттакчылары сирилезин, чүге дээрге Дээрги-Чаяакчының шииткел хүнү кел чыдар-дыр, ол хүн чоокшулап келген-дир.

² Ол дээрге кара булуттарлыг, дүмбей караңгы хүн-дүр. Хөй санныг, күштүг чон имир ышкаш чаттылыпкан кел чыдыр. Эрте-бурунгу үелерде-даа турбаан, келир салгалдарда-даа турбас чон ол-дур.

³ Ол чоннуң мурнунда хөме ап турар от бар, а артында – өрттендир чип турар чалбыыш бар. Ол бээр келбээнде, бо чер Эдемниң сесерлии дег турган, а ол келгеш баарга, кургап калган хову дег апаар. Кым-даа ол чондан камгаланып шыдавас.

⁴ Ооң хевири аъттар хевири дег, ол халдып орда, чүгүрүк аъттар-ла.

⁵ Ол чон даглар бажы-биле дайынчы тергелер даажы дег шимээргеп, чалбыыштыг оттуң оът-сигенде дазырааны дег шимээн үндүрүп, тулчуру-биле чыскаалыпкан аг-шериг ышкаш халдып орар.

⁶ Ол аг-шеригни көргеш, өске чоннар сирилей бээр, бүгү улустуң арыннары агарып каар.

⁷ Ол чон мөгелер дег маңнажып халдаар, ханаларже дайынчылар дег халбактанып үнер. Олар шупту чыскаалган аайы-биле чоруп, бар чыдар уг-шиинден өскээр барбас.

⁸ Олар аразында баскылашпас, кайызы-даа чиге мурнунче бар чыдар; чыскаалын үревейн, камгалалды өттүр чаза булгаар.

⁹ Олар хоорайже чүткүп кирип, ханаларны дургаар маңнажып, бажыңнарже, оорлар ышкаш, соңгалар таварып кире бээр.

¹⁰ Оларның мурнунга чер сириңейнип, дээр чайганып, хүн биле ай өжүп, сылдыстар чырытпастаар.

¹¹ Дээрги-Чаяакчының үнү Ооң аг-шерииниң мурнунга дыңналыр, Ооң аг-шерии дүк-түмен, Ооң сөзүнүң күүседикчилери күчү-күштүг. Дээрги-Чаяакчының шииткел хүнү өндүр улуг болгаш аажок коргунчуг. Ону кым шыдап эртерил?

Бурганның чонга Бодунче эглирин дужааганы

¹² Дээрги-Чаяакчы: «Ам безин Менче бүгү чүлдү-чүрээңерден, шээрленип база ишкирнип ыглап тургаш, эглип келиңер» – деп медеглээн.

¹³ Качыгдалдан хевиңер эвес, чүректериңер чара тырткаш, боттарыңарның Бурганыңар Дээрги-Чаяакчыже эглип келиңер, чүге дээрге Ол килеңнээчел эвес, ээ көрнүүчел, кээргээчел, өндүр улуг энерелдиг-дир, Ол аазаан кеземчезин күш чок болдурарынга белен.

¹⁴ Кым билир боор? Ол өскээр боданып, кезетпейн баарын, харын силерге ачы-буянныг бооп артып каарын. Ынчан Бурганыңар Дээрги-Чаяакчыга өргүүр далган-тараа биле арага четчир боор.

¹⁵ Сионга трубадан этсиңер, ыдыктыг шээрлээшкинден доктаадып, онзагай чыыштан чарлаңар.

¹⁶ Чонну бөлүп, ыдыктыг чыыштан кылыңар, ирейлерни чалаңар, элээди, чаш уругларны кыйгырып эккелиңер. Күдээ оол безин бодунуң өрээлинден, келин кыс – өгленчир бажыңындан үнүп келзин.

¹⁷ Дээрги-Чаяакчының өргээзиниң мурнунда, серилиг чер биле өргүл салыр бедигээш аразында турар Бурганның бараалгакчылары ыглап-сыктап, мынча дишсин: «Дээрги-Чаяакчы, Бодуңнуң чонуңга хайыраңны көргүзем, Бодуңнуң өнчүң болур улусту бак сөглетпем, бисти өске чоннар кыжырбазын; чүге ол чоннар аразында: „Оларның Бурганы кайыл?“ – дижип турарыл?»

Израиль чонга ачы-буян кээр

¹⁸ Дээрги-Чаяакчы ынчан Бодунуң чери дээш хүннээчелин база Бодунуң чонунга кээргелин көргүзер.

¹⁹ Дээрги-Чаяакчы Бодунуң чонунга мынча деп харыылаар: «Мен силерже далган-тараа, чаа арага болгаш олива үзү чорудуп бээр мен – ол бүгү-биле тодар силер, моон соңгаар өске чоннарга силерни бак сөглетпес мен.

²⁰ Мен соңгу чүктен келген аг-шеригни силерден ырадып, куруг, кургап калган черже үндүр сывырыптар мен. Оларның мурнукуларын чөөн чүкте далайже, а соондагыларын – барыын чүкте далайже чорудуптар мен, оларның мөчү-сөөктеринден бак чыт үнер, хоралыг чыт тараар. Чүге дээрге олар хөй бузутту үүлгеткен-дир».

²¹ Чер-чурт, кортпа! Сен өөрүп-хөгле, чүге дээрге Дээрги-Чаяакчы өндүр улуг чүүлдү кылыр-дыр.

²² Черлик дириг амытаннар, кортпаңар, чүге дээрге хову-шөлдерде одар-белчиирлер ногаарара берген-дир, ыяштар чимизин берип турар-дыр, фига ыяжы биле виноград сывы элбек дүжүт берип турар-дыр.

²³ Сионнуң чону, өөрүңер, боттарыңарның Бурганыңар Дээрги-Чаяакчыга хамааржырыңар дээш хөглеңер! Ол силерге чөптүг-шынныы-биле чаъсты хайырлаар, ооң мурнунда дег, күскү, часкы чаъстарны хайырлаар.

²⁴ Тараа шаңнарын дүжүт дола бээр, доскаарларны чаа арага болгаш олива үзү чык дола бээр.

²⁵ «Силерже ыдыпканым өндүр улуг аг-шериим болур шартылаа биле шергиниң дүжүттү чип турган чылдары дээш, Мен силерге орнун тургузуп бээр мен.

²⁶ Пөккүже чемненип, тода бээр силер, Бурганыңар Дээрги-Чаяакчының адын алдаржыдар силер. Мен силерни бодааш, кайгамчык чүүлдү кылдым, Мээң чонум моон соңгаар кажанда-даа бак атка кирбес.

²⁷ Ынчаарга Мээң израиль чоннуң аразында турарымны, Мени – силерниң Бурганыңар Дээрги-Чаяакчы деп, өске Бурган чок деп билип аар силер. Мээң чонум моон соңгаар кажанда-даа бак атка кирбес».

Бурганның Бодунуң Сүлдезин бээри хүн

²⁸ «Ооң соонда мындыг боор: Мен Бодумнуң Сүлдем-биле бүгү улусту бүргей аптар мен. Силерниң оглу-кызыңар өттүр билип медеглеп эгелээр, кырганнарыңар өттүр билген дүштер дүжээр, аныяк оолдарыңар онзагай көстүүшкүннер көөр.

²⁹ Ол хүннерде Мен эр, кыс чалчаларны безин Бодумнуң Сүлдем-биле бүргей аптар мен.

³⁰ Дээрге база черге кайгамчык бадыткал демдектери: хан, от болгаш дүргектелген ышты көргүзер мен.

³¹ Дээрги-Чаяакчының өндүр улуг, коргунчуг шииткел хүнү чедип кээр бетинде хүн дүмбей караңгы бооп, ай хан өңнүг бооп хуула бээр.

³² Ынчан Дээрги-Чаяакчының адын кыйгырган кижи бүрүзү камгалал алыр. Дээрги-Чаяакчының аазаанын ёзугаар Сион дагга база Иерусалимге хоргадаан чон дириг артар; Дээрги-Чаяакчының Бодунче кыйгырып алган улузу өлбейн баар».