Иезекиил 28 - Ыдыктыг Библия

Тирниң хаанының буураашкыны

¹ Дээрги-Чаяакчы меңээ Бодунуң сөзүн ажыдып чугаалаан:

² «Кижи амытан, Тирниң чагырыкчызынга Дээрги-Бурган-Чаяакчының чугаалаан чүвезин дамчыт: Улуургак чорууңга алзып: „Мен – бурган мен. Далай ортузунда, бурганның дүжүлгезинде саадап олур мен“ – дээр-дир сен. Бурганның мерген угааны-биле сээң угааның дөмей деп бодаар-даа болзуңза, сен дээрге Бурган эвес, а кижи-дир сен.

³ Даниилден мерген угаанныг сен, сеңээ билдинмес чажыт чүве-даа кайда боор!

⁴ Мерген угаанныыңдан, угаан-сарыылдыыңдан бай-шыдалдыг апарып, шыгжамырларыңны алдын-мөңгүн-биле долдуруп алган сен.

⁵ Садыглажып билириңден, улуг угаанныыңдан бай-шыдалдыың дам барган, бай-байлааң дээш эмин эрттир улуургай берген сен».

⁶ Ынчангаш Дээрги-Бурган-Чаяакчы мынча дээн: «Бодуңнуң угааныңны Бурганның мерген угааны-биле дөмейлээниң дээш,

⁷ Мен сенче өске черлер улузун, чоннарның эң түрлүүн ыдар деп тур мен; олар сээң мерген угаан, чараш-каазыңче хынындан ужулган хылыштарын аннып, сени бужартадып каар.

⁸ Олар сени тамыже киирер, далай ортузунга хылыш-биле шаштырткан кижи ышкаш өлүртүп каар сен.

⁹ Бодуңнуң шаажылакчың холунга бурган эвес, анаа кижи болур болганыңда, өлүрүкчүң мурнунга: „Мен – бурган мен!“ – деп катап-катап чугаалаар сен бе?

¹⁰ Сен кыртыжадып демдектетпээн хейниң өлүмү-биле даштыкы улустуң холундан өлүр сен, чүге дээрге Мен ону чугааладым». Дээрги-Бурган-Чаяакчының медеглээн чүвези ол-дур.

¹¹ Дээрги-Чаяакчы меңээ Бодунуң сөзүн ажыдып чугаалаан:

¹² «Кижи амытан, Тирниң хааны дээш кажыыдал ырын ырлап, Дээрги-Бурган-Чаяакчының чугаалаан чүвезин аңаа дамчыт: Сен – болбаазыраңгай чоруктуң дээди демдээ сен, кедергей мерген угаанныг сен, тулган чараш-каас сен.

¹³ Сен Эдемге – Бурганның сесерлиинге турдуң. Сени янзы-бүрү эртине даштар: рубин, топаз, алмаз, хризолит, оникс, яшма, сапфир, бирюза болгаш изумруд каастап турган. Оларны алдын-биле хоолап, сиилбирлээш, сээң чаяаттынган хүнүңде сеңээ белеткеп каан болган.

¹⁴ Сени күчүлүг херувимниң камгалалының адаанга арттырып каан мен. Сен Бурганның ыдыктыг даанга туруп, оттуг даштар аразынга чоруп турдуң.

¹⁵ Чаяаттынган хүнүңден эгелээш, бодуңнуң оруктарыңга кем чок бооп келдиң. Ынчалза-даа ооң соонда кем-буруулуг апардың.

¹⁶ Сээң садыыңның хемчээли улгаткан тудум, ишти-хөңнүң баксырап, күчүлел база бачыт үүлгедип алдың. Мен сени, бужар кижини дег, Бурганның даандан дүжүр октаптым; камгалакчы херувим сени оттуг даштар аразындан үндүр сывырыпты.

¹⁷ Чараш-каазыңдан улуургай бердиң, магалыг чаагайыңдан мерген угааныңны чок кылып алдың. Ынчангаш Мен сени черге чыдар кылдыр октаптар мен, хааннар сени көргеш, кочулап шоотсун.

¹⁸ Бодуңнуң шынчы эвес садыглажыышкының-биле эңдерик кем-буруу кылып, ыдыктыг черлериңни бужартадып алдың. Ынчангаш Мен сени чиир отту бодуңнуң иштиңден өөскүдүп үндүрер мен; сени чер кырынга сенче көрүп турар бүгү улуска көзүлдүр хүл кылдыр хуулдурар мен.

¹⁹ Сени билир бүгү чоннарны сээң салым-хууң коргудуптар. Сен коргунчуг төнчүге таваржыр сен, моон соңгаар кажан шагда турбас сен».

Сидон хоорай дугайында

²⁰ Дээрги-Чаяакчы меңээ Бодунуң сөзүн ажыдып чугаалаан:

²¹ «Кижи амытан, Сидонче шиглей көрүнгеш, аңаа удур өттүр билип медегле.

²² Дээрги-Бурган-Чаяакчының чугаалаан чүвезин аңаа дамчыт: Сидон, Мен сеңээ удур апардым, Мен сээң чонуң аразынга алдаржыыр мен. Сеңээ үндүрген шииткелди күүседип, чурттакчыларың аразынга ыдыктыымны көргүзеримге, улус Мени Дээрги-Чаяакчы деп билип аар.

²³ Мен сенче хамчык аарыгны, сээң кудумчуларыңче – кыргып-хыдыышкынны ыдар мен. Сээң чурттакчыларың аразынга кайыын-даа шанчып турар хылышка өлүрткеннер кээп дүжүп турар апаар. Олар Мени Дээрги-Чаяакчы деп билип аар.

²⁴ Израиль чон моон соңгаар, теннери-биле шиштеп балыглаар бок үнүштер ышкаш, ону куду көөр кожаларлыг болбас. Олар ынчан Мени Дээрги-Чаяакчы деп билип аар».

²⁵ Оон Дээрги-Бурган-Чаяакчы мынча дээн: «Израиль чонну тарадып чорудупканым өске чоннардан чыып алгаш, ол чоннар көрүп турда, израильчилерниң аразынга Бодумнуң ыдыктыымны көргүзер мен. Олар Мээң чалчам Иаковка бергеним черге – боттарының черинге чурттаар.

²⁶ Израильчилер ол черге айыыл чок чурттап, бажыңнар тудуп аар болгаш виноград тарып олуртуп аар. Олар айыыл чок чурттаар, а оларга бак чүве күзээр кожаларын Мен шиидер мен. Олар ынчан Мени Дээрги-Чаяакчы, оларның Бурганы деп билип аар».