Иезекиил 10 - Ыдыктыг Библия

Дээрги-Чаяакчының Бодунуң өргээзинден чорупканы

¹ Оон көөрүмге, херувимнерниң баштарында бопурук чүве кырында сапфир даштан кылган дүжүлге ышкаш бир чүве көстүп турду.

² Дээрги-Чаяакчы лён хеп кеткен кижиге: «Херувимнерниң адаанда дугуйлар аразынче кире бергеш, оларның аразында чалбыыштыг көстерден адыш долдур ап алгаш, хоорайже октавыт» – диди. Мен көрүп турумда, демги кижи ынаар кире берди.

³ А херувимнер, ол кижи кире бээрге, Бурганның өргээзиниң мурнуу чүкче көрүнген талазынга турганнар; өргээниң иштики шөлүн булут бүргеп турган.

⁴ Дээрги-Чаяакчының өндүр чырыы херувимниң кырындан көдүрүлгеш, Бурганның өргээзиниң эргининиң кырынче көже берген. Бурганның өргээзин булут бүргей апкан, а иштики шөлдү Дээрги-Чаяакчының чайынналчак чырыы шыва апкан.

⁵ Херувимнерниң чалгыннарының даажы өргээниң даштыкы шөлүнге безин Күчүлүг Бурганның чугаалап турар үнү ышкаш дыңналып турган.

⁶ Кажан Ол лён хеп кеткен кижиге: «Дугуйлар аразында, херувимнер аразында отту ап ал» – дээрге, демги кижи оларның аразынче киргеш, дугуй чанынга туруп алды.

⁷ Ынчан херувимнерниң бирээзи оларның аразында отче холун сунгаш, ону ап алгаш, лён хеп кеткен кижиниң холунче салып каарга, демгизи ап алгаш, үне берди.

⁸ (Херувимнерниң чалгыннарының адаанда кижи холдары ышкаш чүвелер көстүп турду.)

⁹ Көөрүмге, херувимнерниң чанында дөрт дугуй бар болду; бир дугуй-ла бир херувимниң чанында турду, дугуйлар алдынналчак эртине даш ышкаш көзүлдү.

¹⁰ Дугуйлар дөртелээ, дугуй бүрүзү өскезиниң иштинде турар-даа дег, бир дөмей көстүр болду.

¹¹ Дугуйлар шимчеп үнүпкенде, дөрт таланың кайызынче-даа шиглей шимчеп үнүп болур, шимчээшкин үезинде эргилбес болдулар. Херувимнерниң бажы кайнаар угланган болдур, дугуйлар ынаар бар чыдар, шимчээшкин үезинде эргилбес болдулар.

¹² Херувимнерниң бүгү мага-боттары, ооргалары, холдары болгаш чалгыннары, боттарының дугуйлары ышкаш, долгандыр карактар-биле долдур шыптынган болду.

¹³ Дугуйларны тырыкылар деп адаарын кулаам-биле дыңнадым.

¹⁴ Бир херувим-не дөрт арынныг болду: бирги арын – херувимнии, ийигизи – кижинии, үшкүзү – арзылаңныы, дөрткүзү – эзирнии.

¹⁵ Херувимнер көдүрлүп келди. Кевар хемниң чанынга меңээ көзүлген дириг амытаннар ол болду.

¹⁶ Херувимнер шимчеп чоруптарга, оларның чанында дугуйлар база кады шимчеп чоруптар турган; а кажан херувимнер черден көдүрлүр дээш чалгыннарын далбайтыптарга, дугуйлар база оларның чанынга аңгыланмайн артып каар турган.

¹⁷ Кажан херувимнер доктаай бээрге, дугуйлар база доктаар, а херувимнер көдүрлүрге, дугуйлар база олар-биле кады көдүрлүр болду, чүге дээрге дириг амытаннарның сүлдези дугуйларда болган.

¹⁸ Дээрги-Чаяакчының өндүр чырыы Бурганның өргээзиниң эргининден ырап чоруткаш, херувимнерниң кырынга доктаады.

¹⁹ Мен көрүп турумда, херувимнер чалгыннарын далбаңнаткаш, черден көдүрлү берди; олар шимчеп чоруптарга, дугуйлар база олар-биле кады чорупту. Олар оон Дээрги-Чаяакчының өргээзиниң чөөн хаалгазынче кирер чер чанынга доктаады, а Израильдиң Бурганының өндүр чырыы оларның кырынга туруп алды.

²⁰ Кевар хем чанынга Израильдиң Бурганының адаанга көргеним дириг амытаннар ол болду. Херувимнер бо ышкажыл деп билип каапкан мен.

²¹ Оларның кайызы-даа дөрт арынныг болгаш дөрт чалгынныг, а чалгыннарының адаанда кижинии ышкаш холдарлыг болду.

²² Херувимнерниң арыннары Кевар хем чанынга көргеним арыннар ышкаш көзүлдү; оларның кайызы-даа мурнунче дорт шимчеп бар чытты.